រាជធានីភ្នំពេញ ៖ សាលាដំបូងរាជធានីភ្នំពេញ កាលពីរសៀលថ្ងៃទី២ ខែតុលា បានលើកយកសំណុំរឿងអតីតប្រពន្ធជនជាតិខ្មែរជាប់ចោទលួចលក់ដីក្រុមហ៊ុនរបស់អតីតប្តីជាជនជាតិអាល្លឺម៉ង់ចំនួន១.១០០ហិកតា នៅស្រុកភ្នំស្រួច ខេត្តកំពង់ស្ពឺ ។
សំណុំរឿងនេះមានជនជាប់ចោទឈ្មោះ នួន ច័ន្ទមករា ភេទស្រី អាយុ៣៧ឆ្នាំ (នៅក្រៅឃុំ) ចំណែកដើមបណ្តឹងឈ្មោះ រ៉ៃន័រ ម៉ារីយ៉ា វ៉ូលនី (Rainer Maria Wollny) ភេទប្រុស អាយុ៧១ឆ្នាំ ជនជាតិអាល្លឺម៉ង់ និង ជានាយកក្រុមហ៊ុន«ដែលតា ដាប់ប៊ែលយូ ត្រេឌីង» (Delta W Trading Co., Ltd) ។ សវនាការដឹកនាំដោយលោក សេង លាង ចៅក្រមជំនុំជម្រះ និងតំណាងអយ្យការលោកស្រី សុឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញ ។
សំណុំរឿងព្រហ្មទណ្ឌដែលសាលាដំបូងរាជធានីភ្នំពេញ លើកយកមកបើកសវនាការនេះ គឺពាក់ព័ន្ធនឹងឯកសារ និងភស្តុតាងថ្មី ក្នុងឆ្នាំ២០១៨ ដែលជនត្រូវចោទបានលួចលក់ដីរបស់ក្រុមហ៊ុនអាល្លឺម៉ង់ចំនួន១.១០០ហិកតា ស្ថិតនៅភូមិទឹកល្អក់ ឃុំដំបូករូង ស្រុកភ្នំស្រួច ខេត្តកំពងស្ពឺ ។
សំណុំរឿងនេះត្រូវបានចៅក្រមជំនុំជម្រះសម្រេចទទួលយក និងបញ្ចូលទៅក្នុងសំណុំរឿងព្រហ្មទណ្ឌ ដែលបានបើកសវនាការជាច្រើនលើក និងមិនទាន់បញ្ចប់នៅឡើយ ។ អង្គសវនាការបានធ្វើឡើងចំពោះមុខគូភាគីដើមចោទ និងចុងចម្លើយ រួមទាំងមេធាវីការពារក្តីឲ្យភាគីទាំងសងខាង និងក្រោមការស្តាប់ពីសាធារណជនផងដែរ ។
សវនាការបានសាកសួរដេញដោលទៅលើដើមចោទ និងចុងចម្លើយ ដែលមានមេធាវីការពារក្តីចុងចោទគឺអ្នកស្រី នួន ច័ន្ទមករា បានបដិសេធរាល់ការចោទប្រកាន់កន្លងមកនោះ និងការបង្ហាញភស្តុតាងបន្ថែមថ្មីៗទៀត និងមិនទទួលស្គាល់នូវលទ្ធផលកោសល្យវិច័យ ចុងក្រោយដោយក្រសួងមហាផ្ទៃ ទៅលើទម្រង់បែបបទឃ្លោងឃ្លា និងខ្លឹមសារទាំងមូលនៃឯកសារដែលអតីតប្តីអាល្លឺម៉ង់បានចោទប្រកាន់ថា ជាឯកសារក្លែងនោះទៀតផង ។
ចុងចម្លើយគឺអ្នកស្រី នួន ច័ន្ទមករា បានព្យាយាមពន្យល់ និងលើកឡើងថា រឿងនេះគឺជារឿងប្តីប្រពន្ធគាត់ មិនមែនជារឿងព្រហ្មទណ្ឌទេ ដូច្នេះគ្មានមូលហេតុណាមួយត្រូវចោទប្រកាន់ និងចាប់គាត់ដាក់ពន្ធនាគារទៅជារឿងព្រហ្មទណ្ឌនោះទេ ។ ចុងចម្លើយដែលក្លាយទៅជាជនជាប់ចោទ បានទទូចស្នើសុំម្តងហើយម្តងទៀត ឲ្យលោកចៅក្រមធ្វើការជំនុំជម្រះឲ្យបានឆាប់ ដែលមិនត្រូវអូសបន្លាយពេលវេលានោះឡើយ ។
