ខេត្តកំពត ៖ ឯកឧត្ដមជាវ តាយ អភិបាលនៃគណៈអភិបាលខេត្ត និងជាប្រធានគណៈកម្មាធិការជំរឿនទូទៅនៃប្រជាជនខេត្តកំពតបានមានប្រសាសន៍បញ្ជាក់ថា ជាទូទៅ គឺមានតែការធ្វើជំរឿនប្រជាជនទេ ដែលអាចឲ្យយើងទទួលបានទិន្នន័យជាប្រជាជាតិសាស្ត្រពិតប្រាកដរបស់ប្រទេស និងជួយឲ្យរដ្ឋាភិបាលអាចរៀបចំតាក់តែងគោលនយោបាយបានត្រឹមត្រូវ…
ខេត្តកំពត ៖ ឯកឧត្ដមជាវ តាយ អភិបាលនៃគណៈអភិបាលខេត្ត និងជាប្រធានគណៈកម្មាធិការជំរឿនទូទៅនៃប្រជាជនខេត្តកំពតបានមានប្រសាសន៍បញ្ជាក់ថា ជាទូទៅ គឺមានតែការធ្វើជំរឿនប្រជាជនទេ ដែលអាចឲ្យយើងទទួលបានទិន្នន័យជាប្រជាជាតិសាស្ត្រពិតប្រាកដរបស់ប្រទេស និងជួយឲ្យរដ្ឋាភិបាលអាចរៀបចំតាក់តែងគោលនយោបាយបានត្រឹមត្រូវ ព្រមទាំងការអនុវត្តកម្មវិធីផ្សេងៗឲ្យទទួលបានតុល្យភាពនៃការអភិវឌ្ឍន៍សម្រាប់ប្រជាពលរដ្ឋ ។
មានប្រសាសន៍ថ្លែងបែបនេះនៅក្នុងឱកាសដែលឯកឧត្តមបានអញ្ជើញជាអធិបតីនៃពិធីប្រកាសគណៈកម្មាធិការជំរឿនទូទៅប្រជាជនកម្ពុជា ឆ្នាំ២០១៩ ថ្នាក់ក្រុងស្រុកសម្រាប់ខេត្តកំពត ដែលធ្វើឡើងនៅព្រឹកថ្ងៃទី២៥ ខែតុលា ឆ្នាំ២០១៨ ក្រោមការរៀបចំដោយមន្ទីរផែនការខេត្តកំពត ។ ឯកឧត្ដមជាវ តាយ អភិបាលខេត្តបានគូសបញ្ជាក់ឲ្យដឹងផងដែរថា ការធ្វើជំរឿនជាព្រឹត្តិការណ៍ជាប្រវត្តិសាស្ត្ររបស់ជាតិ១០ឆ្នាំម្តង ហើយការធ្វើជំរឿនទូទៅប្រជាជនកម្ពុជាបានធ្វើចំនួន០៣លើកកន្លងទៅរួចមកហើយ គឺនៅឆ្នាំ១៩៦២ តែត្រូវបានអាក់ខានទៅវិញ ក្នុងរយៈ ពេល៣៦ឆ្នាំ បណ្ដាលមកពីស្ថានភាពប្រទេសជាតិច្របូកច្របល់នៃសង្គ្រាម ហើយបានធ្វើលើកទី២ នៅខែមីនា ឆ្នាំ១៩៨៩ លើកទី៣ នៅខែមីនា ឆ្នាំ២០០៨ និងលើកទី៤នេះ នឹងត្រូវធ្វើឡើងនៅឆ្នាំ២០១៩ នៅថ្ងៃទី០៣ ខែមីនា ។ ឯកឧត្ដម ជាវ តាយ ក៏បានបន្តទៀតថា ជំរឿន គឺជាការងារដ៏ធំដោយមើលឃើញពីសារៈសំខាន់នៃជំរឿន ។ ឯកឧត្តមអភិបាលខេត្តក៏បានផ្ដាំផ្ញើដល់មន្ត្រី និងអ្នកពាក់ព័ន្ធរួម