ខេត្តកោះកុង ៖ ហេតុការណ៍គ្រោះថ្នាក់រថយន្តធ្លាក់ជ្រោះក្រឡាប់ឆេះគួរឲ្យរន្ធត់មួយ បានកើតឡើងកាលពីវេលាម៉ោង១១ និង១២នាទីព្រឹកថ្ងៃទី២៥ តុលា ស្ថិតនៅចំណុចចំណោតតាតៃក្រោម ចន្លោះគីឡូម៉ែត្រលេខ១៣០ និងលេខ១៣១ ស្ថិតក្នុងភូមិអន្លង់វ៉ាក់ ឃុំតាតៃក្រោម ស្រុកកោះកុង ។
មន្ត្រីនគរបាលចរាចរណ៍ឲ្យដឹងថា គ្រោះថ្នាក់នេះ បង្កឡើងដោយខ្លួនឯង ដោយរថយន្តដឹកដែកម៉ាកហ៊ី
យ៉ាន់ដាយ ប្រភេទសណ្តោងរ៉ឺម៉ក ពណ៌ខៀវ ពាក់ផ្លាកលេខ ភ្នំពេញ ៣B-៨៦៩៥ និងរ៉ឺម៉កពាក់ផ្លាកលេខ ភ្នំពេញ ៤A-១៦១៣ មានទិសដៅភ្នំពេញ-កោះកុង ។
លោក ស៊ុន ឃៀម អធិការនគរបាលស្រុកកោះកុង បានឲ្យដឹងថា ករណីនេះបណ្តាលមកពីរថយន្តដឹកដែកធ្ងន់ ចុះចំណោតត្រង់ចំណុចផ្លូវកែងជាន់ហ្វ្រាំងមិនស៊ី ក៏បណ្តាលឱ្យក្រឡាប់ឆ្លងចរន្តអគ្គិសនីឆេះក្បាលរថយន្ត និងបានបុកម៉ូមួយគ្រឿងជិះគ្នា៣នាក់ កំពុងធ្វើដំណើរឡើងចំណោតបញ្ច្រសទិសគ្នា ។ ម៉ូតូរងគ្រោះម៉ាកវ៉េវ ពណ៌ខ្មៅ-ទឹកមាស បើកបរដោយឈ្មោះ សាន់ សុម៉ានុត ភេទប្រុស អាយុ២១ឆ្នាំ មានទីលំនៅបច្ចុប្បន្ននៅភូមិ៤ សង្កាត់ដងទង់ ក្រុងខេមរភូមិន្ទបានស្លាប់ និងអ្នករួមដឹណើរ២នាក់ រកពុំទាន់ឃើញនៅឡើយ ។
លោកអធិការឲ្យដឹងទៀតថា ក្រោយពេលកើតហេតុ កម្លាំងប៉ុស្តិ៍នគរបាលរដ្ឋបាលតាតៃក្រោម សហការជាមួយកម្លាំងនគរបាលស្រុកនិងកម្លាំងការិយាល័យពន្លត់អគ្គិភ័យខេត្ត ជួយអន្តរាគមន៍បាញ់ទឹកពន្លត់ភ្លើងឆេះរថយន្ត ។
សមត្ថកិច្ចបញ្ជាក់ថា ក្នុងហេតុការណ៍គ្រោះថ្នាក់នេះ ជនរងគ្រោះខាងម៉ូតូមានគ្នា៣នាក់ ចំណែកខាងរថយន្តមានគ្នា២នាក់ ហើយសមត្ថកិច្ចបានរកឃើញសព២នាក់ និងអ្នករងរបួសម្នាក់នៅបាត់ខ្លួន២នាក់ សមត្ថកិច្ចកំពុងសហការគ្នាស្វែងរក ៕
ចែករំលែកព័តមាននេះ