រាជធានីភ្នំពេញ ៖ បន្ទាប់ពីបានបញ្ចប់នូវដំណើរនៃការអញ្ជើញបំពេញទស្សនកិច្ចការងារជាប្រវត្តិសាស្ត្រ នៅទីក្រុងអីស្តានប៊ុលសាធារណរដ្ឋតួកគី ប្រកបដោយលទ្ធផលដ៏ត្រចះត្រចង់រយៈពេល២ថ្ងៃរួចមក នៅព្រឹកព្រលឹមថ្ងៃទី២២ ខែតុលា ឆ្នាំ២០១៨ សម្តេចអគ្គមហាសេនាបតីតេជោ ហ៊ុន…
រាជធានីភ្នំពេញ ៖ បន្ទាប់ពីបានបញ្ចប់នូវដំណើរនៃការអញ្ជើញបំពេញទស្សនកិច្ចការងារជាប្រវត្តិសាស្ត្រ នៅទីក្រុងអីស្តានប៊ុលសាធារណរដ្ឋតួកគី ប្រកបដោយលទ្ធផលដ៏ត្រចះត្រចង់រយៈពេល២ថ្ងៃរួចមក នៅព្រឹកព្រលឹមថ្ងៃទី២២ ខែតុលា ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជាបានអញ្ជើញធ្វើដំណើរចាកចេញពីទីក្រុងអីស្តានប៊ុលសាធារណរដ្ឋតួកគី ។
ក្នុងដំណើរនៃការអញ្ជើញចូលរួមកិច្ចប្រជុំកំពូលអ្នកដឹកនាំវិនិយោគសាកលនៃវេទិកាវិនិយោគពិភពលោក ឆ្នាំ២០១៨ របស់សន្និសីទសហប្រជាជាតិស្តីពីពាណិជ្ជកម្ម និងការអភិវឌ្ឍន៍នៅទីស្នាក់ការរបស់អង្គការសហប្រជាជាតិប្រចាំទីក្រុងហ្សឺណែវប្រទេសស្វីស ដោយសុវត្ថិភាព ។ នៅអាកាសយានអន្តជាតិអាតាទួក ទីក្រុងអីស្តានប៊ុល វត្តមាននៃការអញ្ជើញជូនដំណើរសម្តេចតេជោនាយករដ្ឋមន្ត្រី និងគណៈប្រតិភូជាន់ខ្ពស់រាជរដ្ឋាភិបាលកម្ពុជារួមមានឯកឧត្តមអភិបាលក្រុងអីស្តានប៊ុលប្រមុខយោធាតួកគីអគ្គនាយកនៃក្រសួងការបរទេសតួកគី និងលោកជំទាវឯកអគ្គរាជទូតតួកគីប្រចាំព្រះរាជាណាចក្រកម្ពុជាព្រមទាំងឯកឧត្តមលោកជំទាវ ជាឥស្សរជនជាន់ខ្ពស់ រដ្ឋាភិបាលតួកគី និងឥស្សរជនការទូត របស់ព្រះរាជាណាចក្រកម្ពុជា ប្រចាំប្រទេសតួកគីជាច្រើនរូប ។
វត្តមាននៃការអញ្ជើញដល់របស់សម្តេចតេជោនាយករដ្ឋមន្ត្រី និងគណៈប្រតិភូជាន់ខ្ពស់ត្រូវបានការធ្វើគារវកិច្ចស្វាគមន៍យ៉ាងស្និទ្ធស្នាលរាក់ទាក់បំផុតពីឯកឧត្តមលោកជំទាវតំណាងអង្គការសហប្រជាជាតិប្រចាំហ្សឺណែវប្រទេសស្វីស ឯកអគ្គរាជទូតអចិន្រៃ្តយ៍របស់ព្រះរាជាណាចក្រកម្ពុជាប្រចាំហ្សឺណែវប្រទេសស្វីសព្រមទាំងវត្តមានឯកឧត្តមលោកជំទាវជាឥស្សរជនជាន់ខ្ពស់របស់អង្គការសហប្រជាជាតិ និងឥស្សរជនការទូតរបស់ព្រះរាជាណាចក្រកម្ពុជាប្រចាំហ្សឺណែវប្រទេសស្វីសជាច្រើនរូប ។
សូមបញ្ជាក់ដែរថា នៅសណ្ឋាគារស្នាក់អាស្រ័យរបស់សម្តេចតេជោនាយករដ្ឋមន្ត្រីក្នុងទីក្រុងហ្សឺណែវប្រទេសស្វីសវត្តមាននៃការអញ្ជើញដល់របស់សម្តេចតេជោនាយករដ្ឋមន្ត្រីត្រូវបានទទួលនូវការធ្វើគារវកិច្ចស្វាគមន៍យ៉ាងកក់ក្តៅ និងស្និទ្ធស្នាលបំផុតពីសំណាក់ប្រជាពលរដ្ឋ មកពីទីជិតឆ្ងាយក្នុងទីក្រុងហ្សឺណែវ និងតំបន់មួយចំនួនទៀតក្នុងប្រទេសស្វីសក៏ដូចជា នៅតំបន់អឺរ៉ុបទាំងមូល ដែលបានបង្ហាញពីការគោរពស្រឡាញ់យ៉ាងអស់ពីដួងចិត្ត និងការដឹងគុណពិតៗជូនចំពោះសម្តេចតេជោនាយករដ្ឋមន្ត្រីដែលជាមគ្គុទេសក៏ដឹកនាំប្រកបដោយបញ្ញាញាណឈ្លាសវៃ ក្នុងការរំដោះប្រទេសជាតិប្រជាជនកម្ពុជា និងការពុះពារនូវរាល់ការលំបាកគ្រប់បែបយ៉ាងក្នុងការដឹកនាំប្រទេសជាតិទទួលបាននូវសុខសន្តិភាពយ៉ាងពេញលេញ ពិសេសដឹកនាំស្តារ និងអភិវឌ្ឍន៍ប្រទេសមានការរីកចម្រើនលើគ្រប់វិស័យចាប់តាំងពីទីក្រុង រហូតដល់ជនបទ ៕
ចែករំលែកព័តមាននេះ