រាជធានីភ្នំពេញ ៖ បឹងសំរោងជាបឹងធម្មជាតិ ស្ថិតនៅក្នុងសង្កាត់ព្រែកព្នៅ និងសង្កាត់សំរោងខណ្ឌព្រែកព្នៅត្រូវបានប្រជាពលរដ្ឋដែលភាគច្រើនជាអ្នកមានអំណាច និងមានលុយបាននាំគ្នារំលោកយក ត្រូវបានសាលារាជធានីភ្នំពេញបង្កើតគណៈកម្មការចុះទៅវាស់វែងកំណត់ផ្ទៃបឹង និងបោះបង្គោលកំណត់ព្រំដីបឹងទៅតាមអនុក្រិត្យរបស់រាជរដ្ឋាភិបាលរួចរាល់ហើយ ។ ដំណើរកាលបានបញ្ចប់នៅថ្ងៃទី១៩…
រាជធានីភ្នំពេញ ៖ បឹងសំរោងជាបឹងធម្មជាតិ ស្ថិតនៅក្នុងសង្កាត់ព្រែកព្នៅ និងសង្កាត់សំរោងខណ្ឌព្រែកព្នៅត្រូវបានប្រជាពលរដ្ឋដែលភាគច្រើនជាអ្នកមានអំណាច និងមានលុយបាននាំគ្នារំលោកយក ត្រូវបានសាលារាជធានីភ្នំពេញបង្កើតគណៈកម្មការចុះទៅវាស់វែងកំណត់ផ្ទៃបឹង និងបោះបង្គោលកំណត់ព្រំដីបឹងទៅតាមអនុក្រិត្យរបស់រាជរដ្ឋាភិបាលរួចរាល់ហើយ ។
ដំណើរកាលបានបញ្ចប់នៅថ្ងៃទី១៩ ខែតុលា ឆ្នាំ២០១៨ ក្រោមការដឹកនាំដោយលោកស៊ឹម សុផង់ នាយករដ្ឋបាលខណ្ឌព្រែកព្នៅ ។ អ្វីដែលមានការចាប់អារម្មណ៍នៅក្នុងដំណើរការបោះបង្គោលគណៈកម្មការមានការលំបាកដោយមានអ្នកមានអំណាចមួយចំនួនដែលបានទន្ទ្រានកាន់កាប់ផ្ទៃបឹងមិនបានសហការណ៍ និងបានរារ៉ាំងដូចជា នៅព្រឹកថ្ងៃទី១៨ ខែតុលានេះ ត្រូវបានលោកឈឹម សារ៉េត ថ្នាក់ប្រធាននាយកដ្ឋានមួយនៃក្រសួងសេដ្ឋកិច្ច និងហិរញ្ញាវត្ថុបានចាក់សោទ្វាររបងមិនអនុញ្ញាតិឲ្យមន្ត្រីជំនាញចូលទៅបោះបង្គោលឡើយ ។
តាមលោកស៊ឹម សុផង់ បានឲ្យដឹងថា សាលារាជធានីភ្នំពេញបានបង្កើតគណៈកម្មការចម្រុះ រួមមានមន្ទីរធនធានទឹករាជធានីភ្នំពេញមន្ទីររៀបចំដែនដីនគររូបនីយ៍កម្ម និងសំណង់រាជធានីភ្នំពេញ រដ្ឋបាលខណ្ឌព្រែកព្នៅសង្កាត់ និងកងកម្លាំងសមត្ថកិច្ច ដើម្បីចុះវាសវែងបោះបង្គោលកំណត់ព្រំដីបឹងសំរោង ទំហំ៣៣៦ហិកតាតាមអនុក្រឹត្យរបស់រាជរដ្ឋាភិបាល ។
លោកនាយករដ្ឋបាលបានឲ្យដឹងទៀតថា គណៈកម្មការចម្រុះបានទទួលផែនការចុះវាស់វែង និងបោះបង្គោលកំណត់ព្រំបឹងសំរោងនោះតាំងពីថ្ងៃទី១៤ ខែកញ្ញា ឆ្នាំ២០១៨ ដោយបង្គោលចំនួន៤៨បង្គោល ហើយមកដល់ថ្ងៃទី១៩ ខែតុលា ឆ្នាំ២០១៨ គណៈកម្មការបោះបង្គលបានបញ្ចប់ហើយ ។ នៅក្នុងការបោះបង្គោលកំណត់ព្រំបឹងតាមអនុក្រឹត្យនេះគណៈកម្មការមានការលំបាក់ និងមានការយឺតយ៉ាវ ដោយសាតែផ្ទៃបឹងមួយចំនួនត្រូវបានគេទន្ទ្រានកាន់កាប់ ហើយនៅពេលដែលគណៈកម្មការចុះទៅវាស់វែងក៏ត្រូវបានរារាំងផងដែរ ។
គួរបញ្ជាក់ថា បឹងសំរោង ជាបឹងមួយមានវិសាលភាព ស្ថិតនៅតាមបណ្តោយផ្លូវជាតិលេខ៥ ពីមុខស្ថិតនៅក្នុងឃុំសំរោង និងឃុំព្រែកព្នៅ ស្រុកពញាឮ ខេត្តកណ្តាល ក្រោយមកត្រូវបានកាត់ចូលក្នុងដែនដីរដ្ឋបាលខណ្ឌព្រែកព្នៅរាជធានីភ្នំពេញ ។ បឹងនេះត្រូវបានប្រជាពលរដ្ឋនាំគ្នាទន្ទ្រានកាន់កាប់ ដោយបោះបង្គោល និងលក់តៗគ្នាខ្លះទៀតបានវាយទីយកធ្វើជាស្រះចិញ្ចឹមត្រី និងចាក់ដីលក់រំលោភយកធ្វើជាកម្មសិទ្ធិ ។
ទន្ទឹមនោះនៅឆ្នាំ២០០៨ រាជរដ្ឋាភិបាលក៏បានចេញអនុក្រឹត្យកំណត់ផ្ទៃបឹង សរុបចំនួន៣៣៦ហិតតា ដើម្បីការពារជាទ្រព្យសម្បត្តិសាធារណៈ ខណៈពេលផ្ទៃបឹងមួយចំនួនត្រូវបានរំលោភកាន់កាប់យកស្ទើរអស់ទៅហើយនោះ៕
ចែករំលែកព័តមាននេះ