ខេត្តបាត់ដំបង ៖ ពិធីប្រណាំងទូកងបានប្រារព្ធធ្វើមានរយៈពេល២ថ្ងៃដើម្បីជ្រើសរើសយកទូកលេខ១ និងលេខ២ ទៅប្រណាំងក្នុងព្រះរាជពិធីបុណ្យអុំទូក អកអំបុក និងសំពះព្រះខែ នៅរាជធានីភ្នំពេញនាពេលខាងមុខ។
ក្នុងពិធីនេះដែរ ឃើញមានវត្តមានលោក ងួន រតនៈ គណៈអភិបាលខេត្តបាត់ដំបង និងលោកជំទាវ លោកឆាយ សារេត និងលោក សុខ គង់ អតីតអភិបាលខេត្ត ព្រមទាំងថ្នាក់ដឹកនាំ រួមនិងអាជ្ញាធរខេត្ត កងកម្លាំងប្រដាប់អាវុធនិងប្រជាពលរដ្ឋយ៉ាងច្រើនកុះករ និងមានការដាក់តាំងពិពរណ៍ទំនិញគ្រប់ប្រភេទ និងមានការការពារសន្តិសុខសណ្តាប់ដោយកម្លាំងប្រដាប់អាវុធចំនួន៨០០នាក់ ក្នុងកម្មវិធី។
គណៈកម្មការរៀបចំការប្រណាំងទូកនេះ បានឲ្យដឹងថា ទូកងដែលចូលរួមក្នុងការប្រកួតនេះមានចំនួនសរុប៣០ទូក ក្នុងនោះទូកងខ្នាតវែងចំនួន២៦ទូក និងទូកខ្នាតអន្តរជាតិចំនួន៤ទូក។
ទូកងត្រៀមប្រណាំងមាន៣០ទូក ស្មើ១៥គូ លើសឆ្នាំ២០១៧ចំនួន៤ទូក និងមានកីឡាករកីឡារិនីសរុប១,០៩០នាក់ ត្រៀមបំរុងជាង២០០នាក់ ចំណែកមានទូកងមិត្តភាពថៃចំនួន២ទូកមកចូលរួមប្រគួតផងដែរ ដើម្បីជ្រើសរើសយកលេខ១ និងលេខ២ទៅប្រណាំងក្នុងព្រះរាជពិធីបុណ្យអុំទូក អកអំបុក និងសំពះព្រះខែ នៅរាជធានីភ្នំពេញ។
សូមបញ្ជាក់ថា កម្មវិធីប្រណាំងនេះចាប់ផ្តើមនៅម៉ោង១រសៀលថ្ងៃទី២៣ តុលា ហើយគ្រោងនឹងបញ្ចប់នៅល្ងាចថ្ងៃទី២៤ តុលា នេះ សំរាប់ទូកដែលបានទទួលចំណាត់ថ្នាក់ពីលេខ១ដល់លេខ២ និងត្រូវជ្រើសរើសយកទៅប្រកួតនៅក្នុងកម្មវិធីបុណ្យអុំទូកថ្នាក់ជាតិនៅរាជធានីភ្នំពេញបន្តទៀត រីឯទូកដែលមិនទទួលបានចំណាត់ថ្នាក់ ក៏ទទួលបានរង្វាន់លើកទឹកចិត្តពីគណៈអធិបតីផងដែរ ៕
ចែករំលែកព័តមាននេះ