រាជធានីភ្នំពេញ ៖ ស្ថាប័នមូលនិធិរូបិយវត្ថុអន្តរជាតិ(IMF)បានបញ្ជាក់ថា សេដ្ឋកិច្ចកម្ពុជានៅក្នុងឆ្នាំ២០១៨នេះ នឹងសម្រេចបានកំណើន៧,២៥%ជាកំណើនល្អប្រសើរ និងអត្រាអតិផរណាមានកម្រិតទាបត្រឹម២,៥% ។ ក្នុងជំនួបជាមួយលោក វង្សី វិស្សុត…
រាជធានីភ្នំពេញ ៖ ស្ថាប័នមូលនិធិរូបិយវត្ថុអន្តរជាតិ(IMF)បានបញ្ជាក់ថា សេដ្ឋកិច្ចកម្ពុជានៅក្នុងឆ្នាំ២០១៨នេះ នឹងសម្រេចបានកំណើន៧,២៥%ជាកំណើនល្អប្រសើរ និងអត្រាអតិផរណាមានកម្រិតទាបត្រឹម២,៥% ។
ក្នុងជំនួបជាមួយលោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២ តុលា កន្លងមក ក្រុមបេសកកម្មមូលនិធិរូបិយវត្ថុអន្តរជាតិ ដែលដឹកនាំដោយលោក Jarkko Turunen ប្រធានក្រុមបេសកកម្មក្រុមការងារចុះតាមដានវាយតម្លៃពីស្ថានភាពម៉ាក្រូសេដ្ឋកិច្ចកម្ពុជា បានថ្លែងថា ការតាមដានវាយតម្លៃពីស្ថានភាពម៉ាក្រូសេដ្ឋកិច្ចកម្ពុជា ចាប់ពីថ្ងៃទី១៩ ខែកញ្ញា រហូតដល់ថ្ងៃទី២ ខែតុលា ឆ្នាំ២០១៨នេះ ជាលទ្ធផលក្រុមបេសកកម្មArticle IV នៃមូលនិធិរូបិយវត្ថុអន្តរជាតិបានវាយតម្លៃថា ស្ថានភាពសេដ្ឋកិច្ចរបស់ប្រទេសកម្ពុជានៅឆ្នាំ២០១៨នេះ មានភាពល្អប្រសើរ ដោយកំណើនសេដ្ឋកិច្ចស្ថិតក្នុងអត្រា៧,២៥% ដែលជំរុញដោយវិស័យសារពើពន្ធមានភាពរឹងមាំ ជាពិសេសការប្រមូលចំណូល និងការគ្រប់គ្រងបំណុលសាធារណៈបានយ៉ាងល្អ ។
លោកបន្តថា ៖« សេដ្ឋកិច្ចកម្ពុជាកំពុងស្ថិតក្នុងគន្លងដ៏ត្រឹមត្រូវ ឆ្ពោះទៅរកការរីកចម្រើន ស្របពេលដែលរចនាសម្ព័ន្ធសេដ្ឋកិច្ចកំពុងធ្វើពិពិធកម្មជាបណ្តើរៗ ហើយប្រាក់ចំណូលប្រជាជនក៏បានបន្តកើនឡើង និងភាពក្រីក្រត្រូវបានកាត់បន្ថយជាបន្តបន្ទាប់ »។ លោកបន្ថែម ៖« ការសម្រេចបានកំណើនសេដ្ឋកិច្ចខ្ពស់នេះ គឺបានដោយសារកត្តា២ធំៗគឺភាពរឹងមាំនៃតម្រូវការទីផ្សារបរទេសលើទំនិញនាំចេញរបស់កម្ពុជា និងការអនុវត្តគោលនយោបាយថវិការបស់រាជរដ្ឋាភិបាល ដែលផ្តោតលើការវិនិយោគលើវិស័យសង្គមកិច្ច និងហេដ្ឋារចនាសម្ព័ន្ធ ជាវិស័យដែលបម្រើដល់ការបង្កើនផលិតភាពរបស់សេដ្ឋកិច្ច »។
ក្រុមអ្នកជំនាញIMF បានព្យាករណ៍ថា ក្នុងរយៈពេលមធ្យមកម្រិតនៃកំណើនសេដ្ឋកិច្ចនេះ អាចប្រឈមនឹងហានិភ័យធំៗទាំងខាងក្នុង និងខាងក្រៅមួយចំនួនដូចជា ៖ ទី១ កំណើនឥណទាននៅតែស្ថិតក្នុងកម្រិតខ្ពស់ ហើយប្រមូលផ្តុំលើវិស័យអចលនទ្រព្យ និងនៅពឹងផ្អែកលើមូលធនពីខាងក្រៅ ។ ទី២ កំណើនសម្ពាធលើថវិកាជាតិទាំងផ្នែកចំណូល និងចំណាយ ។ ទី៣ និន្នាការនៃការអនុវត្តគោលនយោបាយពាណិជ្ជកម្មគាំពារនិយម និងការរឹតបន្តឹងគោលនយោបាយរូបិយវត្ថុរបស់សហរដ្ឋអាមេរិក និងទី៤ ការថមថយនៃកំណើនសេដ្ឋកិច្ចពិភពលោក ពិសេសប្រទេសចិន ដែលអាចមានឥទ្ធិពលលើការវិនិយោគពីក្រៅស្រុកនៅកម្ពុជា ។
