ខេត្តរតនគីរី ៖ ដាំបាយមិនពន្លត់ភ្លើងចង្ក្រាន បណ្តាលឱ្យភ្លើងឆេះផ្ទះ ដែលហេតុការណ៍នេះបានកើតឡើងកាលពីវេលាម៉ោង៧នាទីយប់ថ្ងៃទី២០ ខែតុលា ឆ្នាំ២០១៨ ស្ថិតនៅភូមិតាវែង ឃុំតាវែងលើស្រុកតាវែង ។
បើតាមរបាយការណ៏ររបស់សមត្ថកិច្ចមូលដ្ឋានបានអោយដឹងថា ម្ចាស់ផ្ទះជាប្តីឈ្មោះដូន តៀម អាយុ៦៣ឆ្នាំ និងប្រពន្ធឈ្មោះដែង ទឿយ អាយុ៦៣ឆ្នាំ ជនជាតិខ្មែរកាត់ឡាវ មានមុខរបរកសិករ ។
ផ្ទះដែលត្រូវភ្លើងឆេះមានទទឹង៦ម៉ែត្រ និងបណ្ដោយ៧ម៉ែត្រ ប្រក់សង្ក័សី ជញ្ជាំងបាំងក្ដារ ហើយទ្រព្យសម្បត្តិដែលរងការខូចខាតរូមមាន ម៉ូតូ១គ្រឿង ប្រាក់រៀលចំនួន៣៥ម៉ឺនរៀល អង្ករ២បេ ពាងស្រាចំនួន៦ពាង និងសម្ភារនៅក្នុងផ្ទះដូចជាមុងភួយចានឆ្នាំងបានរងការខូចខាតទាំងអស់។
ក្នុងករណីខាងលើ កម្លាំងសមត្ថកិច្ចមូលដ្ឋានបានចុះទៅដល់កន្លែងកើតហេតុ និងសាកសួរម្ចាស់ផ្ទះពីហេតុការណ៍ខាងលើ។
ម្ចាស់ផ្ទះរងគ្រោះបានរៀបរាប់ប្រាប់សមត្ថកិច្ចថា នៅមុនពេលកើតហេតុ គាត់បានដាំបាយដោយដុតអុស ហើយបានវេចបាយយកទៅហូបនៅចំការមួយទៀតមានចំងាយ៧០០ទៅ៨០០ម៉ែត្រ មុននឹងចេញដំណើរ គាត់ភ្លេចពន្លត់ភ្លើងចង្ក្រាន ទើបបណ្ដាលអោយមានភ្លើងឆេះផ្ទះបែបនេះតែម្ដង បើតាមការត្រួតពិនិត្យរបស់សមត្ថកិច្ចនៅជុំវិញចង្ក្រាន ដែលមានជញ្ចាំងបាំងស្លឹកចាកព្រៃ ហើយនៅពេលមានខ្យល់បក់កំទេចភ្លើងហើរ បណ្ដាលអោយឆេះផ្ទះតែម្ដង ៕
ចែករំលែកព័តមាននេះ