ខេត្តកំពង់ធំ ៖ គោចំនួន៨ក្បាលបានងាប់និងម្ចាស់រងរបួស នៅក្នុងឧប្បត្តិហេតុរន្ទះបាញ់មួយ កាលពីវេលាម៉ោង៥ល្ងាចថ្ងៃទី១៣ ខែតុលានៅភូមិព្រៃខ្លា ឃុំប្រឡាយ ស្រុកស្ទោង ។ លោកវរសេនីយ៍ឯក យ៉ង សំ អធិការនគរបាលស្រុកស្ទោង បានឲ្យដឹងថា ក្នុងចំណោមគោដែលងាប់ទាំង៨ក្បាលមានញី៤ក្បាល និងឈ្មោល៤ក្បាល ឯម្ចាស់គោដែលរងរបួសឈ្មោះឆន ខែម ភេទប្រុស អាយុ៤១ឆ្នាំ ។
ម្ចាស់គោនិយាយថា ជារៀងរាល់ថ្ងៃ នៅពេលព្រឹកគាត់តែងយកគោទាំងអស់ខាងលើទៅឃ្វាលឲ្យស៊ីស្មៅនៅឯវាល ហើយរហូតដល់ល្ងាចទើបកៀងត្រឡប់មកផ្ទះវិញ ។ ដោយឡែក នៅល្ងាចថ្ងៃកើតហេតុនោះ ដោយសារមានភ្លៀងធ្លាក់គាត់ក៏កៀងគោត្រឡប់មកផ្ទះ ជាអកុសលស្រាប់តែមានរន្ទះបាញ់ចំហ្វូងគោរបស់គាត់បណ្តាលឲ្យងាប់រដូករណែលទាំង៨ក្បាលចំណែករូបគាត់រងរបួសស្រាល ។
ក្រោយពេលកើតហេតុ រូបគាត់ត្រូវបានសាច់ញាតិដឹកយកទៅសង្គ្រោះ ចំណែកគោដែលងាប់ត្រូវបានបងប្អូនកូនក្មួយនាំគ្នាដឹកយកទៅលក់ទាំងមូលមួយចំនួន និងមួយចំនួនទៀតវះយកសាច់លក់ ដើម្បីកុំឲ្យស្អុយទាន់ព្រោះជាពេលល្ងាចទៅហើយ ។នៅក្នុងឧប្បត្តិហេតុខាងលើនេះ លោកអធិការសូមសំណូមពរដល់បងប្អូនប្រជាពលរដ្ឋយើង ត្រូវមានការប្រុងប្រយ័ត្នឲ្យបានខ្ពស់ និងមិនត្រូវចេញដើរនៅពេលភ្លៀងធ្លាក់ទេ គាប់ជួនដូចជាករណីខាងលើនេះ លើកលែងតែមានការចាំបាច់ពិសេសដែលមិនអាចខកខានបាន ៕
ចែករំលែកព័តមាននេះ