រាជធានីភ្នំពេញ ៖ មន្ត្រីជាន់ខ្ពស់នៃធនាគារជាតិនៃកម្ពុជាបានថ្លែងថា កម្ពុជាត្រូវបានធនាគារពិភពលោកទទួលស្គាល់ថា ជាប្រទេសដែលបានផ្តល់សេវាហិរញ្ញវត្ថុប្រកបដោយភាពងាយស្រួលដល់ប្រជាជន ដោយជាប់ចំណាត់ថ្នាក់ទី៧នៅលើពិភពលោក ក្នុងរបាយការណ៍ការធ្វើធុរកិច្ចឆ្នាំ២០១៧ ។ លោក ជា…
រាជធានីភ្នំពេញ ៖ មន្ត្រីជាន់ខ្ពស់នៃធនាគារជាតិនៃកម្ពុជាបានថ្លែងថា កម្ពុជាត្រូវបានធនាគារពិភពលោកទទួលស្គាល់ថា ជាប្រទេសដែលបានផ្តល់សេវាហិរញ្ញវត្ថុប្រកបដោយភាពងាយស្រួលដល់ប្រជាជន ដោយជាប់ចំណាត់ថ្នាក់ទី៧នៅលើពិភពលោក ក្នុងរបាយការណ៍ការធ្វើធុរកិច្ចឆ្នាំ២០១៧ ។
លោក ជា ចាន់តូ ទេសាភិបាលធនាគារជាតិនៃកម្ពុជា បានថ្លែងបែបនេះនៅក្នុងវេទិកាស្តីពី អាជីពការងារក្នុងវិស័យធនាគារ និងធានារ៉ាប់រង ដែលរៀបចំដោយវិទ្យាស្ថានខេមអេដ ប៊ីហ្សនេស្គូល (CamEd Business School) នៅសណ្ឋាគារ សូហ្វីតែល ភ្នំពេញ ភូគីត្រា កាលពីថ្ងៃទី២៩ កញ្ញា កន្លងមក ។
លោកទេសាភិបាលថ្លែងបន្ដថា វិស័យហិរញ្ញវត្ថុបានរីកចម្រើនយ៉ាងឆាប់រហ័ស ដោយបច្ចុប្បន្ន វិស័យធនាគារ ក៏ដូចជាវិស័យហិរញ្ញវត្ថុមិនមែនធនាគារ ក្នុងនោះរួមមាន វិស័យមូលប័ត្រ វិស័យធានារ៉ាប់រង និងសោធន បានរួម ចំណែកផ្តល់សេវាហិរញ្ញវត្ថុ ព្រមទាំងពង្រឹងការជឿជាក់ និងភាពច្បាស់លាស់ចំពោះអនាគតរបស់ប្រជាជន ។ លោកបញ្ជាក់ថា ៖« គិតត្រឹមពាក់កណ្តាលឆ្នាំ២០១៨នេះ ទ្រព្យសកម្មវិស័យធនាគារមានទំហំប្រមាណ១៦០%នៃផ.ស.ស, ឥណទានចំពោះវិស័យឯកជនមានកម្រិត១០០%នៃផ.ស.ស ហើយប្រាក់បញ្ញើមានកម្រិត៩៣%នៃផ.ស.ស។ ចំណែកឯទន់បម្រុងអន្តរជាតិបានបន្តពូនគរជាលំដាប់ ដែលបច្ចុប្បន្នអាចធានាបានការនាំចូលទំនិញនិងសេវាបានប្រមាណ៦ខែ ដែលស្មើនឹង២ដងនៃកម្រិតដែលប្រទេសកំពុងអភិវឌ្ឍន៍គួរមាន(៣ខែ) ។ ម្យ៉ាងទៀតបរិយាប័ន្នហិរញ្ញវត្ថុបានកើនឡើងយ៉ាងឆាប់រហ័ស ដោយប្រជាជនពេញវ័យប្រមាណ៦៧% កំពុងប្រើប្រាស់សេវាហិរញ្ញវត្ថុ »។
