ខេត្តកំពង់ឆ្នាំង ៖ ថ្ងៃទី១ ខែតុលា ដែលជាថ្ងៃដំបូងនៃកិច្ចបើកយុទ្ធនាការធ្វើបំលាស់ទីផ្ទះបណ្ដែតទឹកក្នុងខេត្ត ឲ្យទៅកាន់ដីគោកដែលរៀបចំបម្រុងទុកដោយអាជ្ញាធរខេត្ត គឺបានចំនួនជាង១០០ខ្នងផ្ទះដែរមិនតិចទេ ។ អាជ្ញាធរខេត្ត បានធ្វើការអំពាវនាវឲ្យមានការចូលរួមសហការពីម្ចាស់លំនៅឋានដើម្បីឱ្យទាន់ឱកាសទឹកទន្លេកំពុងនៅខ្ពស់…
ខេត្តកំពង់ឆ្នាំង ៖ ថ្ងៃទី១ ខែតុលា ដែលជាថ្ងៃដំបូងនៃកិច្ចបើកយុទ្ធនាការធ្វើបំលាស់ទីផ្ទះបណ្ដែតទឹកក្នុងខេត្ត ឲ្យទៅកាន់ដីគោកដែលរៀបចំបម្រុងទុកដោយអាជ្ញាធរខេត្ត គឺបានចំនួនជាង១០០ខ្នងផ្ទះដែរមិនតិចទេ ។ អាជ្ញាធរខេត្ត បានធ្វើការអំពាវនាវឲ្យមានការចូលរួមសហការពីម្ចាស់លំនៅឋានដើម្បីឱ្យទាន់ឱកាសទឹកទន្លេកំពុងនៅខ្ពស់ ងាយក្នុងការអូសចល័តលើផ្ទៃទឹក ។
លោក ស៊ុន សុវណ្ណរិទ្ធ អភិបាលរងខេត្ត បានផ្ដល់កិច្ចសម្ភាសន៍ក្នុងពេលកំពុងរៀបចំការរុញអូសផ្ទះបណ្ដែតទឹក ដោយមានប្រសាសន៍ថា ការរៀបចំបំលាស់ទីផ្ទះបណ្តែតទឹកនេះ គឺចង់ឱ្យមានបរិស្ថានទឹកល្អ ព្រោះកន្លងមក ដោយសារការរស់នៅលើទឹក ធ្វើឱ្យប៉ះពាល់ដល់បរិស្ថាន ដូចជាការបន្ទោបង់ ការបោះចោលសំរាមធ្វើឱ្យទឹកគគ្រិច ហើយយើងនាំគ្នាបូមទឹកនោះយកទៅបរិភោគ ធ្វើឲ្យប៉ះពាល់ដល់សុខភាពជាដើម។
បញ្ហាមួយទៀត អាជ្ញាធរខេត្តនឹងរៀបចំច្រាំងទន្លេឱ្យក្លាយជាតំបន់ទេសចរណ៍ ដូចជាការរៀបចំបែចិញ្ជឹមត្រី ធ្វើសួនផ្កាជាដើម ។ ហេតុនេះហើយ អាជ្ញាធរខេត្តបានរៀបចំបំលាស់ទីទៅកាន់ទីកន្លែងដែលបានរៀបចំបម្រុងទុក ។ តាមការប្រមាណពីដំបូង មានចំនួនជាង៧០ហិកតា ប៉ុន្តែក្នុងជំហានដំបូងមានត្រឹមតែប្រមាណ៣៥ហិកតាប៉ុណ្ណោះ ។ នៅទីតាំងថ្មី អាជ្ញាធរខេត្តនឹងរៀបចំធ្វើផ្លូវដាក់ប្រព័ន្ធលូបង្ហូរទឹក ដាក់ប្រព័ន្ធទឹកស្អាត ដាក់ភ្លើងអគ្គិសនី មានសាលារៀនផងដែរ ។
លោកអភិបាលរងខេត្តបញ្ជាក់ថា ថ្ងៃដំបូងដែលចាប់ផ្ដើមអនុវត្តទូទាំងខេត្ត ការអូសផ្ទះបំលាស់ទីនៅ៦គោលដៅមាន ស្រុកជលគិរី ស្រុកកំពង់ត្រឡាច និងស្រុកបរិបូណ៌បានចំនួន១១៥ខ្នងផ្ទះ ។ ការធ្វើបំលាស់ទីតាមគោលដៅនេះ គឺតាមសំណូមពររបស់ម្ចាស់ផ្ទះទឹកដែលថា ពួកគាត់នៅកន្លែងណាសុំបំលាស់ទីឡើងគោកនៅទីនោះ ។ ប៉ុន្តែបើតាមផែនការ គឺពួកគាត់ត្រូវមកតាំងទីនៅកន្លែងតែមួយ ស្ថិតក្នុងឃុំស្វាយជ្រំ ស្រុករលាប្អៀរ ។
