រាជធានីភ្នំពេញ៖ អ្នកឯកទេសផាត់មុខមួយចំនួនបានរិះគន់ចំពោះអ្នកពាក់ព័ន្ឋថាផាត់មុខ និងថតរូបជូនកញ្ញាតំណាងជាតិ Miss Grand Cambodia ឲ្យតែរួចពីដៃ មិនសមនឹងរូបសម្រស់ដ៏ផូរផង់របស់នាង ។ កាលពីពេល…
រាជធានីភ្នំពេញ៖ អ្នកឯកទេសផាត់មុខមួយចំនួនបានរិះគន់ចំពោះអ្នកពាក់ព័ន្ឋថាផាត់មុខ និងថតរូបជូនកញ្ញាតំណាងជាតិ Miss Grand Cambodia ឲ្យតែរួចពីដៃ មិនសមនឹងរូបសម្រស់ដ៏ផូរផង់របស់នាង ។
កាលពីពេល ថ្មីៗកន្លងមកកញ្ញា«រំដួលលិចទឹក»ដែលមានឯកទេសផាត់មុខប្រចាំឲ្យតារាល្បីបានបញ្ចេញមតិទាក់ទងនឹងការផាត់មុខឲ្យកញ្ញាឌី លីកា ថា «ខ្មាសគេណាស់លោកអើយ…និយាយតាមត្រង់ខ្ញុំពិតជាមិនយល់ ហើយថែមទាំងខឹងទៀតផង ចង់រកមុខអ្នកផាត់មុខនិងជាងថត ហើយចង់សួរទៅកាន់អ្នករៀបចំឲ្យ Miss grand Cambodia ទៅប្រកួតហ្នឹងមានបើកភ្នែកមើល ឬអត់ ?
ហើយបើថាអត់អ្នកតែងទេមករកខ្ញុំមក ខ្ញុំតែងឲ្យមិនយកលុយទេដើម្បីមុខមាត់បវរកញ្ញាតំណាងប្រទេស ខ្ញុំនិយាយមែន …ដូចហួសហេតុ សួរថាយកគ្នាទៅប្រកួតតំណាងឲ្យប្រទេសខ្មែរដើម្បីឲ្យគេស្គាល់ខ្មែរ ឬយកទៅឲ្យគេសើចខ្មែរ ?
សូមបងប្អូនជួយមើលផង គាត់ពិតជាមានរូបសម្រស់ស្អាតពិតមែន ចុះហេតុអីបានមកផាត់មុខគាត់បែបហ្នឹង មុខសហោះ រោមភ្នែកបិទមិនចំកន្លែង ហើយរបកកាវអស់ទាំងសងខាង ចិញ្ចើមប្រតាក ហើយជាងថតហ្នឹងក៏មិនចេះមើលទៀត ពិសេសអ្នកដែលយករូបគាត់ផ្ញើទៅខាងកម្មវិធីហ្នឹងម៉េចមិនបើកភ្នែកមើលផងលោក បរវរកញ្ញាតំណាងជាតិណា មិនមែនដូចក្មេងធ្វើលេងអ៊ីចឹងទេ … ។
ហួសហេតុ ខ្ញុំជាអ្នកគាំទ្រកម្មវិធីបវរកញ្ញាគ្រប់កម្មវិធី អុីចឹងខ្ញុំចូលចិត្តតាមដាន ពិសេសបវរកញ្ញាខ្មែរតែម្តង ព្រោះគាំទ្រខ្មែរ ហើយលេងមក ម៉ាកៗហ្នឹងអី ។ និយាយមែនកុំថាចង់ជាប់ តែបវរកញ្ញាមកប្រឡងដូចគ្នាគេឃើញរូបហ្នឹងគេក៏សើចចុកពោះ ហើយពិសេសមើលងាយដល់ ជាងៗផាត់មុខ និងជាងថតស្រុកខ្មែរទៀតថាផាត់របៀបហ្នឹងអ៊ីចឹងតើ … ។ សូមពិចារណាតាមការគួរ អធ្យាស្រ័យផងម្ចាស់រូប Dy Lika Mgc បងក៏ដឹងថាប្អូនក៏មិនសប្បាយចិត្តដែរពេលឃើញរូបខ្លួនឯងដល់ថ្នាក់ហ្នឹង…ស៊ូស៊ូអូនបងគាំទ្ររប្អូនខំដើម្បីមុខមាត់ខ្លួន និងប្រទេសជាតិយើងអូន »។
