រាជធានីភ្នំពេញ ៖ មានការភ្ញាក់ផ្អើលមួយកើតឡើងពេញបណ្ដាញសង្គមហ្វេសប៊ុក កាលពីថ្ងៃទី២១ ឧសភា ២០១៣ ខណៈពេលឃើញរូបថតរបស់តារាសម្ដែងអ្នកនាងប៉ែន សុផានី ស្លៀកពាក់សជាដូនជីអង្គុយស្មឹងស្មាធិ៍ ។ មិនត្រឹមតែប៉ុណ្ណោះ នៅក្នុងទំព័រហ្វេសប៊ុករបស់តារាសម្ដែងរូបនេះបញ្ជាក់ថា «ខ្ញុំសូមថ្វាយខ្លួនបួសជាដូនជីហើយ» ។ រឿងនេះធ្វើឱ្យគេមានការងឿងឆ្ងល់យ៉ាងខ្លាំងថា មូលហេតុអ្វីបានជានាងប៉ែន សុផានី សាងផ្នួស ។
អ្នកគាំទ្រមួយចំនួនបានសម្ដែងការសោកស្ដាយ និងចម្លែកចិត្ដខ្លាំងណាស់ ចំពោះការសម្រេចចិត្ដរបស់នាងប៉ែន សុផានី ព្រោះតែគេយល់ថា តារាស្រីរូបនេះនៅក្មេង ហើយស្អាត និងថែមទាំងទាំងមានទេពកោសល្យល្អ មិនគួរទៅសម្ងំសាងផ្នួសជាដូនជីបែបនេះទេ ។ ពាក់ព័ន្ធទៅនឹងរឿងនេះ មិត្ដរួមអាជីពសិល្បៈជាមួយអ្នកនាងប៉ែន សុផានី ម្នាក់បញ្ជាក់ប្រាប់កោះសន្ដិភាពថា រូបភាពបួសជាដូនជីនេះជាការសម្ដែងក្នុងរឿង «ព្រាយខ្លា» ប៉ុណ្ណោះ ការពិតនាងប៉ែន សុផានី មិនបានសាងផ្នួសទេ ។
ដោយចង់បានចម្លើយច្បាស់ជាងនេះ សហការីរបស់កោះសន្ដិភាពព្យាយាមទូរស័ព្ទទាក់ទងទៅអ្នកនាងប៉ែន សុផានី កាលពីរសៀលថ្ងៃទី២១ ឧសភា ២០១៣ ហើយនាងប្រាប់ថា ចំពោះរូបភាពនាងស្លៀកពាក់ជាដូនជី ដែលបានបង្ហោះតាមបណ្ដាញសង្គមហ្វេសប៊ុកនេះមិនមែនជាការពិតទេ គ្រាន់តែជាការសម្ដែងក្នុងខ្សែរឿងភាពយន្ដប៉ុណ្ណោះ ។ អ្នកនាងប៉ែន សុផានី ប្រាប់ខ្លីបានតែប៉ុណ្ណឹង ព្រោះជាប់រវល់ថតរឿង «ម្ដាយក្មេករើសកូនប្រសា» ។
អ្នកនាងប៉ែន សុផានី បានប្រឡូកក្នុងពិភពសិល្បៈភាពយន្ដជាច្រើនឆ្នាំមកហើយ ជាពិសេសចុងក្រោយនេះ គេឃើញវត្ដមានរបស់នាងក្នុងខ្សែវីដេអូភាគចាក់ផ្សាយតាមកញ្ចក់ទូរទស្សន៍ជាច្រើនរឿង ៕
ចែករំលែកព័តមាននេះ