ខេត្តស្វាយរៀង ៖ មានការភ្ញាក់ផ្អើលទាំងព្រឹកដល់អ្នកភូមិដោយ ក្មេងប្រុស២នាក់បងប្អូនលង់ទឹកប្រឡាយហើយស្រែកឲ្យគេជូយ អ្នកភូមិក៏នាំគ្នាមកជួយស្រង់ចេញពីទឹកដើម្បីសង្គ្រោះ និងបានធ្វើចលនាដៃជើងរលាក់ទឹកចេញរួចបានដឹកមកសង្គ្រោះនៅមន្ទីពេទ្យស្រុក ក៏ប៉ុន្តែជួយបានក្មេងប្រុសជាបង ជាអកុសលក្មេងប្រុសជាប្អូនម្នាក់ទៀតមានសភាពឈ្លក់ទឹកធ្ងន់ធ្ងរពេកក៏បានស្លាប់បន្ទាប់ពីសង្គ្រោះពេលលើកឡើងពីក្នុងទឹក។
ហេតុការណ៍នេះបានកើតឡើងកាលពីវេលាម៉ោង៦និង៣០នាទី ព្រឹកថ្ងៃទី១ ខែតុលា ឆ្នាំ២០១៨ នៅក្នុងភូមិត្រពាំងរំដេញ ឃុំត្រពាំងស្តៅ ស្រុករមាសហែក។
បើតាមសមត្ថកិច្ចនគរបាលស្រុករមាសហែកបានឲ្យដឹងថា ក្មេងប្រុសដែលស្លាប់ ឈ្មោះ វ៉ាន់ ណែត អាយុ១២ឆ្នាំ (ជាប្អូន) ចំណែកក្មេងប្រុសបងសង្គ្រោះទាន់ពេលឈ្មោះ វ៉ាន់ វណ្ណា អាយុ១៥ឆ្នាំ។ ក្មេងប្រុសទាំងពីររស់នៅភូមិត្រពាំងរំដេញ ឃុំត្រពាំងស្តៅ ស្រុករមាសហែក។
បើតាមសាក្សីបានឲ្យដឹងថា មុនកើតហេតុ គេឃើញក្មេងប្រុស២នាក់បងប្អូនកំពុងចុះលេងទឹកប្រឡាយព្រែកជីកនៅឯចុងភូមិ បន្ទាប់មកប្រមាណជាកន្លះម៉ោង ស្រាប់តែឮសម្លេងស្រែកពីក្មេងៗនោះថា «ជួយផងៗលង់ទឹកហើយ» ទើបអ្នកភូមិផ្អើលឆោឡោ ហើយក៏បាននាំគ្នារត់ទៅជួយចុះស្រង់ក្មេងទាំងពីនាក់បងប្អូនចេញពីក្នុងទឹកប្រឡាយដើម្បីជួយសង្គ្រោះជីវិត។
ពេលអ្នកភូមិចុះទៅស្រង់នោះគឺស្រង់បានក្មេងប្រុសជាបងមុន បន្ទាប់មកស្រង់បានក្មេងប្រុសជាប្អូនមកលើកគោកដើម្បីជួយសង្គ្រោះដែរ តែអកុសលជួយបានតែក្មេងប្រុសបងម្នាក់ រីឯក្មេងប្រុសជាប្អូនឈ្លក់ទឹកធ្ងន់ធ្ងរបានសន្លប់បាត់ស្មារតី ក្រោយក៏បានស្លាប់ពេលកំពុងជួយសង្គ្រោះគួរឲ្យសង្វេគ។
មូលហេតុដែលបណ្តាលឱ្យមានករណីនេះកើតឡើង គឺមកពីក្មេងប្រុសទាំង២នាក់បងប្អូនអត់ចេះហែលទឹក តែបែជានាំគ្នាលេងទឹកទើបបណ្តាលឲ្យលង់ទឹកស្លាប់ម្នាក់បែបនេះ ។
ក្រោយពីកើតហេតុ សមត្ថកិច្ចបានមកពិនិត្យសព រួចធ្វើកំណត់ហេតុ និងប្រគល់សពក្មេងប្រុសឈ្មោះ វ៉ាន់ ណែត ទៅក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