លោកថា ក្នុងនាមអាជ្ញាធរខេត្ត លោកសូមអំពាវនាវដល់ម្ចាស់ផ្ទះទាំងអស់ ចូលរួមសហការគ្នាដើម្បីអូសផ្ទះបណ្ដែតទឹក ទាន់ទឹកទន្លេនៅកំពុងខ្ពស់ ងាយស្រួលក្នុងការអូស ។ ម្យ៉ាងវិញទៀត បើយើងរុះរើនៅខែប្រាំងនឹងនាំឱ្យខូចខាត ព្រមទាំងចំណាយច្រើន ។
ជាចុងក្រោយ លោកអភិបាលរងខេត្ត បានសុំការយោគយល់អធ្យាស្រ័យពីសំណាក់ម្ចាស់ផ្ទះផងដែរ ព្រោះការធ្វើបំលាស់ទីទៅកន្លែងថ្មី អាចមានការយឺតយ៉ាវក្នុងដាក់ប្រព័ន្ធអគ្គិសនីនិងប្រព័ន្ធទឹកស្អាតជាដើម ។
សូមបញ្ជាក់ថា អ្នករស់នៅលើផ្ទះបណ្តែតទឹកមានចំនួន២.៣៩៥គ្រួសារ គិតជាចំនួនមនុស្ស១ម៉ឺន៨៧នាក់ ។ នៅថ្ងៃដំបូងនៃការអូសផ្ទះបណ្ដែតទឹកទូទាំងខេត្តបានចំនួន១១៥ខ្នងផ្ទះ ហើយក្នុងនោះ ក្រុងកំពង់ឆ្នាំងបាន៧ខ្នង ឃុំតាជេសបាន២០ខ្នង ឃុំព្រែករាំង២៥ខ្នង ស្រុកបរិបូណ៌ ១០ខ្នង ស្រុកកំពង់ត្រឡាចបាន៤៤ខ្នង និងស្រុកជលគិរី បានចំនួន៣ខ្នង ។
បើតាមលោក ឈួរ ច័ន្ទឌឿន អភិបាលខេត្ត ថ្លែងថា យុទ្ធនាការនេះបានអនុវត្តនិងជូនដំណឹងតាំងពីឆ្នាំ២០១៥មកម្ល៉េះ ដែលប្រតិបត្តិការនេះប្រើប្រាស់រយៈពេលជាច្រើនថ្ងៃ ដើម្បីបំលាស់ទីផ្ទះជនជាតិវៀតណាម ដោយធ្វើយ៉ាងណានៅចុងឆ្នាំ២០១៨នេះឱ្យរួចរាល់ មិនអនុញ្ញាតឲ្យមានការមករស់នៅលើផ្ទះបណ្ដែតទឹកទៀតទេ ។
លោក ឈួរ ច័ន្ទឌឿន បញ្ជាក់ថា ការរុះរើផ្ទះជនជាតិវៀតណាមឲ្យទៅនៅលើគោកនេះ មានកិច្ចសហការជាមួយសមាគមវៀតណាមនៅកម្ពុជា ព្រោះសមាគមវៀតណាម បានសហការជាមួយដៃគូឯកជន ដើម្បីផ្ដល់ទីតាំងសម្រាប់តាំងទីលំនៅរបស់ជនជាតិវៀតណាមទាំងអស់នោះ ។
លោកអភិបាលខេត្ត បានលើកឡើងថា កន្លែងដែលជនជាតិវៀតណាមរស់នៅច្រើនជាង
គេ គឺនៅផ្សារក្រោម សង្កាត់កំពង់ឆ្នាំង និងនៅតំបន់ឆ្នុកទ្រូ ក្នុងឃុំឆ្នុកទ្រូ ស្រុកបរិបូណ៌ហើយក្រៅពីនោះនៅស្រុកកំពង់ត្រឡាច និងតំបន់ផ្សេងៗទៀត ។
កន្លងទៅ នៅពេលអាជ្ញាធរចេញសេចក្ដីជូនដំណឹង និងនៅពេលអនុវត្តការងារនេះ ក៏មានការតវ៉ាពីក្រុមជនជាតិវៀតណាមដូចគ្នាដែរ ប៉ុន្ដែអាជ្ញាធរបានប្រើប្រាស់វិធានការរដ្ឋបាលយ៉ាងតឹងរុឹងបំផុត ដើម្បីបន្ដអនុវត្តការងារនេះឲ្យមានប្រសិទ្ធភាពខ្ពស់ ។
យ៉ាងណាមិញ សម្រាប់ការផ្លាស់ទីនេះត្រូវបានលោកអភិបាលខេត្តអះអាងថា ជនជាតិវៀតណាមទាំងអស់នោះ ត្រូវនៅចម្ងាយពីកន្លែងចាស់ប្រមាណ១គីឡូម៉ែត្រ ហើយខ្លះទៀតត្រូវកំណត់ឲ្យទៅរស់នៅឃុំស្វាយជ្រំ ស្រុករលាប្អៀរ ដែលមានទំហំដីរហូតដល់៤០ហិកតា ផ្ដល់ដោយសមាគមវៀតណាម សហការពីដៃគូឯកជន ដោយជួលឲ្យពួកគេស្នាក់នៅ ៕
ចែករំលែកព័តមាននេះ