ខេត្តកំពង់ចាម ៖ ពិតជាគួរឲ្យអាណិតណាស់ដោយផ្ទះថ្មល្វែងរបស់ចុងភៅ «ប៉ាវ ចាន់ធី រស្មីសុខា» មិនទាន់សាងសង់រួច១០០ភាគរយផងនោះ ត្រូវបាក់ស្រុតនៅផ្នែកខាងក្រោយខ្លាំងមិនអាចរស់នៅកើតឡើយ។ ជាមួយនោះសមាជិកក្រុមគ្រួសារបាននាំគ្នាចាកចេញទៅរស់នៅផ្ទះបងប្អូនជាបណ្តោះអាសន្ន ព្រោះខ្លាចផ្ទះរលំបាក់សង្កត់លើអាចបង្កគ្រោះថ្នាក់ដល់អាយុជីវិត…
ខេត្តកំពង់ចាម ៖ ពិតជាគួរឲ្យអាណិតណាស់ដោយផ្ទះថ្មល្វែងរបស់ចុងភៅ «ប៉ាវ ចាន់ធី រស្មីសុខា» មិនទាន់សាងសង់រួច១០០ភាគរយផងនោះ ត្រូវបាក់ស្រុតនៅផ្នែកខាងក្រោយខ្លាំងមិនអាចរស់នៅកើតឡើយ។ ជាមួយនោះសមាជិកក្រុមគ្រួសារបាននាំគ្នាចាកចេញទៅរស់នៅផ្ទះបងប្អូនជាបណ្តោះអាសន្ន ព្រោះខ្លាចផ្ទះរលំបាក់សង្កត់លើអាចបង្កគ្រោះថ្នាក់ដល់អាយុជីវិត ហើយផ្ទះដែលរងគ្រោះដោយការបាក់ស្រុតនេះមានចំនួន២ផ្ទះ ។
លោក ហ៊ុន លឹមហួរ អាយុ៤៣ឆ្នាំ មានផ្ទះនៅជាប់មាត់ទន្លេ បានប្រាប់ឲ្យដឹងនៅព្រឹកថ្ងៃទី១១ តុលា ២០១៨ថា ក្រោយពីបានរៀបការរួច រូបលោកបានមកសាងសង់ផ្ទះឈើរហូតមកដល់សព្វថ្ងៃនេះមានរយៈពេលជិត២០ឆ្នាំហើយដោយបានប្រឹងប្រែងរកស៊ីលក់ដូរ និងធ្វើរបងបេតុងនៅក្រោយផ្ទះ ដើម្បីសុវត្ថិភាពសម្រាប់គ្រួសាររបស់គាត់ ហើយច្រាំងទន្លេមេគង្គក្រោយផ្ទះមិនដែលបាក់នោះទេ។
លោកហ៊ុន លឹមហួរ ប្រាប់បន្តថា ក្រោយមកទៀតកងវិស្វកម្មរបស់ក្រសួងការពារជាតិ បានសាងសង់ស្ពានបេតុងមួយកាត់ទន្លេមេគង្គ តភ្ជាប់ពីត្រើយក្រុងកំពង់ចាម ទៅឃុំកោះមិត្ត ស្រុកកំពង់សៀម ក្នុងពេលរដូវវស្សាចូលមកដល់ឆ្នាំ២០១៨នេះ នៅក្រោយផ្ទះរបស់គាត់មានគ្រឿងចក្ររបស់ក្រុមធ្វើស្ពានកោះប៉ែន បានមកឈូសឆាយដីដើម្បីចាក់ខឿនការពារកុំឲ្យបាក់ស្រុតនោះ។ តែក្រោយទឹកបានស្រកទៅវិញ គិតមកដល់ព្រឹកថ្ងៃទី១១ តុលា ២០១៨ របងបេតុងខាងក្រោយផ្ទះបានស្រុតរងការខូចខាតខ្លះក៏ស្នើសុំឲ្យខាងកងវិស្វកម្ម មកជួយសាងសង់រៀបចំធ្វើច្រាំងទន្លេឡើងវិញផង ។
ចំណែកលោកប៉ាវ ចាន់ធី អាយុ៥២ឆ្នាំ ម្ចាស់ចុងភៅយីហោ«ប៉ាវ ចាន់ធី- រស្មីសុខា» ក៏ប្រាប់ដែរថាថា ដើមដំបូងផ្ទះរបស់គាត់ជាប្រភេទផ្ទះឈើ ដោយបានមកធ្វើនៅជាប់មាត់ទន្លេមេគង្គជិត២០ឆ្នាំហើយ ក្រោយមកទៀតដោយមានកូនប្រុសស្រី៥នាក់ ហើយផ្ទះកាន់តែចាស់ និងរាងចង្អៀតផងនោះ ក៏រុះចេញ ហើយខ្ចីលុយធនាគារឯកជនចំនួន២ម៉ឺនដុល្លារបូករួមទាំងលុយក្នុងហោប៉ៅទៀតគឺជាង៣ម៉ឺនដុល្លារឯណោះ មកធ្វើផ្ទះថ្មមានទំហំ៥,៥០ម៉ែត្រគុណ១០,៥០ម៉ែត្រ ដោយបានខិតខំប្រឹងឲ្យជាងធ្វើរៀបការ៉ូ ឡើងស្អាត និងពេញចិត្ត។
លោកប៉ាវ ចាន់ធី បន្តទៀតថា កន្លងមកពេលដែលទឹកទន្លេមេគង្គឡើងមកក្នុងឆ្នាំ២០១៨នេះ កម្លាំងកងវិស្វកម្ម បានយកគ្រឿងចក្រមកឈូសឆាយដី ច្រាំងទន្លេក្រោយផ្ទះគាត់ដើម្បីរៀបចំចាក់ដីនៅក្បាលស្ពានកោះប៉ែន ។ ស្របពេលដែលទឹកទន្លេមេគង្គបានចាប់ផ្តើមស្រកទៅវិញ ស្រាប់តែបាក់ស្រុតរបងផ្ទះ និងផ្ទះ ក៏ត្រូវបានស្រុតបាក់ខូចខាតខ្លាំង ការខូចខាតនេះគាត់ដាក់ការសង្ស័យថា អាចមកពីមានការឈូសឆាយដីច្រាំងនេះ ហើយទើបបណ្តាលឲ្យផ្ទះគាត់រងការខូចខាត ហើយក៏សូមស្នើសុំឲ្យខាងកងវិស្វកម្មសាងសង់ស្ពាន មេត្តាជួយដោះស្រាយក្នុងកំរិតណាមួយតាមដែលអាចធ្វើទៅបាននោះ។
លោកឧត្តមសេនីយ៍ឯក គង់ អៀង នាយករងនាយកដ្ឋានកងវិស្វកម្មក្រសួងការពារជាតិ មានប្រសាសន៍ឲ្យដឹងដែរថា នៅពេលដែលទឹកទន្លេមេគង្គស្រកចុះបន្តិចទៀត រូបលោកនឹងចុះទៅពិនិត្យមើលកន្លែងច្រាំងទន្លេនៅគល់ស្ពានកោះប៉ែន ដើម្បីឲ្យដឹងថា តើមូលហេតុខាងលើ បណ្តាលមកពីអ្វីច្បាស់លាស់?ប្រសិនបើច្រាំងរងការខូចខាតនោះ នឹងធ្វើការជួសជុលឡើងវិញឲ្យបានរឹងមាំ ចៀសវាងការខូចខាត៕
ចែករំលែកព័តមាននេះ