រាជធានីភ្នំពេញ ៖ អ្នកចូលចិត្តសើច ឬចង់បំបាត់ភាពស្ត្រេស មួហ្មង ភាពយន្តថ្មីមួយត្រៀមខ្លួនធ្វើឲ្យអ្នកបានសើចក្អាកក្អាយ សប្បាយក្នុងអារម្មណ៍ ។ នោះគឺភាពយន្តកំប្លែងរឿង «បន្តោងឆ្នាំងដី»…
រាជធានីភ្នំពេញ ៖ អ្នកចូលចិត្តសើច ឬចង់បំបាត់ភាពស្ត្រេស មួហ្មង ភាពយន្តថ្មីមួយត្រៀមខ្លួនធ្វើឲ្យអ្នកបានសើចក្អាកក្អាយ សប្បាយក្នុងអារម្មណ៍ ។ នោះគឺភាពយន្តកំប្លែងរឿង «បន្តោងឆ្នាំងដី» ។
ផលិតឡើងក្រោមការសម្រិតសម្រាំងពីកវីល្បីឈ្មោះសុខ ជំនោរ និងនាយពែកមី អស់រយៈពេលជាង១ឆ្នាំ ជ្រកក្រោមផលិតកម្ម«សិល្បៈខ្មែរភាពយន្ត» ចន ច័ន្ទលក្ខិណា ជាចាងហ្វាង និងលោកហេង ឡុង ជាប្រធានគ្រប់គ្រងការផលិត ភាពយន្តរឿង«បន្តោងឆ្នាំងដី» បានសម្ពោធត្រៀមចាក់បញ្ជាំងពីថ្ងៃទី១៥ ខែវិច្ឆិកា ឆ្នាំ២០១៨ តទៅ នៅគ្រប់រោងភាពយន្តក្នុងរាជធានីភ្នំពេញ ក្រុងព្រះសីហនុ និងក្រុងសៀមរាប ។
វណ្ណកម្មដំបូងរបស់ផលិតកម្ម «សិល្បៈខ្មែរភាពយន្ត» នេះត្រូវអ្នកគ្រប់គ្រងការផលិត និងជាប្រធានសមាគមមិត្តសិល្បៈស្ម័គ្រចិត្តជួយសង្គម លោកហេង ឡុង លើកឡើងថា «ជាខ្សែភាពយន្តខ្មែរបែបកំប្លែង និងរន្ធត់ដែលប្រមូលផ្ដុំដោយតារា ល្បីៗប្រចាំឆ្នាំ២០១៨» ។តួឯកស្រីក្នុងរឿងនេះជាអតីតបវរកញ្ញាឯក Miss grand Cambodia 2016 កញ្ញាហេង ចន្ថា ។ ចំណែកតួឯកប្រុសជាតារាកំប្លែងនាយ ពែកមី ។
ចាងហ្វាងផលិតកម្មថ្លែងថា «តាមរយៈរឿងនេះមិនធ្វើឲ្យអ្នកទស្សនាខកបំណងឡើយ ដោយខ្ញុំជឿជាក់ថា ល្អមើល ទាក់អារម្មណ៍ គ្រប់ឈុតគ្រប់ឆាកមានភាពប្រទាក់ក្រឡាគ្នា ធ្វើឲ្យអ្នកទស្សនាព្រឺព្រួចជាមួយឈុតឆាកលងបន្លាច លាយឡំជាមួយអារម្មណ៍ស្រស់ស្រាយ សើចបិទមាត់មិនជិត ជាមួយវោហារស័ព្ទបែបកំប្លែងរបស់នាយពែកមី និងលោកប៉ែន ចំរ៉ុង»។
រឿង «បន្តោងឆ្នាំងដី» មានសន្ទុះការចាប់អារម្មណ៍ទ្វេដង ដ្បិតថ្ងៃសម្ពោធដាក់ឲ្យចាក់បញ្ចាំងតាមបណ្តារោងភាពយន្តក្នុងស្រុក ក្រោមអធិបតីអ្នកនាងចន ច័ន្ទលក្ខិណា និងលោក ហេង ឡុង ចប់ភ្លាម ក៏មានការផ្សព្វផ្សាយលើផេកផ្លូវការ «រឿងបន្តោងឆ្នាំងដី» ធ្វើឲ្យមហាជនសម្រុកចូលមកសួរថ្លៃសំបុត្រ និងពេលវេលាបញ្ចាំង ។
លោកហេង ឡុង ប្រធានគ្រប់គ្រងការផលិតដាក់ចម្ងល់ដល់ទស្សនិកជនថា «តើបងប្អូនមានចាំលោកគ្រូអគ្គីនេត្រដែលទាយមានបណ្ណ័ធានាដែរឬទេ ? ចង់ដឹងទេថាមានតួសម្ដែងលោកគ្រូអគ្គីនេត្រ ឬក៏អត់ ?
ខ្សែភាពយន្តដំបូងរបស់ផលិតកម្ម «សិល្បៈខ្មែរភាពយន្ត» រឿងបន្តោងឆ្នាំងដី មានឈុតឆាកអ្វីខ្លះ និងមានគ្រូអគ្គីនេត្រដែរ ឬយ៉ាងណា សូមរង់ចាំទស្សនាទាំងអស់គ្នា ៕
ចែករំលែកព័តមាននេះ