រាជធានីភ្នំពេញ ៖ អគ្គីភ័យបានឆាបឆេះសិប្បកម្មផលិតចាន និងប្រអប់ស្នោរទាំងកណ្តាលថ្ងៃត្រង់ ខណៈដែលកម្មករហូបបាយវិលត្រឡប់ចូលទៅធ្វើការវិញ ដែលជាហេតុបង្កឲ្យមានការភ្ញាក់ផ្អើលយ៉ាងខ្លាំងហើយក្រុមកម្មករដែលបម្រើការងារនៅទីនោះបាននាំគ្នារត់ជាន់ជើងគ្នា ។ ហេតុការណ៏នេះបានកើតឡើងកាលពីវេលាម៉ោង១២និង១៥នាទីថ្ងៃត្រង់ ថ្ងៃទី២៤ ខែតុលា ឆ្នាំ២០១៨ ស្ថិតនៅក្នុងភូមិប្រកា សង្កាត់ព្រៃសប ខណ្ឌដង្កោ ។
តាមប្រភពព័ត៌មានបានឲ្យដឹងថា នៅមុនពេលកើតហេតុកម្មករបាននាំគ្នាចេញក្រៅហូបបាយអស់មិនមានអ្នកនៅក្នុងអគារសិប្បកម្មនោះឡើយ ។ លុះក្រោយពេលហូបបាយរួចកម្មករក៏បាននាំចូលទៅធ្វើការបណ្ដើរៗ ស្រាប់តែឮស្នូរផ្ទុះដូចគ្រាប់កាំភ្លើងហើយមិនយូរប៉ុន្មានស្រាប់តែមានការឆាបឆេះឡើងមានទាំងអណ្ដាតភ្លើង និងផ្សែងហុយពេញអគារតែម្ដង ។ ខណៈនោះបានបង្ក ឲ្យមានការភ្ញាក់ផ្អើលយ៉ាងខ្លាំង ហើយកម្មករបាននាំគ្នារត់ចេញមកវិញទាំងព្រលឹងចុងសក់ ។
ទាក់ទិនទៅនឹងហេតុការនោះដែរមិនមាននរណាម្នាក់បានដឹងឲ្យប្រាកដថា បានកើតឡើងដោយសារតែមូលហេតុអ្វីនោះឡើយ ។ ប៉ុន្តែត្រូវបានសង្ស័យទៅលើមូលហេតុ២យ៉ាងគឺទី១សង្ស័យទុស្សេចរន្តអគ្គីសនី និងទី២សង្ស័យផ្ទុះធុងហ្គាស ។
មិនតែប៉ុណ្ណោះក្រោយពីទទួលបានដំណឹងដ៏ភ្ញាក់ផ្អើលនោះកម្លាំងអាជ្ញាធរ និងសមត្ថកិច្ច ព្រមទាំងកងរាជអាវុធហត្ថខណ្ឌដង្កោបានចុះទៅអន្តរាគមន៍ភ្លាមៗ ដោយមានរថយន្តពន្លត់អគ្គីភ័យចំនួន១៤គ្រឿងចេញទៅបាញ់ពន្លត់ហើយជិតកន្លះម៉ោងក្រោយមកភ្លើងបានរលត់ទៅវិញទាំងស្រុង ។ ដោយឡែកទំហំនៃការខូចខាតនៅក្នុងហេតុការណ៍នេះនៅមិនទាន់ដឹងនៅឡើយទេ ៕
ចែករំលែកព័តមាននេះ