រាជធានីភ្នំពេញ៖ ធ្លាប់មានជីវិតជាតារាចែងចាំងលើវេទិកាគ្រប់បណ្តាស្ថានីយទូរទស្សន៍បច្ចុប្បន្នអ្នកនាងសំ ប៉ូលីដា បានអាប់រស្មី បន្តិចម្តងៗលើពិភពសិល្បៈ ។ ក្រោយពេលជីវិតជួបព្យុះបញ្ហាបោកបក់ជាច្រើនលើកបានប្រែក្លាយតារាស្រីសំ ប៉ូលីដា ឲ្យជាប់គាំងមិនអាចងើបឡើងវិញលើទីលានសិល្បៈដែលធ្លាប់តែសើចសប្បាយបានជាថ្មី ។…
រាជធានីភ្នំពេញ៖ ធ្លាប់មានជីវិតជាតារាចែងចាំងលើវេទិកាគ្រប់បណ្តាស្ថានីយទូរទស្សន៍បច្ចុប្បន្នអ្នកនាងសំ ប៉ូលីដា បានអាប់រស្មី បន្តិចម្តងៗលើពិភពសិល្បៈ ។
ក្រោយពេលជីវិតជួបព្យុះបញ្ហាបោកបក់ជាច្រើនលើកបានប្រែក្លាយតារាស្រីសំ ប៉ូលីដា ឲ្យជាប់គាំងមិនអាចងើបឡើងវិញលើទីលានសិល្បៈដែលធ្លាប់តែសើចសប្បាយបានជាថ្មី ។ អ្នកនាងសំ ប៉ូលីដា ក្រោយពេលជួបភាពរកាំរកូសក្នុងគ្រួសារដោយប្ដីលួចមានស្រីថ្មីធ្វើឲ្យផ្អើលអស់អ្នកសិល្បៈ និងអ្នកគាំទ្រនោះមិនប៉ុន្មានផង ស្រាប់តែ ថ្មីៗនេះនៅលើបណ្ដាញសង្គមហ្វេសប៊ុក តារាស្រីរូបនេះរំលេចនូវរូបកូនប្រុសស្រី២នាក់កំពុងដេកយ៉ាងកម្សត់់ អមជាមួយពាក្យលើកឡើងថា«អាណិតណាស់កូនមាសម្ដាយ ។ ទ្រាំទៅណាកូន ម្ដាយមកដើររកការងារធ្វើដើម្បីចិញ្ចឹមកូន»។
បន្ទាប់ពីបានទម្លាយរូបភាព និងឃ្លោងឃ្លានោះមក អ្នកនាងសំ ប៉ូលីដា មិនបានបង្ហាញថាបច្ចុប្បន្ននាងកំពុងប្រកបការងារអ្វីទេសម្រាប់ផ្គត់ផ្គង់ជីវភាពគ្រួសារ ។ ទាំងអ្នកសិល្បៈ និងក្រៅរង្វង់សិល្បៈសុទ្ឋតែបានសម្តែងការសោកស្តាយដែលអ្នកនាងលីដាមិនអាចបន្តកេរ្តិ៍ឈ្មោះសិល្បៈតទៅទៀតបាន ជាក់ស្តែងពុំដែលឃើញស្ថានីយទូរទស្សន៍ណាមួយអញ្ជើញនាងសម្តែងទេ ។ ជីវិតសិល្បៈធ្លាក់ក្នុងស្ថានភាពបែបនេះហើយ ជីវិតប្តីប្រពន្ឋមានបញ្ហាទៀតដោយស្វាមី បែកចិត្តមានថ្មី ។
កាលពីប៉ុន្មានសប្តាហ៍មុន ដោយទ្រាំលែងបាន អ្នកនាងសំ ប៉ូលីដា បានបកអាក្រាតរឿងប្តីជាកងរាជអាវុធហត្ថពាក់សក្តិ៤ លួចភ្ជាប់ពាក្យជាមួយស្រីថ្មី ។ ទោះជាយ៉ាងណាក្តីលោក ស្វាយ ស៊ីសុថា ដែលជាស្វាមីឆ្លងកាត់គន្លងប្រពៃណីតាំងពីឆ្នាំ២០១២ មកបានចេញមុខបកស្រាយបំភ្លឺថា «ការលើកឡើងរបស់អ្នកនាងសំ ប៉ូលីដា មិនពិតទាំងស្រុងទេ ។ នាងថាខ្ញុំទៅភ្ជាប់ពាក្យជាមួយស្រីថ្មី តែខ្ញុំ និងគាត់គ្មានអេតាស៊ីវិលរួមគ្នាឡើយ គឺគ្រាន់តែបានរៀបការត្រឹមត្រូវតាមប្រពៃណីប៉ុណ្ណោះ»។
អ្វីដែលអ្នកនាងសំ ប៉ូលីដា ចង់បាននៅពេលនេះ គឺមិនហាមឃាត់ប្តីមានប្រពន្ធថ្មី តែសូមឲ្យផ្តិតមេដៃលែងលះគ្នាតាមច្បាប់ និងទទួលខុសត្រូវជួយចិញ្ចឹមកូន តែលោកស្វាយ ស៊ីសុថា ហៅខ្យា បានលើកឡើងថា «ខ្ញុំប្រាប់គាត់ថា ខ្ញុំសូមកូនមកចិញ្ចឹម ហើយបើអូននឹកកូនអាចយកទៅលេង ឬមកលេងបាន» តែសំ ប៉ូលីដា ប្រកាន់ជំហរថា «មិនឲ្យកូនទៅគាត់ទេ ព្រោះគាត់ជាមនុស្សញៀននឹងល្បែង គ្រាន់តែឲ្យកូននៅជាមួយប៉ុន្មានថ្ងៃ កូនប្រាប់ថា ប៉ានាំទៅកន្លែងចាក់អាប៉ោង ហើយពេលយប់ដេកជាមួយស្រីទៀតផង»។
បើតាមសំដីរបស់អ្នកដឹកនាំកម្មវិធីសិល្បៈតន្ត្រីផ្សាយផ្ទាល់មួយចំនួន និងអ្នកសិល្បៈលើកឡើងស្រដៀងគ្នាថាទេពកោសល្យសិល្បៈរបស់សំ ប៉ូលីដា អាចប្រើការបាន ប៉ុន្តែអ្វីដែលជារនាំងសម្រាំងនាង គឺមកពីនាងឲ្យតែទៅច្រៀងប្រពៃណីទាល់តែដាកABC២ទៅ៣កំប៉ុងសិន។ ដូច្នេះហើយទើបគេខ្លាចនាងបែកអារម្មណ៍និយាយពាក្យផ្តេសផ្តាសក្នុងកម្មវិធី ពិសេសក្នុងកម្មវិធីតន្ត្រីផ្សាយបន្តផ្ទាល់ ។ ក្រៅពីនេះគឺកត្តាជីវិតផ្ទាល់ខ្លួនរបស់នាងមានបញ្ហាជាបន្តបន្ទាប់ ៕
ចែករំលែកព័តមាននេះ