រាជធានីភ្នំពេញ ៖ គណបក្សប្រជាជនកម្ពុជាបានថ្កោលទោសយ៉ាងដាច់អហង្ការចំពោះសហភាពអន្តរសភា (IPU) ដែលអនុញ្ញាតឲ្យលោក សម រង្ស៊ី និងបក្ខពួកចួលរួមកិច្ចប្រជុំមហាស ន្និបាតលើកទី១៣៩ នៅទីក្រុងហ្សឺណែវប្រទេសស្វីស…
រាជធានីភ្នំពេញ ៖ គណបក្សប្រជាជនកម្ពុជាបានថ្កោលទោសយ៉ាងដាច់អហង្ការចំពោះសហភាពអន្តរសភា (IPU) ដែលអនុញ្ញាតឲ្យលោក សម រង្ស៊ី និងបក្ខពួកចួលរួមកិច្ចប្រជុំមហាស ន្និបាតលើកទី១៣៩ នៅទីក្រុងហ្សឺណែវប្រទេសស្វីស ។ នេះបើតាមអ្នកនាំពាក្យ ។
លោកសុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី១៦ តុលាថាលោកសម រង្ស៊ី អតីតប្រធានគណបក្សសង្គ្រោះជាតិគ្មានតួនាទីអ្វីត្រូវចូលប្រជុំនៅមហាសន្និ បាតសហភាពអន្តរសភានោះទេ ។ លោកបញ្ជាក់ថា «រហូតមកដល់ពេលនេះទណ្ឌិតសម រង្សីគ្មានតួនាទីអ្វីដល់តិចតួចក្នុងការមានមុខចូលប្រជុំនៅលើវេទិកានានាជាថ្នាក់អន្តរជាតិពីព្រោះទណ្ឌិតសម រង្សី មិនមែនជាតំណាងប្រជាជនកម្ពុជាឡើយ» ។ លោកសុខ ឥសាន ក៏បានលើកឡើងថា លោកសម រង្សី គ្រាន់តែជាជនក្បត់ជាតិខ្មែរ និងជាជនពនេចរគ្មានស្រុកទេស និងជាជាអាយ៉ងដាច់ថ្លៃរបស់ពួកបរទេសចក្រពត្តិភាពនិយមអន្តរជាតិតែប៉ុណ្ណោះ ។ ដូច្នេះការដែលមានអ្នកអនុញ្ញាត្តឲ្យទណ្ឌិតសម រង្ស៊ី ចូលប្រជុំនៅក្នុងវេទិកា IPU គឺជាការរំលោភសិទ្ធិប្រជាធិបតេយ្យរបស់ប្រជាជនកម្ពុជា និងជាការបំពានលើឯករាជ្យ និងអធិបតេយ្យភាពជាតិកម្ពុជាយ៉ាងងងើលព្រមទាំងរំលោភច្បាប់ អន្តរជាតិដែលប្រធានប្រជុំ IPU ត្រូវទទួលខុសត្រូវទាំងស្រុងលើតួនាទីលំអៀងនយោបាយរបស់ខ្លួនដោយគ្មានការខ្មាស់អៀន ។
លោកសុខ ឥសាន បានលើកយ៉ាងដូច្នេះទៀតថា គណបក្សប្រជាជនកម្ពុជាសូមគាំទ្រយ៉ាងពេញទំហឹង ចំពោះការតវ៉ាដ៏ម៉ឺងម៉ាត់របស់គណប្រតិភូសភាកម្ពុជាដែលបានទៅចូលរួមប្រជុំជាផ្លូវការក្នុងអង្គប្រជុំ IPU ក្នុងនាមជាតំណាងស្របច្បាប់របស់ប្រជាជនកម្ពុជា ហើយសូម ថ្កោលទោសយ៉ាងដាច់អហង្ការចំពោះអាកប្បកិរិយាល្មើសច្បាប់របស់ជនលំអៀងខាងនយោ បាយ និងមនោគមន៍វិជ្ជាអន្តរជាតិ ។
