រាជធានីភ្នំពេញ ៖ «ម្តាយម្នាក់ចិញ្ចឹមកូនច្រើននាក់រស់ តែពេលខ្លះកូនច្រើននាក់ ចិញ្ចឹមម្តាយម្នាក់មិនរស់» គឺជាពាក្យដែលចាស់ៗបុរាណចូលចិត្តលើកយកមកនិយាយទូន្មានដល់កូនប្រុសស្រី ដើម្បីជាគំនិត និងការដាស់តឿន នៅពេលដែលម្តាយឪពុកចាស់ជរាទៅ ត្រូវការនូវការមើលថែ ការយកចិត្តទុកដាក់ និងភាពកក់ក្តៅពីកូនៗវិញ។
យ៉ាងណាមិញ បច្ចុប្បន្ននេះយុវវ័យមួយចំនួនប្រហែលមិនបានចាប់អារម្មណ៍ទៅលើពាក្យមួយឃ្លានេះទេ ដោយយល់ថា មានកូនឯណាចិញ្ចឹមម្តាយមិនរស់នោះ កូនតែម្នាក់ក៏ចិញ្ចឹមអ្នកម្តាយរស់ដែរ កុំថាឡើយដប់ ។ ហើយយើងរឹតតែមិនអាចប្រៀបធៀបបច្ចុប្បន្នភាពទៅនឹងសម័យមុន នៅពេលដែលមនុស្សខ្វះការយល់ដឹងច្រើនពីគុណបំណាច់អ្នកមានគុណ និងការតបស្នងសងគុណជូនពួកគាត់។ មិនដូចជាឥឡូវដែលកូនៗគ្រប់រូបតែងទទួលបានការដាស់តឿនប្រៀនប្រដៅមិនថា នៅក្នុងសាលារៀន រឺតាមរយៈវីដេអូអប់រំផ្សេងៗក្នុងបណ្តាញសង្គម។
ប៉ុន្តែបើងាកទៅមើលជ្រុងមួយផ្សេងទៀតឃើញថា ភាពមមាញឹកនឹងការសិក្សារៀនសូត្រ ការបំពេញការងារ ឬមុខជំនួញ ឬក្រុមគ្រួសារផ្ទាល់ខ្លួន ក៏ជាកត្តាមួយដែលធ្វើឲ្យអ្នកបានឃ្លាតឆ្ងាយពីអ្នកមានគុណដោយមិនដឹងខ្លូន ហើយនេះគឺជាដំណាក់កាលមួយដែលយើងគួរយកពាក្យចាស់បុរាណមកពិចារណា «ម្តាយម្នាក់ចិញ្ចឹមកូនច្រើននាក់រស់ តែពេលខ្លះកូនច្រើននាក់ ចិញ្ចឹមម្តាយម្នាក់មិនរស់» មកគិតឡើងវិញ។
និយាយដល់ចំណុចនេះវាហាក់ដូចជាស្មុគស្មាញបន្តិច ប៉ុន្តែរឿងទាំងអស់នេះពិតជាមានប្រាកដមែនក្នុងសង្គមសព្វថ្ងៃ។ ជាក់ស្តែងដូចជាពេលថ្មីៗនេះ ក្រុមហ៊ុនធានារ៉ាប់រងជីវិត អេ អាយ អេ ខេមបូឌា ទើបតែផលិតភាពយន្តខ្នាតខ្លីមួយ ដែលមានចំណងជើងថា ក្តីសង្ឃឹម ឬហៅជាភាសាអង់គ្លេសថា HOPE បង្ហាញពីអ្នកម្តាយមួយរូប មានកូនស្រី ២ នាក់ និងកូនប្រុសម្នាក់ ក្នុងនោះក៏មានចៅស្រីមួយរូបផងដែរ។
