ខេត្តរតនគីរី ៖ យុវជនម្នាក់ទៅហែលទឹកលេងនៅទំនប់ក្នុងពេលរដូវភ្ជុំបិណ្ឌ បណ្តាលឱ្យលង់ទឹកស្លាប់យ៉ាងអាណោចអាធម័ ដែលហេតុការណ៍នេះបានកើតឡើងកាលពីវេលាម៉ោង២នឹង៣០នាទីរសៀលថ្ងៃទី៩ ខែតុលា ឆ្នាំ២០១៨ នៅចំណុចទំនប់កំសាន្តអូរភ្លង ស្ថិតនៅភូមិ៣ ឃុំត្រពាំងច្រេស ស្រុកកូនមុំ ។
ក្រោយពីកើតហេតុសមត្ថកិច្ចប៉ូលិសឃុំនឹងស្រុកបានចុះទៅកន្លែងកើតហេតុ ធ្វើការត្រួតពិនិតសព សមត្ថ
កិច្ចបានអោយដឹងថា ជនរងគ្រោះដែលស្លាប់ឈ្មោះប៉ាវ ភេទប្រុស អាយុ១៧ឆ្នាំ មុខរបរកសិករ មានទីលំនៅភូមិ២ សង្កាត់ការចាញ ក្រុងបានលុង ។
សមត្ថកិច្ចដដែលបានបន្តទៀតថា ជុំវិញករណីខាងលើនេះ បើតាមសក្សី និងត្រូវជាមិត្តភក្តិរបស់ជនរងគ្រោះ៣ទៅ៤នាក់បានអោយសមត្ថកិច្ចដឹងថា នៅមុនពេលកើតហេតុ ជនរងគ្រោះរួមជាមួយអ្នកភូមិមានគ្នា៥ទៅ៦នាក់បានជិះម៉ូតូ៣គ្រឿងនាំគ្នាទៅលេងនៅកន្លែងកើតហេតុខាងលើ តាំងពីម៉ោង១០ព្រឹក ។
មុនដំបូងជនរងគ្រោះបានរាំលេងយ៉ាងសម្បាយ ព្រោះនៅកន្លែងលេងកំសាន្តមានគេចាក់ធុងបាស់ ហើយមកទៀតជនរងគ្រោះបានឈប់រាំ ហើយដើរទៅហែលទឹកលេងចាប់តាំងពីពេលនោះមកបាត់ជនរងគ្រោះ លុះដល់ម៉ោងត្រឡប់មកផ្ទះវិញ មិត្តភក្តិទាំងអស់ក៏នាំគ្មាដើររកជនរងគ្រោះតែមិនឃើញ ហើយក៏មានគេបានឃើញជនរងគ្រោះកំពុងហែលទឹកលេង ក៏ស្រាប់តែបាត់ខ្លួន លុះនាំគ្នាដើរទៅដល់ចំណុចដែលជនរងគ្រោះហែលទឹកលេង ក៏នាំគ្នាចុះទឹករាវរកស្រាប់តែប្រទះសពជនរងគ្រោះក្នុងទឹក ។
សមត្ថកិច្ចបានបន្តទៀតថា បើតាមការត្រួតពិនិតនៅកន្លែងកើតហេតុ ជនរងគ្រោះបានលង់ទឹកជំរៅជាង២ម៉ែត្រ ។ មុនពេលចុះទៅហែលទឹកលេង ទំនងជាជនរងគ្រោះបានផឹកស្រវឹង ទើបបណ្ដាលឱ្យលង់ទឹកស្លាប់បែបនេះ ។
សមត្ថកិច្ចបានបន្តទៀតថា ជនរងគ្រោះពិតជាស្លាប់ដោយសារលង់ទឹកប្រាកដ គ្មានរឿងឃាតកម្មអ្វីកើតឡើងនោះទេ សពត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