ប្រធានសមាគមសិល្បករខ្មែរអ្នកនាងចន ច័ន្ទលក្ខិណា បានអំពាវនាវឲ្យមហាជនចូលរួមបោះឆ្នោតជូនកញ្ញាឌី លីកា ដោយនាងសរសេរថា «តោះយើងនាំគ្នាគិតគូរជួយVote ឲ្យ Miss Grand Cambodia យើង ដែលពេលនេះគាត់កំពុងចូលរួមការប្រកួត Miss Grand International នៅឯប្រទេសភូមា យើង Vote ឲ្យគាត់បានចូលវគ្គ Top10 ។
យើងពុំគួរនាំគ្នារិះគន់សម្លៀកបំពាក់ដែលគាត់ស្លៀកនោះទេ យើងត្រូវតែនាំគ្នាជួយលើកស្ទួយគាត់ និងជួយជំរុញគាត់ឲ្យបានចូលដល់វគ្គ final ព្រោះអារម្មណ៍ ចិត្ត ចំណង់ចំណូលចិត្ត បេះដូង ការគិត ការយល់ឃើញ គតិ និងអំពើរបស់មនុស្ស គឺខុសគ្នា
សំខាន់ពេលនេះមិនមែនជាពេលដែលយើងនាំគ្នាប្រកែកយកឈ្នះចាញ់ តាមរយៈការយល់ឃើញ រៀងៗខ្លួននោះទេ ពេលនេះគឺជាពេលដែលយើងត្រូវជួយលើកតម្កើងស្ត្រីខ្មែរលើឆាកអន្តរជាតិ»។
ឈុតសម្លៀកបំពាក់ដែលកញ្ញាឌី លីកាគ្រងឈ្មោះ«ទេពីស្រីសួគ៌បវរឦសានបុរៈ»។ គណៈកម្មការលើកឡើងថាគោលបំណងដែលធ្វើឈុតសម័យចេនឡានេះឡើង គឺដើម្បីរំឭកនឹកគុណបុព្វបុរសខ្មែរ ដែលបានលះបង់ និងការពារថែរក្សាព្រះនគរខ្មែរមួយនេះឱ្យកូនខ្មែរបានរស់នៅ រំលឹកគុណដល់ភាពរីកចម្រើននៃអរិយធម៌ វប្បធម៌ខ្មែរដើមដ៏រុងរឿង និងភាពរួបរួមគ្នា ដោយគិតពីប្រយោជន៍រាស្ត្រ និងព្រះនគរខ្មែរជាធំ ។
ជាងនេះទៅទៀត គឺចង់បង្ហាញដល់កូនខ្មែរជំនាន់ក្រោយឱ្យចេះថែរក្សាការពារ ស្រាវជ្រាវអំពីដើមកំណើត និងអរិយធម៌ជាតិរបស់ខ្លួន ពិតៗ កុំឱ្យជនបរទេសមកកាឡៃបានថាយើងចម្លងពីគេបាននោះ។
មួយវិញទៀតចង់បង្ហាញ និងដាស់សតិដល់អ្នករចនាម៉ូដជំនាន់ក្រោយ ឱ្យជួយថែរក្សានូវទម្រង់ដើមនៃការរៀបចំខ្លួនទាំងសម្លៀកបំពាក់ និងគ្រឿងអលង្ការដើម ក្នុងនាមយើងជាបុគ្គលមួយរូបដែលនឹងបន្តថែរក្សា និងលើកស្ទួយចំពោះមរតកកេរដំណែលដ៏មានតម្លៃមិនអាចកាត់បាននេះ ។
គណៈកម្មការបានសម្រេចវិនិច្ឆ័យ និងអនុម័តទទួលយកមកជាឈុតសំលៀកបំពាក់តំណាងជាតិនេះ ដោយឈរលើមូលដ្ឋាននៃការចូលរួមផ្សព្វផ្សាយនូវអត្តសញ្ញាណជាតិ ភាពល្បីល្បាញនៃវប្បធម៌ និងខឿនប្រពៃណីទំនៀមទម្លាប់ដ៏ខ្ពង់ខ្ពស់ដែលមានជាច្រើនសម័យកាលថែមទាំងទទួលបាននូវភាពរុងរឿង ៕
ចែករំលែកព័តមាននេះ