នាយកវិទ្យាស្ថានខេមអេដ ប៊ីហ្សនេស ស្គូល លោក ខេស៊ី បាណេត បានមានប្រសាសន៍ថា ចាប់តាំងពីឆ្នាំ២០០៣មក វិទ្យាស្ថានបានសហការជាមួយក្រសួងសេដ្ឋកិច្ច និងហិរញ្ញវត្ថុបានបណ្តុះបណ្តាលនិស្សិត ACCAនិងCATជាច្រើនជំនាន់រួចមកហើយ ។ ក្នុងនោះ វិទ្យាស្ថានបានខិតខំយ៉ាងខ្លាំង ដើម្បីបង្កើតនូវកាលានុវត្តភាពដល់សាធារណជនទូទៅដោយផ្ដោតសំខាន់លើគុណភាពជាចម្បង ជាពិសេសចំពោះគុណភាពគ្រូបង្រៀន និងកម្មវិធីសិក្សា ដើម្បីឲ្យស្របទៅនឹងមាត្រដ្ឋានជាតិ និងអន្តរជាតិ ។ លោកបន្ដថា ៖« ការរីកចម្រើនវិស័យហិរញ្ញវត្ថុនៅកម្ពុជាក្នុងរយៈពេលពីរទសវត្សរ៍ចុងក្រោយនេះ បានរួមចំណែកបង្កើតការងារដោយផ្ទាល់ និងដោយប្រយោលសម្រាប់សេដ្ឋកិច្ចនៅទូទាំងប្រទេសកម្ពុជា ហើយវិស័យនេះនឹងបន្ដផ្តល់ឱកាសការងារដោយផ្ទាល់និងប្រយោលយ៉ាងច្រើនថែមទៀតនាពេលខាងមុខក្នុងស្ថានភាពដែលសេដ្ឋកិច្ចកម្ពុជាបន្តមានកំណើនខ្ពស់រឹងមាំ »។
ប្រធានសមាគមធនាគារកម្ពុជាស្តីទី លោក ឆារស៍ វ៉ាន់ បានថ្លែងកន្លងមកថា សុខភាពក្នុងវិស័យនេះនៅតែមានភាពល្អប្រសើរ ដោយសារកំណើននៃតម្រូវការឥណទាន និងលំហូរសាច់ប្រាក់ស្ថិតក្នុងកម្រិតមួយអាចគ្រប់គ្រងបាន និងមានកំណើនល្អប្រសើរ ។ លោកបន្តថា ៖« ធនាគារបាននិងកំពុងដើរតួនាទីយ៉ាងសំខាន់ក្នុងសេដ្ឋកិច្ចជាតិ ព្រោះធនាគារដើរតួនាទីជាអ្នកផ្តល់លំហូរសាច់ប្រាក់ក្នុងសេដ្ឋកិច្ច ដើម្បីបង្កើតការងារ និងខ្សែសង្វាក់ផលិតកម្មបានយ៉ាងល្អប្រសើរ »។ លោកថា ៖« បើទោះជាវិស័យនេះមានការប្រកួតប្រជែងកើនឡើង ប៉ុន្តែមិនមានអ្វីដែលគួរឲ្យព្រួយបារម្ភក្នុងទេ ដោយសារធនាគារនីមួយៗបានគោរពក្រមសីលធម៌របស់ពួកគេ » ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ បានថ្លែងថា ក្នុងប៉ុន្មានឆ្នាំចុងក្រោយនេះ លោកកត់សម្គាល់ឃើញថា ប្រព័ន្ធធនាគារក្នុងប្រទេសកម្ពុជាមានការវិវត្តល្អប្រសើរ ដោយសារការចូលមកដល់នៃធនាគារថ្មី ដែលបាននាំយកធនធានមនុស្ស ជំនាញ និងបច្ចេកវិទ្យាថ្មីៗចូលមកកាន់ប្រទេសកម្ពុជា ដែលធ្វើឲ្យយើងកាន់តែរីកចម្រើន និងមានធនធានមនុស្សកាន់តែច្រើន ព្រោះពេលពួកគេនាំយកបច្ចេកវិទ្យាថ្មីចូលមក ពួកគេនឹងបណ្តុះបណ្តាលធនធានមនុស្សកម្ពុជា ដើម្បីបម្រើសេវាកម្ម ក៏ដូចជាជួយសម្រួលប្រព័ន្ធទូទាត់បានយ៉ាងរលូន ។ លោកបន្តថា ៖« ជាទូទៅ សុខភាពក្នុងវិស័យនេះនៅតែល្អ កម្រិតឥណទានមានកំណើនអាចគ្រប់គ្រងបាន និងឥណទានមានបញ្ហា ក៏ស្ថិតក្នុងកម្រិតមួយល្អប្រសើរផងដែរ » ៕
ចែករំលែកព័តមាននេះ