ខេត្តសៀមរាប ៖ បែកធ្លាយរឿងបុគ្គលិកអគ្គិសនី២នាក់ ដែល ទើបនឹងចូលបំរើការងារ ជំរិតទារលុយ៨ពាន់ដុល្លារពីអតិថិជនសុំតភ្លើងនៅម្តុំផ្សារក្រឡាញ់ ហើយតថ្លៃគ្នាសុំបាននៅសល់ត្រឹម៣.៥០០ដុល្លារ បែរជាលោកប្រធានរត់ការទៅអគ្គនាយកឱ្យនៅ ចំណែកបុគ្គលិកនៅជិត១០ឆ្នាំម្នាក់ ទៅតភ្លើងអតិថិជនឱ្យ១៥០ដុល្លារ…
ខេត្តសៀមរាប ៖ បែកធ្លាយរឿងបុគ្គលិកអគ្គិសនី២នាក់ ដែល ទើបនឹងចូលបំរើការងារ ជំរិតទារលុយ៨ពាន់ដុល្លារពីអតិថិជនសុំតភ្លើងនៅម្តុំផ្សារក្រឡាញ់ ហើយតថ្លៃគ្នាសុំបាននៅសល់ត្រឹម៣.៥០០ដុល្លារ បែរជាលោកប្រធានរត់ការទៅអគ្គនាយកឱ្យនៅ ចំណែកបុគ្គលិកនៅជិត១០ឆ្នាំម្នាក់ ទៅតភ្លើងអតិថិជនឱ្យ១៥០ដុល្លារ បែរជាដកចេញពីក្របខណ្ឌកាលពីប៉ុន្មានខែមុន។
បើតាមប្រភពពីអ្នករាយការណ៍ចេញពីក្នុងក្រុមហ៊ុនអគ្គិសនីខេត្តឈ្មោះ សែម រតនៈ ភេទប្រុស បានប្រាប់តាមទូរស័ព្ទនៅព្រឹកថ្ងៃទី២៨ ខែកញ្ញា ឆ្នាំ២០១៨ រៀបរាប់ថា នៅថ្ងៃទី១៦ ខែសីហាឆ្នាំ២០១៨នេះ ត្រូវបានអង្គភាពលុបឈ្មោះចេញពីក្របខ័ណ្ឌអគ្គិសនីកម្ពុជា ដែលមានចំណារឯកភាពចុះហត្ថលេខា ដោយផ្ទាល់ពីឯកឧត្តម កែវ រតនៈ ទទួលបន្ទុកអគ្គិសនីកម្ពុជា ដោយគេចោទប្រកាន់មកលើរូបលោកថា យករថយន្តរបស់អង្គភាពទៅជិះដើរលេងផឹកស៊ីសាធារណៈ ខណៈពេលនោះរូបខ្ញុំ ក៏បានទទួលកំហុស និងព្រមធ្វើកិច្ចសន្យា ជាមួយអង្គភាពរួចរាល់អស់ហើយដែរ។
លោកបានរៀបរាប់បន្តថា ក្រោយមកមានករណីអតិថិជនបានប្តឹងចោទខ្ញុំថា យកលុយពីគេចំនួន១៥០ដុល្លារ ដើម្បីដាក់ពាក្យតភ្លើងថ្មីឱ្យគាត់ ដែលមានកម្លាំង ២Px២០A ខណៈពេលនោះខ្ញុំបាទបានរៀបចំដាក់ជូនគាត់រួចរាល់ផងដែរ។ ហើយទឹកប្រាក់ដែលនៅសល់ចំនួន៥០ដុល្លារប៉ុណ្ណោះ ចំពោះករណីនេះមិនមែនរូបខ្ញុំបាទ ទៅជីរិតទារប្រាក់ពីគាត់នោះទេ គឺគាត់ប្រើឱ្យបងប្អូនគាត់មកពឹងពាក់រូបខ្ញុំឱ្យជួយទេ ចុងក្រោយបែរជាខ្ញុំមានទោស ជំរិតទារលុយគេទៅវិញ។
ពីព្រោះបុគ្គល ដូចរូបខ្ញុំនេះ នៅក្នុងខេត្តសៀមរាប ទាំងមូល ភាគច្រើនឱ្យតែមានបញ្ហារឿងអគ្គិសនី គឺគេតែងតែមករករូបខ្ញុំ ព្រោះខ្ញុំនៅជិតមេស្រាប់ ។ សូម្បីតែលោកស្នងការនគរបាលខេត្ត ឱ្យតែគាត់មានបញ្ហារឿងភ្លើង គាត់តែងតែខលមករកខ្ញុំឱ្យជួយចុះទៅមើលភ្លើង។
