ខេត្តកំពង់ស្ពឺ ៖ សមត្ថកិច្ចបានឃាត់ខ្លួនជនម្នាក់ បន្ទាប់ពីរត់គេចបានមួយថ្ងៃ ក្រោយពីធ្វើសកម្មភាពចូលទៅលើកកុមារីម្នាក់អាយុ១០ឆ្នាំ ដែលកំពុងដេកជាមួយបងស្រីប្រុងយកទៅរំលោភសេពសន្ថវៈ តែមិនបានសម្រេច ដោយសារបងស្រីភ្ញាក់មិនឃើញប្អូន ក៏ស្រែកឆោឡោឡើង ហើយជនបង្កដែលនាងស្គាល់អត្តសញ្ញាណនោះក៏រត់គេចខ្លួន…
ខេត្តកំពង់ស្ពឺ ៖ សមត្ថកិច្ចបានឃាត់ខ្លួនជនម្នាក់ បន្ទាប់ពីរត់គេចបានមួយថ្ងៃ ក្រោយពីធ្វើសកម្មភាពចូលទៅលើកកុមារីម្នាក់អាយុ១០ឆ្នាំ ដែលកំពុងដេកជាមួយបងស្រីប្រុងយកទៅរំលោភសេពសន្ថវៈ តែមិនបានសម្រេច ដោយសារបងស្រីភ្ញាក់មិនឃើញប្អូន ក៏ស្រែកឆោឡោឡើង ហើយជនបង្កដែលនាងស្គាល់អត្តសញ្ញាណនោះក៏រត់គេចខ្លួន ។
ការឃាត់ខ្លួននេះ ធ្វើឡើងកាលពីរសៀលថ្ងៃទី២៥ តុលា កន្លងទៅ នៅឃុំក្រាំងចេក ស្រុកឧដុង្គ ។ សមត្ថកិច្ចបានឲ្យដឹងថា ជននេះឈ្មោះ ឈន ឌីណា អាយុ២៣ឆ្នាំ រស់នៅក្នុងឃុំខាងលើ ហើយករណីនេះ កើតឡើងកាលពីវេលាម៉ោង៩ និង១៧នាទីយប់ថ្ងៃទី២៤ ខែតុលា ។
តាមបងស្រីកុមារីរងគ្រោះរៀបរាប់ថា មុនពេលកើតហេតុ រូបនាងនិងប្អូនស្រីកំពុងដេកលង់លក់នៅលើគ្រែក្នុងផ្ទះតៀម ស្រាប់តែពេលនាងភ្ញាក់ដឹងខ្លួន ក៏បាត់មិនឃើញប្អូនស្រីក៏ស្រែកឆោឡោឡើង ។ ចំណែកជនសង្ស័យសារភាពថា «រូបគេពិតជាបានធ្វើសកម្មភាពប៉ងរំលោភកុមារីខាងលើប្រាកដមែន ។ នៅយប់ថ្ងៃនោះ ក្រោយពេលផឹកស្រា និងមើលរឿងសិចក្នុងទូរស័ព្ទ ក៏នឹកឃើញចង់រួមរ័ក លុះក្រឡេកទៅឃើញក្មេងស្រី២នាក់បងប្អូនកំពុងដេក ក៏កើតគំនិតចង់រំលោភតែម្តង ។
ជននេះ សារភាពទៀតថា ដំបូងឡើយចង់ចាប់នាងបងទេ តែដោយខ្លាចមិនបានសម្រេចក៏លបលើកបីនាងប្អូន ដែលកំពុងដេកលក់លើគ្រែជាមួយបងស្រី យកទៅខាងជើងផ្ទះចម្ងាយប្រមាណ១០០ម៉ែត្រ ធ្វើសកម្មភាពរំលោភតែមិនបានសម្រេចឡើយ ស្រាប់តែឮនាងជាបងស្រែកឆោឡោឡើង ទើបរូបគេរត់គេចខ្លួន ។
លុះពេលកំពុងសម្ងំលាក់ខ្លួននៅផ្ទះ ក៏ត្រូវសមត្ថកិច្ចមកចាប់ខ្លួនតែម្តងតាមការចង្អុលមុខរបស់ក្មេងស្រី ។
អធិការនគរបាលស្រុកឧដុង្គ បានប្រាប់ថា នៅព្រឹកថ្ងៃទី២៦ ខែតុលា ក្រោយពីកសាងសំណុំរឿងរួចរាល់ សមត្ថកិច្ចបានបញ្ជូនជនសង្ស័យរូបនេះទៅកាន់ការិយាល័យប្រឆាំងការជួញដូរមនុស្សនិងការពារអនីតិជន ដើម្បីចាត់ការបន្តតាមនីតិវិធី ៕
ចែករំលែកព័តមាននេះ