ចំពោះសំណួរដែលបានចោទសួរមួយចំនួន ជនជាប់ចោទបានរក្សាសិទិ្ធសុំមិនឆ្លើយទៅនឹងសំណួរដែលបានសួរហើយនោះ ដូចជាឯកសារថ្មីដែលទើបលួចលក់ដី១.១០០ហិកតាក្នុងឆ្នាំ២០១៨ ក្រោយពេលសាលាឧទ្ធរណ៍សម្រេចឲ្យជនត្រូវចោទបាននៅក្រៅឃុំ និងឯកសារមោឃភាពរបស់មេឃុំជាដើម ។
ភាគីដើមចោទ លោក រ៉ៃន័រ ម៉ារីយ៉ា វ៉ូលនី(Rainer Maria Wollny) បានដាក់ចូលនូវភស្តុតាងថ្មីមួយចំនួនទៀត ជាពិសេសគឺភស្តុតាងជាឯកសារដែលដើមចោទចាត់ទុកថា ជាឯកសារប្រភពដើម ឬជាឯកសារច្បាប់ដើមដែលជនជាប់ចោទបានយកទៅក្លែងធ្វើជាកំណត់ហេតុប្រជុំ (ចុះថ្ងៃទី១ មករា ២០១៤) និងជាលិខិតប្រគល់សិទិ្ធ(ចុះថ្ងៃទី៣ មករា ២០១៤) ឲ្យនាងមានសិទិ្ធក្នុងការចាត់ចែងលក់ដីទាំងមូលរបស់ក្រុមហ៊ុន ហើយយកលុយទាំងអស់នោះទៅដាក់ក្នុងហោប៉ៅម្នាក់ឯង ។
ភាគីដើមចោទបានបង្ហាញភស្តុតាងជាឯកសារពីរផ្សេងទៀត ដែលបញ្ជាក់ថា ឈ្មោះ នួន ច័ន្ទមករា ពិតជាបានប្រព្រឹត្តបទល្មើសនៃការលួចលក់ដីរបស់ក្រុមហ៊ុនប្រាកដមែន ។ ក្រៅពីឯកសារលិខិតផ្ទេរសិទ្ធិកាន់កាប់ដីមួយចំនួនរបស់ក្រុមហ៊ុន ដែល នួន ច័ន្ទមករា ផ្ទេរទៅឲ្យភាគីទី៣ដោយគ្មានភាពស្របច្បាប់នោះ គឺឯកសារកិច្ចព្រមព្រៀងលក់ដីនៅភូមិទឹកល្អក់ ឃុំដំបូករូង ស្រុកភ្នំស្រួច ខេត្តកំពង់ស្ពឺ ១.១០០ហិកតា ឲ្យទៅឈ្មោះ សុង ហេង ដោយមានស្មាមមេដៃរបស់អ្នកស្រី និងប្អូនប្រុស នួន ច័ន្ទសត្យា លោកស្មៀនឃុំ កៀត សាខន និងហត្ថលេខា និងត្រារបស់លោកមេឃុំដំបូករូង ខៀវ វណ្ណាផងដែរ ។
អ្នកស្រី នួន ច័ន្ទមករា បានស្នើសុំឲ្យលោកមេឃុំធ្វើមោឃភាពចោលទៅលើលិខិតផ្ទេរសិទិ្ធកាន់
កាប់ដី ចំពោះអ្នកដែលបានទិញដីមួយចំនួនដែលមិនទាន់បានបង់លុយបង្គ្រប់ ។ មិនតែប៉ុណ្ណោះ ជនជាប់ចោទនៅបន្តសកម្មភាពល្មើស ដោយមិនខ្លាចញញើតអ្វីឡើយ ទោះបីជាត្រូវបាននគរបាលព្រហ្មណ្ឌក្រសួងមហាផ្ទៃ ចាប់ខ្លួន និងត្រូវបានចោទប្រកាន់ជាផ្លូវការ ព្រមទាំងឃុំខ្លួនបណ្តោះអាសន្ននៅពន្ធនាគារព្រៃស មួយរយៈមកក៏ដោយ ។
គួររំឭកទៀតថា អ្នកស្រី នួន ច័ន្ទមករា ត្រូវបានចាប់ខ្លួនកាលពីថ្ងៃទី២៨ ខែធ្នូ ឆ្នាំ២០១៦ ហើយត្រូវបានឃុំខ្លួនបណ្តោះអាសន្ន ដើម្បីរង់ចាំការកាត់ក្តី រហូតដល់ថ្ងៃទី៣១ ខែតុលា ឆ្នាំ២០១៧ ទើបមានការអនុញ្ញតដោះលែងឲ្យនៅក្រៅឃុំជាបណ្តោះអាសន្ន ដោយសភាសើុបសួរសាលាឧទ្ធរណ៍ ។
ប៉ុន្តែជនជាប់ចោទត្រូវបានដាក់ឲ្យស្ថិតក្រោមការត្រួតពិនិត្យតាមផ្លូវតុលាការ មិនត្រួវចេញទៅក្រៅប្រទេស ហើយត្រូវបង្ហាញមុខនៅពេលមានដីកាកោះហៅ ។ ក្រោយពីចប់ការសាកសួរដេញដោល ចៅក្រមជំនុំជម្រះបានលើកពេលសវនាការបន្តទៅថ្ងៃទី១២ ខែតុលា ខាងមុខនេះ ៕
ចែករំលែកព័តមាននេះ