រាជធានីភ្នំពេញ៖ តារាចម្រៀងហ៊ុន ម៉ាលីស ទទួលរ៉ាប់រងជួយដោះស្រាយបញ្ហាគ្រួសារយ៉ាងលំបាក ។ ក្នុងស្ថានភាពបែបនេះនាងតាំងជំហរតស៊ូជម្នះទៅមុខទៀតដើម្បីស្ទួយជីវិតខ្លួនឯងផង និងគ្រួសារផង ។
កញ្ញាហ៊ុន ម៉ាលីស គឺជាអតីតបេក្ខនារីឆ្នើមមួយដួងក្នុងកម្មវិធីប្រឡងចម្រៀង«សំនៀងឯក»របស់ទូរទស្សន៍បាយ័ន ។ នាងចូលដល់វគ្គផ្សាយបន្តផ្ទាល់ ហើយមានឱកាសជាប់រហូតនៅសល់បេក្ខជនក្នុងក្រុម៤នាក់។ ម៉ាលីស មានសំឡេងពីរោះ។ ទន្ទឹមពេលប្រឡងនោះនាងច្រៀងតាមភោជនីយដ្ឋានដោះដូរយកប្រាក់ជួយម្តាយ និងប្អូនស្រី២នាក់ទៀត ។
តាំងពីមានវត្តចូលរួមប្រឡងកម្មវិធីធំមក ហ៊ុន ម៉ាលីស មានឱកាសធ្វើឲ្យគេស្គាល់រហូតទទួលបានតម្លៃទីផ្សារសិល្បៈកើនជាងមុន មានឈ្មោះរឹតតែប្រសើរឡើង ។ ក្នុងស្ថានភាពបែបនេះនាងមានប្រាក់កម្រៃកើនបន្តិចជួយអ្នកផ្ទះ ។
កាលពីពេល ថ្មីៗកន្លងមកហ៊ុន ម៉ាលីស និយាយថា«រាល់ថ្ងៃនេះសិល្បៈបានគេស្គាល់ក្រោយពីប្រឡងចម្រៀង«សំនៀងឯក»ធ្វើឲ្យនាងខ្ញុំមានឱកាសដើររកកន្លែងច្រៀងជាកន្លែងច្រៀងធំៗមានការនិយមមកកម្សាន្តមួយ ឬពីរកន្លែងដែរ ។ បើពីមុនច្រៀងកន្លែង ល្មមៗប្រាក់កម្រៃបានតាមហ្នឹង តែពេលនេះគ្រាន់បន្តិច ។ ទោះជាយ៉ាងណាក្តីថ្ងៃមុខពិបាកសល់លុយ ព្រោះបន្ទុកច្រើន ពោលឡើងថាពេលនេះដូចជាមានបន្ទុកច្រើនជាងមុន ដោយសារតែឆ្នាំនេះប្អូនស្រីម្នាក់រៀនចូលដល់ឆ្នាំប្រឡងបាក់ឌុបហើយប្អូនមួយទៀតរៀនថ្នាក់អនុវិទ្យាល័យពេញដោយការចំណាយ ។ ម៉្លោះហើយរាល់ការប្រើថវិកាខ្ជះខ្ជាយអ្វីផ្តេសផ្តាសគឺមិនត្រូវឲ្យមានច្រើន ។
នាងខ្ញុំមិនទាន់មានផ្ទះផ្ទាល់ខ្លួនទេ នៅផ្ទះជួល ហើយមួយថ្ងៃហោចបំផុតប្រើការចាយវាយ៤ម៉ឺនរៀល ។ កុំតែបានធ្វើការ២ទៅ៣កន្លែងច្បាស់ណាស់ទប់មិនឈ្នះឡើយ ។ សូម្បីម៉ូតូសុខចិត្តជិះកូនទាដើរច្រៀងយប់ អត់ហ៊ានដូររបស់ទំនើបនោះទេ ឲ្យតែបានសល់លុយជួយអ្នកម្តាយ និង ប្អូនៗ ។
ហ៊ុន ម៉ាលីស សង្ឃឹមថាក្រៅពីច្រៀងតាមភោជនីយដ្ឋាននាពេលរាត្រី នាងពិតជាមិនត្រូវបានអ្នកដឹកនាំកម្មវិធីសិល្បៈតាមកញ្ចក់ទូរទស្សន៍នានាមើលរំលងទេ ព្រោះជាចំណែកមួយជួយឱ្យនាងកាន់តែបង្កើនប្រាក់ចំណូលយឹតយោងក្រុមគ្រួសារ និងលូតលាស់កេរ្តិ៍ឈ្មោះ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