សូមជម្រាបថា ការថ្កោលទោសរបស់គណបក្សកាន់អំណាចនេះ បន្ទាប់ពីលោកសម រង្ស៊ី ត្រូវបានប្រធានសហភាពអន្តរសភា (IPU) បានអញ្ជើញឲ្យចូលរួមកិច្ចប្រជុំ IPU ដោយបាន អនុញ្ញាតឲ្យលោកថ្លែងសុន្ទរកថាទៀតផង ។ គណៈប្រតិភូសភាកម្ពុជាដឹកនាំដោយលោកស្រី ឃួន សុដារី កំពុងតែចូលរួមមហាសន្និបាតសហភាពអន្តរសភាហៅកាត់ថា IPU នៅទីក្រុងហ្សឺណែវប្រទេសស្វីស ចាប់ពីថ្ងៃទី១៤ ដល់ថ្ងៃទី១៨ ខែតុលានេះ ។ ជាមួយគ្នានេះលោក សម រង្ស៊ី អតីតប្រធានគណបក្សប្រឆាំងនៅកម្ពុជាក៏ត្រូវគេអះអាងថា ត្រូវបានប្រធានសហភាពអន្តរសភា IPU អញ្ជើញឲ្យចូលរួមផងដែរ ។ យ៉ាងណាក្តីលោកឡេង ប៉េងឡុង អ្នកនាំពាក្យរដ្ឋសភា បានអះអាងថា គណៈប្រតិភូសភាកម្ពុជានឹងតវ៉ាចំពោះការអញ្ជើញនេះ ។ លោកឡេង ប៉េងឡុង បានអះអាងថា ការដែលប្រធានសហភាពអន្តរសភាអញ្ជើញលោកសម រង្ស៊ី ចូលរួមកិច្ចប្រជុំលើកទី១៣៩ របស់ IPU នៅទីក្រុងហ្សឺណែវប្រទេសស្វីស គឺជារឿងខុសច្បាប់ ។ ខុស ច្បាប់ដោយសារតែប្រទេសកម្ពុជាដែលចាត់ទុកលោក សម រង្ស៊ី ថា ជាទណ្ឌិត និងមិនមែនជាតំណាងរាស្ត្រទៀតឡើយ ។
បើតាមអ្នកនាំពាក្យរដ្ឋសភារូបនេះគណៈប្រតិភូសភាកម្ពុជាដែលមានលោកស្រី ឃួន សុដារី និងលោកឈាង វុន ទៅចូលរួមនោះនឹងធ្វើការតវ៉ាចំពោះការអញ្ជើញលោកសម រង្ស៊ី ចូលរួម ប្រជុំ IPU នេះដូចគ្នានឹងករណីដែលលោកឈាង វុន បណ្តេញលោកស្រី មូរ សុខហួរចេញពីកិច្ចប្រជុំភាពជាដៃគូនៃសភាអាស៊ីអឺរ៉ុបកាលពីចុងខែកញ្ញានោះដែរកន្លងមក ។ លោកឈាង វុន ដែលបានកំពុងចូលរួមកិច្ចប្រជុំ IPU បានសរសេរលើបណ្តាញសង្គមរបស់លោកយ៉ាងដូច្នេះថា «មានតែតំណាងរាស្ត្រអាណត្តិទី៦ទេ ដែលត្រូវបានទទួលការអញ្ជើញឲ្យចូលរួមក្នុងកិច្ចប្រជុំសន្និបាតប្រចាំឆ្នាំរបស់ IPU ។
គ្មានអ្នកដែលមិនមែនជាអ្នកតំណាងរាស្ត្រដែលគ្មានការអញ្ជើញត្រូវបានអនុញ្ញាតិឲ្យចូលក្នុងសាលប្រជុំសន្និបាតនេះទេ» ។ លោកបានបង្ហោះវិឌីអូឃ្លីបក្នុងកិច្ចប្រជុំដោយស្វែងរកមុខលោកសម រង្ស៊ី ផងដែរ និងបានលើកឡើងថា សូមជួយពិនិត្យផងជួយរកក្នុងវីដេអូនេះផងក្រែងឃើញអ្នកដែលមិនគួរឃើញ ។ អ្នកដែលមិនគួរឃើញ អាចដើរក្រៅសាលប្រជុំ ៕
ចែករំលែកព័តមាននេះ