និងអាជ្ញាធរមូលដ្ឋានត្រូវរួមគ្នាអនុវត្តនូវការងារដ៏ចាំបាច់នៃជំរឿនទូទៅ ប្រជាជនខេត្តកំពតនេះដោយត្រូវប្រើប្រាស់នូវមធ្យោបាយសរុបធនធានសរុបដែលយើងមាន ដើម្បីឲ្យមានការងារជំរឿននេះបានសម្រេចជោគជ័យ តាមផែនការដាក់ចេញរបស់ថ្នាក់ជាតិក៏ដូចជា រាជរដ្ឋាភិបាលកម្ពុជាយើងផងដែរ ។
នៅក្នុងឱកាសនោះដែរ យោងតាមការឲ្យដឹងពីបច្ចេកទេសនៃការអនុវត្តរបស់លោក មឿង គង្គា ប្រធានមន្ទីរផែន ការខេត្តកំពតបានបញ្ជាក់ថា ជំរឿនទូទៅប្រជាជន គឺសំដៅលើវិធីសាស្ត្រទាំងមូលនៃការប្រមូលការចងក្រងការ វាយតម្លៃ ការវិភាគ និងការផ្សព្វផ្សាយទិន្នន័យ អំពីប្រជាជននៃប្រទេសមួយ ។ ជំរឿននេះពាក់ព័ន្ធដល់ការចុះបញ្ជីមនុស្ស និងកត់ត្រាលក្ខណៈរបស់មនុស្សម្នាក់ៗក្នុងចំ ណោមមនុស្សទាំងអស់ តាមកាលបរិច្ឆេទកំណត់ ។ ដោយឡែកសម្រាប់ជំរឿនទូទៅប្រជាជនកម្ពុជា គឺដើម្បីធ្វើការប្រមូលយកព័ត៌មានមូលដ្ឋានអំពីប្រជាជាតិសាស្ត្រ សេដ្ឋកិច្ចសង្គម និងវប្បធម៌របស់មនុស្សម្នាក់ៗ ព្រមទាំងព័ត៌មានអំពីអគារដែលកាន់កាប់ដោយគ្រួសារ ស្ថានភាពលំនៅដ្ឋាន និងសម្ភារៈប្រើប្រាស់នៅក្នុងគ្រួសារ ។ គោលបំណងនៃការធ្វើជំរឿននេះមានសារៈប្រយោជន៍ដល់វិស័យផ្សេងៗ គឺមិនត្រឹមតែសម្រាប់ការគ្រប់គ្រងរដ្ឋបាលប៉ុណ្ណោះទេ តែសម្រាប់ឲ្យរាជរដ្ឋាភិបាលព្យាករណ៍ធ្វើគោលនយោបាយប្រជាជន ធ្វើផែនការលំនៅដ្ឋាន ការកែលម្អសម្ភារៈប្រើប្រាស់សេដ្ឋកិច្ច ផែនការអភិវឌ្ឍន៍កាត់បន្ថយភាពក្រីក្រ រួមនឹងក្នុងជំនួញពាណិជ្ជកម្ម ឧស្សាហកម្ម និងវិស័យស្រាវជ្រាវខាងប្រជាជនជាដើម ។
សូមបញ្ជាក់ផងដែរថា ជំរឿនទូទៅប្រជាជនកម្ពុជាឆ្នាំ២០១៩ ត្រូវបានដឹកនាំធ្វើដោយអនុលោមតាមច្បាប់ស្ដីពីស្ថិតិ ខស/រកម/១២១៥/០៨១ ដែលចូលជាធរមាននៅថ្ងៃទី២៤ ខែធ្នូ ឆ្នាំ២០១៥ និងអនុលោមតាមអនុក្រិត្យលេខ អនក្រ.បក ចុះថ្ងៃទី២២ ខែឧសភា ឆ្នាំ២០១៧ ស្ដីពីការកំណត់កាលបរិច្ឆេទនៃការធ្វើជំរឿន គឺម៉ោងសូន្យថ្ងៃទី៣ ខែមីនា ឆ្នាំ២០១៩ ៕
ចែករំលែកព័តមាននេះ