រាធានីភ្នំពេញ ៖ សហភាពសហព័ន្ធយុវជនកម្ពុជា (ស.ស.យ.ក) គ្រោងនឹងរៀបចំព្រឹត្តិការណ៍ថ្មីក្នុងឆ្នាំ២០១៨ ដែលមានឈ្មោះថា«៤០គីឡូម៉ែត្រទៅកាន់ប្រវត្តិសាស្ត្រ» នៅចុងខែវិច្ឆិកា និងដើម្បីខែធ្នួ ឆ្នាំ២០១៨ខាងមុខនេះ ។…
រាធានីភ្នំពេញ ៖ សហភាពសហព័ន្ធយុវជនកម្ពុជា (ស.ស.យ.ក) គ្រោងនឹងរៀបចំព្រឹត្តិការណ៍ថ្មីក្នុងឆ្នាំ២០១៨ ដែលមានឈ្មោះថា«៤០គីឡូម៉ែត្រទៅកាន់ប្រវត្តិសាស្ត្រ» នៅចុងខែវិច្ឆិកា និងដើម្បីខែធ្នួ ឆ្នាំ២០១៨ខាងមុខនេះ ។
លោកហ៊ុន ម៉ានី ប្រធានស.ស.យ.ក បានលើកឡើងក្នុងសន្និសីទសារព័ត៌មាននារសៀលថ្ងៃទី១៦ តុលានេះថា ព្រឹត្តិការណ៍នេះមានគោលបំណងផ្តល់ជាវេទិកាដល់យុវជនឲ្យចេះរួបរួមគ្នា ក្នុងគ្រាលំបាក និងគ្រាសុខសាន្តស្វែងយល់ពីកម្រិតសមត្ថភាពរបស់ខ្លួនក៏ដូចជា កម្រិតនៃ ការតស៊ូ ភាពអត់ធ្មត់ និងសមត្ថភាពដោះស្រាយបញ្ហាជាក់ស្តែង រួមជាមួយការស្វែងយល់ បន្ថែមពីប្រវត្តិសាស្ត្រ តាមរយៈការធ្វើដំណើរថ្មើរជើងរួមគ្នានៅលើគន្លងផ្លូវដែលមានចម្ងាយ៤០គីឡូម៉ែត្រ ។ លោកបន្តថា មិនត្រឹមតែប៉ុណ្ណោះព្រឹត្តិការណ៍នេះ គឺធ្វើឡើង ដើម្បីបង្កើតបរិ យាកាសស្និតស្នាល និងប្រកបដោយភារតភាពដែលក្នុងនោះយុវជនទាំងអស់ត្រូវបានលើកទឹកចិត្តឲ្យមានសកម្មភាពកសាងក្រុម (Team Building) ការដើររួមគ្នាច្រៀងចម្រៀងរួមគ្នាការចំអិនអាហាររួមគ្នា ការបោះជំរុំការដុតភ្លើងគប់ ការនិទានរឿង និងការបញ្ចេញសមត្ថភាព ទេពកោសល្យផ្ទាល់ខ្លួនក៏ដូចជា ការច្រៀងរាំកម្សាន្តផ្សេងៗ ។
លោកបញ្ជាក់ថា ព្រឹត្តិការណ៍នេះនឹងត្រូវធ្វើឡើងចាប់ពីថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០១៨ នៅក្នុងបរិវេណស្រុកស្នួល ខេត្តក្រចេះ ដែលតាមគ្រោងទុកសហភាពសហព័ន្ធយុវជនកម្ពុជារំពឹងថា នឹងមានការចូលរួមពីសំណាក់យុវជន និងមហាជនប្រមាណ៥០០នាក់ ។ លោកបន្ថែមថា ដើម្បីធានាបាននូវការប្រព្រឹត្តទៅដោយរលូននៃព្រឹត្តិការណ៍អ្នកចូលរួមទាំងអស់នឹងត្រូវបានបែងចែកជាក្រុម ហើយត្រូវធ្វើដំណើរនៅលើដងផ្លូវមួយដែលមានចម្ងាយ៤០គីឡូម៉ែត្រ (សម្រាប់បុរស) និង២០ ឬ៤០គីឡូម៉ែត្រសម្រាប់នារី ។ លោកក៏បានលើកឡើងថាតាមការកំណត់ដំណើរនេះត្រូវចំណាយអស់ថិរវេលាប្រមាណ២ថ្ងៃ១យប់ និងមួយថ្ងៃទៀតសម្រាប់ការបោះជំរុំនៅទីតាំងវិមានអនុស្សាវរីយ៍២ធ្នូ ។
គួរបញ្ជាក់ថា ព្រឹត្តិការណ៍នេះនឹងបើកឲ្យមានការចូលរួមពីគ្រប់មជ្ឍដ្ឋានដែលក្នុងនោះយុវជន និងមហាជនដែលមានបំណងចូលរួមត្រូវមានអាយុចន្លោះពី១៨ ទៅ៤៥ឆ្នាំ មានកាយសម្បទារឹងមាំមានសុខភាពផ្លូវចិត្តប្រក្រតី គោរពតាមបទបញ្ជាផ្ទៃក្នុងនៃព្រឹត្តិការណ៍ដោយឆ្លងកាត់ការវិនិច្ឆ័យ និងការសម្ភាសផ្ទាល់មាត់ពីក្រុមការងាររៀបចំ ។ បន្ទាប់ទទួលបានភាពជោគជ័យនៃការវិនិច្ឆ័យ និងការសម្ភាសរួចរាល់អ្នកចូលរួមត្រូវមានឆន្ទៈ ក្នុងការបង់វិភាគទានចូលរួមចំនួន ៤០០០០រៀល ដោយមានប្រាក់តម្កល់ចំនួន៣៦០០០០រៀលបន្ថែម ។ ប្រាក់តម្កល់ ៣៦០០០០រៀលនេះនឹងប្រគល់ជូនអ្នកចូលរួមវិញ ក្រោយចប់កម្មវិធីដរាបណាអ្នកចូលរួមទាំងអស់បានអនុវត្តពេញលេញនូវបទបញ្ជាផ្ទៃក្នុង និងលក្ខន្តិកៈរបស់ព្រឹត្តិការណ៍តាមការព្រមព្រៀងជាមុន ។
បើតាមលោក ហ៊ុន ម៉ានី កូនប្រុសសម្តេចតេជោ ហ៊ុន សែន ក៏បានសម្តែងក្តីសង្ឃឹមថា គម្រោងរៀបចំព្រឹត្តិការណ៍នឹងទទួលបានគាំទ្រ ហើយជោគជ័យដូចជា ការបំបែកឯតទគ្គកម្មក្រមាវែងជាងគេលើកពិភពលោកកន្លងមកអីញ្ចឹង ។ លោកក៏សង្ឃឹមថា នឹងមានយុវជនចូលរួមដូចកាកំណត់ ។ ជាងនេះព្រឹត្តិការណ៍នេះក៏ផ្សាយភ្ជាប់នឹងការរំលឹកថ្ងៃ២ ធ្នូ ដែលចលនាផ្តួលរំលំរបបដឹកនាំសម្លាប់រង្គាលរបស់ពួកខ្មែរក្រហមផងដែរ ៕
ចែករំលែកព័តមាននេះ