ខេត្តស្វាយរៀង ៖ លោកជំទាវឧបនាយករដ្ឋមន្ដ្រី ម៉ែន សំអន រដ្ឋមន្ដ្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាប្រធានក្រុមការងារថ្នាក់ជាតិចុះជួយខេត្តស្វាយរៀងនៅថ្ងៃទី២៨ ខែតុលា ឆ្នាំ២០១៨ បានអញ្ជើញជាអធិបតីក្នុងពិធីប្រណាំងទូកប្រពៃណីខ្នាតអន្តរជាតិ និងទូកក្តារបីសន្លឹក នៅទន្លេវៃគោក្រុងស្វាយរៀង ។
លោក ម៉ែន វិបុល អភិបាលនៃគណៈអភិបាលខេត្តបានឲ្យដឹងថា ការប្រណាំងទូកនេះមានទូកចូលរួមប្រណាំងមកពីគ្រប់រាជធានីខេត្តចំនួន៤៥ទូក និងមានកីឡាករចំនួន១១៣៥នាក់ដើម្បីអបអរសាទរព្រះរាជពិជីបុណ្យអុំទូក បណ្ដែតប្រទីប សំពះព្រះខែ និងអកអំបុក ដែលនឹងចូលមកដល់ថ្ងៃទី២១-២២-២៣ ខែវិច្ឆិកា ឆ្នាំ២០១៨ នៅទន្លេចតុមុខខាងមុខព្រះបរមរាជវាំងរាជធានីភ្នំពេញ ។
ក្នុងឱកាសនេះលោកជំទាវម៉ែនសំអនបានថ្លែងអំណរគុណយ៉ាងជ្រាលជ្រៅ ចំពោះលោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសលោក ឌី វិជ្ជា និងលោកស្រី ហ៊ុន ម៉ាណា ដែលបានជួយឧបត្ថម្ភគាំទ្រទាំងស្មារតី សម្ភារ និងថវិកាដល់ការរៀបចំពិធីប្រណាំងទូក និងបាននាំកីឡាករ និងទូកពីបណ្ដា២៥រាជធានី-ខេត្តមកចូលរួមប្រណាំងនាឱកាសនេះក៏មានការប្រគំតន្ត្រី និងតាំងពិពណ៌នៃមុខទំនិញជាច្រើនផងដែរ ។
លោកជំទាវក៏បានអបអរសាទរចំពោះកីឡាករទូកដែលទទួលបាន ចំណាត់ថ្នាក់ជ័យលាភី និងសូមលើកទឹកចិត្តដល់កីឡាករទូកដែលមិនទទួលបានចំណាត់ថ្នាក់ទាំងអស់កុំមានការអាក់អន់ចិត្តចំពោះលទ្ធផលដែលខ្លួនបានទទួលគឺត្រូវខិតខំបន្ថែមទៀតដើម្បីត្រៀមប្រកួតនៅឆ្នាំបន្តបន្ទាប់ទៀតក្នុងន័យពង្រឹងការសាមគ្គីភាព និងរក្សានូវទំនៀមទម្លាប់ប្រពៃណីវប្បធម៌ដ៏ល្អប្រពៃ របស់ប្រជាជនកម្ពុជាយើងដែលមានតាំងពីយូរលង់មក ៕
ចែករំលែកព័តមាននេះ