រាជធានីភ្នំពេញ ៖ អតីតតារាសម្តែងនាទស្សវត្សន៍ឆ្នាំ៩០ លោក យស បូវណ្ណៈ គ្រោងនឹងវិលមកថតកុននៅស្រុកខ្មែរជាថ្មី បន្ទាប់ពីលោកបានឃ្លាតឆ្ងាយពីអាជីពមួយនេះ ហើយបានផ្ញើជីវិតនៅលើទឹកដីប្រទេសទី២អស់ជាច្រើនឆ្នាំមកនេះ។ បើមិនមានការប្រែប្រួលទេនោះ…
រាជធានីភ្នំពេញ ៖ អតីតតារាសម្តែងនាទស្សវត្សន៍ឆ្នាំ៩០ លោក យស បូវណ្ណៈ គ្រោងនឹងវិលមកថតកុននៅស្រុកខ្មែរជាថ្មី បន្ទាប់ពីលោកបានឃ្លាតឆ្ងាយពីអាជីពមួយនេះ ហើយបានផ្ញើជីវិតនៅលើទឹកដីប្រទេសទី២អស់ជាច្រើនឆ្នាំមកនេះ។ បើមិនមានការប្រែប្រួលទេនោះ លោក យស បូវណ្ណៈ និងធ្វើដំណើរពីសហរដ្ឋអាមេរិកមកកាន់ប្រទេសកម្ពុជា នៅក្នុងអំឡុងដើមខែធ្នូខាងមុខនេះ តបការអញ្ជើញឲ្យថតខ្សែភាពយន្តពីម្ចាស់ផលិតកម្មមួយនៅក្នុងស្រុក។
អ្នកស្រី លី ស៊ីថារី ភរិយារបស់លោក យស បូវណ្ណៈ បានអះអាងប្រាប់កោះសន្តិភាពតាមសារអេឡិចត្រូនិចថា លោក យស បូវណ្ណៈ គ្រោងនឹងធ្វើដំណើរទៅប្រទេសកម្ពុជាក្នុងអំឡុងខែធ្នូខាងមុខនេះ ដើម្បីថតខ្សែភាពយន្តខ្នាតធំមួយរបស់ផលិតកម្មមហាហង្ស។
អ្នកស្រីបញ្ជាក់ថា ចៅកែផលិតកម្មបានធ្វើដំណើរមកជួបរូបលោកនៅសហរដ្ឋអាមេរិកកាលពីពេលថ្មីៗនេះ ហើយបានស្នើឲ្យលោកចូលរួមសម្តែងភាពយន្តជាថ្មី ដើម្បីឆ្លើយតបពីសំណាក់ទស្សនិកជនចង់ឃើញវត្តមានសម្តែងរបស់លោក។ ឆ
លើយតបទៅនឹងបញ្ហានេះលោក យស បូវណ្ណៈ ក៏សម្រេចនឹងចូលរួមថតខ្សែភាពយន្តនេះតាមការស្នើសុំ ព្រោះការថតនេះមានរយៈពេលខ្លី និងមិនប៉ះពាល់ការងាររបស់លោកនៅអាមេរិកនោះឡើយ។
បើតាមអ្នកស្រី លី ស៊ីថារី បន្តថា ការដែលលោក យស បូវណ្ណៈ សម្រេចទទួលយកការថតនោះ គឺលោកបានគិតជាយូរ ព្រោះកន្លងមកមានបណ្តាលផលិតកម្មនានាជាច្រើនក៏មានបំណងហៅលោកឲ្យចូលរួសម្តែងផងដែរ តែលោកមិនទទួលយកដោយសារការថតនោះមានរយៈពេលយូរ ខ្លាចប៉ះពាល់ការងារនៅទីនេះ ប៉ុន្តែសម្រាប់ការថតឲ្យមហាហង្សនាពេលនេះគឺមានរយៈពេលដែល២សប្តាហ៍ប៉ុណ្ណោះ។
លោកស្រី លី ស៊ីថារី បន្តទៀតថា ឈរលើមូលហេតុនេះបានជាលោកសម្រេចចិត្តទទួលការថត ម្យ៉ាងលោកក៏មានបំណងចង់ចូលរួមប្រឡូកក្នុងវិស័យសិល្បៈភាពយន្តនេះជាថ្មីឡើងវិញផងដែរ បើទោះបីជាពេលនេះលោកមានវ័យកាន់តែជ្រេរបន្តិចក៏ដោយ។
អតីតតារាភាពយន្តលោក យស បូវណ្ណៈ កន្លងមកធ្លាប់បង្ហាញអារម្មណ៍ចង់វិលមកចូលរួមសម្តែងភាពជាថ្មីនេះដែរ បើទោះបីជាពេលនេះលោកកំពុងសាងជីវិតគ្រួសារនៅលើទឹកដីអាមេរិកក៏ដោយ ។ ថ្វីដ្បិតតែមិនទាន់មានឱកាសដូចតារាសម្តែងរួមជំនាន់អ្នកនាង អម្ពរ ទេវី ដែលបានវិលមកចូលរួមសម្តែងជាថ្មីឡើងក៏ដោយ ប៉ុន្តែលោកយស បូវណ្ណៈ ហាក់មិនទៅណាឆ្ងាយពីវិស័យសិល្បៈដែរ រស់នៅលើទឹកដីអាមេរិកនោះទេ ។
តាមរយៈហ្វេសប៊ុករបស់ខ្លួន លោក យស បូវណ្ណៈ តែងតែបង្ហោះពីសកម្មភាពនៃការច្រៀងរាំ សម្តែងជាបន្តបន្ទាប់ស្ទើរមិនដាច់សូរជាមួយនឹងអ្នកសិល្បៈចាស់ៗមួយចំនួនទៀត ដូចជាអ្នកនាង អ៊ុំ សុវណ្ណនី លោកសុវណ្ណ មុន្នី ជាដើម ។ លោក យស បូវណ្ណៈ ធ្លាប់អះអាងថា លោកមានបំណងចូលសម្តែងភាពយន្តជាថ្មីឡើងវិញ បើទោះបីជាការសម្តែងនោះអាចត្រឹមជាតួឪពុកក៏ដោយ ។
ក្នុងនាមជាអតីតារាភាពយន្តខ្មែរដែលទទួលបានកិត្តិនាម និងមានការគាំទ្រពីមហាជនលោកយស បូវណ្ណៈ នៅតែមានបំណងចូលរួមថតកុនជាថ្មី ។ ប្រសិនបើទៅថ្ងៃខាងមុខមានការស្នើសុំពីម្ចាស់ផលិតកម្មណាមួយនៅក្នុងប្រទេសកម្ពុជា គឺលោកនឹងត្រៀមខ្លួនស្វាគមន៍ចំពោះការវិលចូលរួមសម្តែងជាថ្មីឡើងវិញ បើទោះបីត្រូវសម្តែងជាតួអង្គបែបចាស់ទុំក៏ដោយ។
លោកយស បូវណ្ណៈ បានថ្លែងការកោតសរសើរចំពោះការរីកចម្រើនជាបន្តបន្ទាប់នៃសិល្បៈភាពយន្តខ្មែរ ហើយបានជំរុញចិត្តឲ្យលោកមានបំណងវិលមកចូលរួមសម្តែងជាថ្មីឡើងវិញ ប្រសិនបើមានឱកាស៕
ចែករំលែកព័តមាននេះ