លោកបានបញ្ជាក់ទៀតថា ក្នុងពេលថ្មីៗនេះ បុគ្គលិកអគ្គិសនីសៀមរាប ចំនួន២រូប បានទៅជំរិតទារលុយពីអតិថិជនដែលមានម្ចាស់ផ្ទះឈ្មោះ តាំង ប៊ុន ហៃ ដែលមានទីលំនៅភូមិត្រពាំងសេះ សង្កាត់គោកចក ក្រុង/ខេត្តសៀមរាប ហើយមានទីតាំងប្រើប្រាស់អគ្គិសនីលេខកូដ ១៩៣០២២០A ដោយទាមទារតម្លៃតភ្លើង ចំនួន ៨០០០ដុល្លារគត់។
ក្រោយមកម្ចាស់សុំចរចាបាននៅសល់ត្រឹមតែ៣៥០០ដុល្លារគត់ ហើយក៏ឯកភាពគ្នាចាប់ផ្តើមចូលតភ្លើងភ្លាម។ បន្ទាប់មកម្ចាស់ផ្ទះក៏បានឯកភាព ដើម្បីតខ្នែងខ្សែមេ ABC (មានន័យថា ខ្សែធំខ្មៅ) ចូលទៅក្នុងផ្ទះល្វែង របស់គាត់ចំនួន៤ល្វែង ដែលមានចម្ងាយពីផ្ទះប្រហែល១៥០ម៉ែត្រប៉ុណ្ណោះ។
តើអ្នកដែលជំរិតទារលុយពីអតិថជននេះខុសឬត្រូវ? បើតាមគោលការណ៍របស់អគ្គិសនីកម្ពុជា ដែរឬទេ? ព្រោះកន្លងមកមិនដែលមានទេ នៅក្នុងអង្គភាពអគ្គិសនី ទើបតែបុគ្គលិកថ្មី២នាក់នេះទេ ដែលធ្វើឱ្យមានប្រតិកម្មកើតឡើងផ្អើលពេញអង្គភាពបែបនេះ ហើយគ្មានមេណាដកចេញទៀត នេះបានចំជាខ្សែធំមែន។
លោកបានរៀបរាប់ថា បើតាមប្រភពចេញពីក្នុងអង្គភាពដែលគេស្រឡាញ់រាប់អានខ្ញុំ លួចខ្សឹប ប្រាប់ថា លោកប្រធានកំពុងដុតដៃដុតជើង ដើម្បីជួយអន្តរាគមន៍ដល់ពួកគេទាំង២នាក់ កុំឱ្យថ្នាក់លើដកចេញពីក្របខ័ណ្ឌអគ្គិសនីកម្ពុជា ដូចរូបខ្ញុំ ដោយយកលេសថា បុគ្គលិកទាំង២នាក់នោះ គឺជាសកម្មជនរបស់គណបក្សប្រជាជនកម្ពុជា ដែលបានចុះជួយខេត្តពោធិ៍សាត់។
បើគិតពីរឿងគណៈបក្សវិញ រូបខ្ញុំបាទ សែម រតនៈ ចូលធ្វើការតាំងពីជំនាន់អតីតលោកជាម កោសេន ប្រធានអគ្គិសនីចាស់ អាណត្តិទី១ រហូតដល់អាណតិ្តទី៦ គឺមានមុខរូបខ្ញុំរហូត តើហេតុអ្វី គ្រាន់តែខុសបន្តិច គេដកខ្ញុំចេញពីក្របខ័ណ្ឌមន្ត្រីអគ្គិសនីកម្ពុជា? គឺជំនាន់លោក គង់ ពុទ្ធី ប្រធានអគ្គិសនី នៅ ហើយទើបមកកាន់បាន ១អាណត្តិ ក៏ត្រូវថ្នាក់លើប្តូរទៅនៅភ្នំពេញវិញ ឥឡូវមកមេថ្មី ឈ្មោះ គង់ ផល្លា ទើបបានជំនួសលោក គង់ ពុទ្ធី បានរយៈពេលជាង១ខែប៉ុណ្ណោះ។
ជុំវិញករណីខាងលើនេះដែរ កោះសន្តិភាពមិនអាចសុំការបំភ្លឺពីលោក គង់ ពុទ្ធី ប្រធានអគ្គិសនីចាស់បានទេ នៅព្រឹកថ្ងៃទី២៨ ខែកញ្ញា ឆ្នាំ២០១៨នេះ ដើម្បីសួរពីមូលហេតុ ប៉ុន្តែទាក់ទងអត់បាន ដោយសារទូរស័ព្ទរបស់លោកនៅក្រៅតំបន់សេវា។ ចំណែកប្រធានអគ្គិសនី ទើបឡើងថ្មី កោះសន្តិភាព មិនអាចសុំការពន្យល់បានទេ ដោយមិនទាន់បានស្គាល់លេខទូរស័ព្ទ។ រីឯម្ចាស់ផ្ទះដែលត្រូវមន្ត្រីអគ្គិសនីជំរិតទារលុយ៨០០០ដុល្លារនោះ ក៏មិនអាចទាក់ទងបានដែរ៕
ចែករំលែកព័តមាននេះ