ដើម្បីជាសារជូនដល់អ្នកទស្សនាគ្រប់រូប ឲ្យមានការយកចិត្តទុកដាក់ឡើងវីញទៅលើការធ្វេសប្រហែសរបស់អ្នកមួយចំនួន ព្រោះតែរវល់នឹងការងារពេក មិនបានគិតថាសុខទុក្ខអ្នកម្តាយ ហើយនាំគ្នាគិតថាវាមិនអីៗ រហូតអ្នកមិនបានដឹងថា វាជាកំហុសដោយអចេតនាមួយដែលអ្នកបានបណ្តោយឲ្យអ្នកម្តាយមួយរូបដែលបានបង្កើត ស្រលាញ់ថ្នាក់ថ្នម និងចិញ្ចឹមអ្នកឲ្យធំដឹងក្តីត្រូវរស់នៅឯកកោ សូម្បីតែពេលអាហារជុំគ្រួសារក៏ពិបាកនឹងបានញុំជុំគ្នា ។
តាមរយៈខ្សែវីដេអូអប់រំមួយនេះ បានបង្ហាញពីបេះដូងដ៏កក់ក្តៅរបស់ម្តាយ ដែលនៅតែបារម្ភពីកូនរបស់គាត់ ទោះបីជាពួកគេចម្រើនពេញវ័យ ហើយកូនស្រីច្បងមានគ្រួសារហើយបានបង្កើតចៅស្រីមួយរូបសម្រាប់អ្នកម្តាយវ័យចាស់មួយរូបនេះ។ ពេលបង្កើតកូនៗ អ្នកម្តាយត្រូវមើលថែកូនៗទាំង ៣ រហូតចម្រើនវ័យមានគ្រួសារ លុះពេលគាត់ចាស់ទៅ នៅតែមើលថែកូន ហើយថែមទាំងមើលថែចៅស្រីទៀត។
អ្នកម្តាយតែងភិតភ័យនៅពេលចៅកំពូលរពឹសលេងមិនឈប់ ហើយក៏ដួលត្រូវរបួសថ្ងាស់តិចតួច ខណៈកូនស្រីដែលជាម្តាយនាងតូចបែរជាប្រើសម្តីគម្រោះគម្រើយដាក់អ្នកមានគុណ ។ ខំមើលថែចៅហើយ បែរជាត្រូវកូនស្រីសំណព្វចិត្តស្តីបន្ទោសទៀតផង តែទឹកចិត្តអ្នកម្តាយនៅតែទូលាយនឹងមិនតបខឹងកូនស្រីឡើយ ។
ចំណែកកូនពីរនាក់ទៀតដែលមិនទាន់មានគ្រួសារ គាត់នៅតែបារម្ភពីសុវត្ថិភាពពួកគេ រហូតធ្វើឲ្យពួកគេយល់ថា ម្តាយមិនទុកចិត្ត និងស្រលាញ់កូនមិនស្មើរគ្នាទៀតផង។ រហូតថ្ងៃមួយម្តាយធ្លាក់ខ្លួនឈឺត្រូវចូលពេទ្យជាបន្ទាន់ ទើបពួកគេដឹងថាកន្លងមកអ្នកម្តាយដ៏រឹងមាំម្នាក់នេះ តែងកុហកថាខ្លួនឯងមិនអី ប្រើពេលវេលាមួយជីវិតគិតពីកូន តែកូនៗនៅមិនទាន់មានអ្វីដែលត្រៀមទុកសម្រាប់ជីវិតគាត់នោះទេ។
ពិតណាស់ មនុស្សម្នាក់ៗគឺកំពុងតែមានគោលដៅជីវិតរៀងៗខ្លួន។ អ្នកបានកំណត់គោលដៅខ្លួនឯងរួចរាល់ហើយថា ចាប់ពីឆ្នាំនេះដល់ឆ្នាំនេះអ្នកនឹងធ្វើអ្វី ប្រកបការងារអ្វី រស់នៅបែបណា ហើយមានគ្រួសារយ៉ាងដូចម្តេច។ ប៉ុន្តែតើអ្នកមានបានរៀបចំគម្រោងសម្រាប់អ្នកមានគុណទាំងពីររបស់អ្នកហើយ ឬនៅ? កុំឲ្យដូចពាក្យចាស់ថា «ម្តាយម្នាក់ចិញ្ចឹមកូនដប់អ្នករស់ តែពេលខ្លះកូនដប់អ្នកចិញ្ចឹមម្តាយម្នាក់មិនរស់»៕ ដោយសហការ
https://www.facebook.com/KohSantepheapTV/videos/719980598359439/
ចែករំលែកព័តមាននេះ