ខេត្តសៀមរាប ៖ រថយន្តបាឡែនប៉ះជាមួយរថយន្តកូរ៉ូឡាមួយចំហៀងខ្លួនដែលបើកក្នុងទិសដៅស្របទិសគ្នា (ចេញពីស្រុកស្វាយលើចូលមកក្នុងក្រុងសៀមរាប) ពីជើងមកត្បូង ហើយខំប្រឹងបើករត់គេច ប៉ុន្តែត្រូវបានប៉ូលិសស្រុកសូទ្រចេញស្ទាក់ចាប់ ឃាត់បានទាំងរថយន្តដឹកឈើ និងម្ចាស់បន្ទាប់ពីមានពាក្យបណ្តឹង ខណៈពេលនោះក៏បានធ្វើការឆែកក្នុងរថយន្តបង្ក…
ខេត្តសៀមរាប ៖ រថយន្តបាឡែនប៉ះជាមួយរថយន្តកូរ៉ូឡាមួយចំហៀងខ្លួនដែលបើកក្នុងទិសដៅស្របទិសគ្នា (ចេញពីស្រុកស្វាយលើចូលមកក្នុងក្រុងសៀមរាប) ពីជើងមកត្បូង ហើយខំប្រឹងបើករត់គេច ប៉ុន្តែត្រូវបានប៉ូលិសស្រុកសូទ្រចេញស្ទាក់ចាប់ ឃាត់បានទាំងរថយន្តដឹកឈើ និងម្ចាស់បន្ទាប់ពីមានពាក្យបណ្តឹង ខណៈពេលនោះក៏បានធ្វើការឆែកក្នុងរថយន្តបង្ក ស្រាប់តែឃើញសុទ្ធតែឈើ រួចនាំយកមកអធិការស្រុកតែម្តង ដើម្បីដោះស្រាយ ។
ហេតុការណ៍ឃាត់រថយន្តដឹកឈើបង្កនោះ គឺធ្វើឡើងនៅវេលាម៉ោង១៧និង៣០នាទីល្ងាចថ្ងៃទី២៧ ខែកញ្ញា ឆ្នាំ២០១៨ ស្ថិតនៅចំណុចភូមិសាលាកកោះ ឃុំកៀនសង្កែ ស្រុកសូទ្រនិគម ខេត្តសៀមរាប ។ លោកវរសេនីយឯក ណុប សារ៉ាក់ អធិការស្រុកសូទ្រនិគមបានប្រាប់តាមទូរស័ព្ទ នៅរសៀលថ្ងៃទី២៨ ខែកញ្ញានេះថា ដោយយោងតាមពាក្យបណ្តឹងតាមទូរស័ព្ទមកអធិការស្រុកថា មានរថយន្តបាឡែនប៉ះជាមួយរថយន្តកូរ៉ូឡាមួយចំហៀងខ្លួន ដែលរថយន្តទាំង២នេះ បើកស្របទិសគ្នាពីជើងមកត្បូង (ចេញពីស្រុកស្វាយលើ ចូលមកក្នុងក្រុងសៀមរាប) ហើយបើករត់គេចខ្លួនរួចមក លោកក៏បានសុំគោលការណ៍ទៅថ្នាក់លើនៅថ្ងៃទី២៨ខែកញ្ញា ឆ្នាំ២០១៨ ដើម្បីដឹកនាំកម្លាំងចុះស្ទាក់ នៅតាមដងផ្លូវ ចាប់យករថយន្តបង្កនោះមកដោះស្រាយគ្នានៅអធិការស្រុក ។
បន្ទាប់មកសមត្ថកិច្ចយើងក៏ចាប់បានទាំងរថយន្ត និងម្ចាស់រួចនាំយកទៅអធិការស្រុកធ្វើការដោះស្រាយគ្នាបញ្ចប់រឿង ។ ប៉ុន្តែក្រោយពីបញ្ចប់រឿងសំណងទៅឱ្យជនរងគ្រោះនូវទឹកប្រាក់ចំនួន៩០ម៉ឺនរៀលរួចមក ខណៈពេលនោះកម្លាំងយើងក៏បានធ្វើការឆែកនៅក្នុងរថយន្តបាឡែនដែលបើករត់មិនរួច ឃើញសុទ្ធតែឈើពេញឡាន ។
លោកបានបញ្ជាក់ផងដែរថា ឈើដែលកម្លាំងយើងឃាត់បាននាថ្ងៃនេះ គឺយើងបានធ្វើការប្រគល់ឱ្យមន្ត្រីជំនាញយកទៅរក្សាទុកនៅសង្កាត់ព្រៃឈើសូទ្រនិគម ។ រីឯម្ចាស់រថយន្តដឹកឈើត្រូវបានឱ្យត្រឡប់ទៅផ្ទះវិញដោយសារមានការចូលខ្លួនដោះស្រាយសំណងទៅឱ្យម្ចាស់រថយន្តដែលរងគ្រោះម្ខាងទៀតនូវទឹកប្រាក់ចំនួន៩០ម៉ឺនរៀលផងដែរ ដើម្បីបញ្ចប់រឿង ។ ព័ត៌មានពិស្តារមានផ្សាយជូននៅកាសែតកោះសន្តិភាព ។
ចែករំលែកព័តមាននេះ