ទោះស្ថិតក្នុងស្ថានភាពនេះ លោកJarkko ក៏បានសម្តែងសុទិដ្ឋិនិយមថា កម្ពុជានៅតែមានលទ្ធភាពបន្តរក្សាកំណើននេះក្នុងកម្រិត៧% សម្រាប់រយៈពេលមធ្យម ក្នុងលក្ខខណ្ឌដែលកម្ពុជាបន្តជំរុញឱ្យកាន់តែស៊ីជម្រៅលើការកែទម្រង់ជារចនាសម្ព័ន្ធ ជាពិសេសលើផ្នែកសារពើពន្ធ និងអភិបាលកិច្ច ព្រមទាំងការបន្តបង្កើនការវិនិយោគលើហេដ្ឋារចនាសម្ព័ន្ធចាំបាច់នានា និងធនធានមនុស្ស ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានកោតសរសើចំពោះការវាយតម្លៃរបស់ក្រុមបេសកកម្ម ArticleIVនៃមូលនិធិរូបិយវត្ថុអន្តរជាតិ ចំពោះការបន្តគាំទ្រ និងកិច្ចសហការល្អក្នុងការចុះមកធ្វើការវាយតម្លៃស្ថានភាពសេដ្ឋកិច្ចនៅកម្ពុជាជាទៀងទាត់ ហើយផ្តល់ជាអនុសាសន៍ គោល នយោបាយ ក្នុងន័យជួយតម្រង់ទិសក្នុងការអភិវឌ្ឍវិស័យសេដ្ឋកិច្ច និងហិរញ្ញវត្ថុកម្ពុជា ជាពិសេសសម្រាប់បម្រើដល់ការអនុវត្តគោល នយោបាយចតុកោណដំណាក់កាលទី៤ ឱ្យមានប្រសិទ្ធភាព ដើម្បីសម្រេចគោលដៅឱ្យកម្ពុជា ក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងឈានទៅជាប្រទេសចំណូលខ្ពស់នៅឆ្នាំ២០៥០ ។
ការព្យាករកំណើនសេដ្ឋកិច្ចកម្ពុជាពីសំណាក់ស្ថាប័នហិរញ្ញវត្ថុIMF ក៏ស្របទៅនឹងការវាយតម្លៃរបស់គណៈប្រតិភូអង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក៣ផងដែរ ។
លោកស្រីបណ្ឌិត Junhong Chang ប្រធានអង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក៣ (ARMO) បានលើកឡើងនៅក្នុងជំនួបពិភាក្សាការងារជាមួយ លោកបណ្ឌិត អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១២ ខែកញ្ញា ឆ្នាំ២០១៨ ថា ក្នុងឆ្នាំ២០១៨នេះ កម្ពុជានឹងសម្រេចបានកំណើនសេដ្ឋកិច្ចខ្ពស់លើសការគ្រោងទុក គឺក្នុងរង្វង់អត្រា៧,២% ក្នុងនោះចំណូលជាមធ្យមរបស់ប្រជាជនម្នាក់ៗ នឹងកើនឡើងស្ទើរតែស្មើដល់១.៥០០ដុល្លារអាមេរិក ជាមួយអត្រាអតិផរណាទាបប្រមាណ៣%ក្នុងមួយឆ្នាំ គឺស្របពេលដែលសមតុល្យពាណិជ្ជកម្មមានភាពរឹងមាំ និងស្ថានភាពហិរញ្ញវត្ថុល្អប្រសើរ។ ចំណែកការវិនិយោគផ្ទាល់ពីបរទេស ក៏សង្កេតឃើញបន្តកើនឡើង ស្របពេលដែលកម្ពុជារក្សាបាននូវស្ថានភាពបំណុលល្អប្រសើរ និងស្ថានភាពហិរញ្ញវត្ថុសាធារណៈរឹងមាំប្រកបដោយការប្រុងប្រយ័ត្នខ្ពស់ ដោយផ្តោតសំខាន់លើការអភិវឌ្ឍហេដ្ឋារចនាសម្ព័ន្ធរូបវ័ន្ត និងបង្កើនចំណាយលើសេវាសង្គមសំខាន់ៗដូចជា សុខាភិបាល និងអប់រំជាដើម ។
ក្នុងឱកាសនោះ លោកបណ្ឌិត អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានលើកឡើងថា រាជរដ្ឋាភិបាលកម្ពុជា នីតិកាលទី៦នៃរដ្ឋសភា បានរៀបចំនិងដាក់ចេញនូវឯកសារគោលនយោបាយយុទ្ធសាស្ត្រចតុកោណដំណាក់កាលទី៤ ដែលមិនត្រឹមតែសម្រាប់ដោះស្រាយនូវបញ្ហាប្រឈមខាងលើនោះទេ គឺថែមទាំងត្រៀមខ្លួនសម្រាប់បដិវត្តន៍ឧស្សាហកម្មជំនាន់ទី៤ និងសេដ្ឋកិច្ចឌីជីថល ដែលជានិន្នាការថ្មីនៃសេដ្ឋកិច្ចសកលលោកផងដែរ ៕
ចែករំលែកព័តមាននេះ