ខេត្តព្រះវិហារ ៖ ក្រោយពេលម្តាយបញ្ជូនទៅសង្គ្រោះនៅមណ្ឌលសុខភាពក្មេងប្រុសម្នាក់រស់នៅភូមិស្រយ៉ង់ជើង ឃុំស្រយ៉ង់ ស្រុកគូលែន ខេត្តព្រះវិហារបានស្លាប់បាត់ទៅហើយម្តាយបានអះអាងថា មុនកើតហេតុកូនប្រុសរបស់គាត់ដែលមានអាយុទើបតែ១៨ខែនេះបានបរិភោគនំកញ្ចប់ប្រភេទខុកគីក្រេមសុគូឡាអស់៤កញ្ចប់ និងទឹកក្រូចដបជ័រ១ដប កាលពីរសៀលថ្ងៃទី១៨ ខែតុលា ឆ្នាំ២០១៨កន្លងទៅនេះ។
បើយោងតាមការឲ្យដឹងពីម្តាយក្មេងប្រុសរងគ្រោះរស់នៅភូមិឃុំកើតហេតុខាងលើបានរៀបរាប់ថា មុននឹងឈានដល់ការកើតហេតុ បណ្តាលឲ្យកូនរបស់គាត់ឈ្មោះ ហៃ វ៉ាន់ឆាយ អាយុ១៨ខែស្លាប់នោះ មុនដំបូងរូបគាត់ជាម្តាយបានទិញនំពីផ្សារយកមកឲ្យកូនរបស់គាត់បរិភោគអស់នំខុកគី ក្រេមសុគូឡា៤កញ្ចប់ និងទឹកក្រូចដបជ័រដែលមានឈ្មោះ សាណាំភឹង អស់១ដប ក្រោយពេលបរិភោគរួចកូនរបស់គាត់បានរត់លេងធម្មតារហូតដល់៣០នាទីក្រោយមក កូនប្រុសរបស់គាត់ចាប់ផ្តើមបញ្ចេញអាការៈបែកពពុះមាត់ទន់ខ្លួនតែម្តង ដោយមិនដឹងមូលហេតុ ។
ម្តាយក្មេងរងគ្រោះបានបន្តថា ក្រោយឃើញអាការៈបែបនេះរូបគាត់ក៏បានប្រញាប់នាំកូនទៅកាន់មណ្ឌលសុខភាពកោះកែរ ឋិតក្នុងឃុំស្រយ៉ង់ ស្រុកគូលែនភ្លាម ដើម្បីធ្វើការសង្គ្រោះតែជាអកុសលកូនរបស់គាត់បានបាត់បង់ជីវិតទៅហើយ ។
ទាក់ទិននឹងករណីនេះលោកឧត្តមសេនីយ៍ត្រី ឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្តព្រះវិហារក៏បានឲ្យដឹងថា មកដល់ពេលនេះសមត្ថកិច្ចមិនទាន់អាចសន្និដ្ឋានបានថា ការស្លាប់របស់ក្មេងប្រុសរងគ្រោះខាងលើនេះបណ្តាលមកពីពុលនំឲ្យប្រាកដ១០០%នោះទេ ដោយសារតែមិនទាន់បានធ្វើកោសល្យវិច្ច័យទៅលើនំ និងទឹកក្រូចនៅឡើយទេដោយលោកបញ្ជាក់ថា សមត្ថកិច្ចបានប្រមូលនំ និងទឹកក្រូចដែលនៅសល់នោះរក្សាទុកឲ្យជំនាញកាំកុងត្រូលសម្រាប់ធ្វើកោសល្យវិច្ច័យឲ្យបានច្បាស់លាស់ ។ មកដល់ពេលនេះសពក្មេងប្រុសរងគ្រោះអាណាព្យាបាលបានយកមកធ្វើបុណ្យនៅលំនៅឋាន កើតហេតុតាមប្រពៃណី ៕
ចែករំលែកព័តមាននេះ