ខេត្តកំពង់ឆ្នាំង ៖ យោងតាមសេចក្តីជូនដំណឹងរបស់សាលាខេត្ត ក៏ដូចជាយោងតាមស្មារតីអង្គប្រជុំ កាលពីថ្ងៃទី២៤ កញ្ញា ស្តីពីបំលាស់ទីអ្នករស់នៅលើផ្ទះបណ្ដែតទឹកទូទាំងខេត្ត ឱ្យទៅរស់នៅលើដីគោកដែលកំណត់ទុកដោយអាជ្ញាធរខេត្តនឹងប្រព្រឹត្តទៅចាប់ពីថ្ងៃទី១ ខែតុលាខាងមុខនេះ ដើម្បីស្តារបរិស្ថានល្អក្នុងទន្លេ…
ខេត្តកំពង់ឆ្នាំង ៖ យោងតាមសេចក្តីជូនដំណឹងរបស់សាលាខេត្ត ក៏ដូចជាយោងតាមស្មារតីអង្គប្រជុំ កាលពីថ្ងៃទី២៤ កញ្ញា ស្តីពីបំលាស់ទីអ្នករស់នៅលើផ្ទះបណ្ដែតទឹកទូទាំងខេត្ត ឱ្យទៅរស់នៅលើដីគោកដែលកំណត់ទុកដោយអាជ្ញាធរខេត្តនឹងប្រព្រឹត្តទៅចាប់ពីថ្ងៃទី១ ខែតុលាខាងមុខនេះ ដើម្បីស្តារបរិស្ថានល្អក្នុងទន្លេ ដោយគ្មានអ្នករស់នៅលើទឹកទៀតនោះទេ ។
មុននេះ មានព័ត៌មានថា អ្នកដែលត្រូវបំលាស់ទីមានជាង១ពាន់គ្រួសារ តែតាមព័ត៌មានថ្មី មានជាង៣ពាន់គ្រួសារឯណោះ និងមិនមែនតែផ្ទះទឹកនៅក្រុងកំពង់ឆ្នាំងនោះទេ តែផ្ទះទឹកក្នុងស្រុកចំនួន៤ក៏តម្រូវឱ្យឡើងគោកដែរ ។
ទាក់ទងនឹងបញ្ហានេះ លោក ស៊ុន សុវណ្ណរិទ្ធ អភិបាលរងខេត្ត កាលពីល្ងាចថ្ងៃទី២៥ ខែកញ្ញាបានមានប្រសាសន៍ថា អាជ្ញាធរខេត្តនឹងផ្សព្វផ្សាយសេចក្តីជូនដំណឹងពីផែនការខាងលើនេះដល់ប្រជាពលរដ្ឋដែលកំពុងរស់នៅលើផ្ទះបណ្តែតទឹកក្នុងទន្លេទូទាំងខេត្ត ដើម្បីចូលរួមអនុវត្តផែនការ៥ឆ្នាំរបស់ខេត្ត គឺពីឆ្នាំ២០១៥ ដល់២០១៩ ឱ្យទទួលបានជោគជ័យ ។
អ្នករស់នៅលើផ្ទះបណ្តែតទឹកទាំងអស់រួមមាន ចំណុចចុងកោះ ក្នុងក្រុងកំពង់ឆ្នាំង ឃុំឆ្នុកទ្រូ ស្រុកបរិបូណ៌ ឃុំកោះថ្កូវ និងឃុំពាមឆ្កោក ស្រុកជលគិរី ឃុំសែប និងឃុំតាជេស ស្រុកកំពង់ត្រឡាច និងស្រុកកំពង់លែងផងដែរ ។
អ្នករស់នៅទាំងនោះ ត្រូវបំលាស់ទីទៅរស់នៅលើទីតាំងមួយកន្លែង ស្ថិតក្នុងឃុំស្វាយជ្រំ ស្រុករលាប្អៀរ ។ ទោះជាយ៉ាងនេះក្តី លោកអភិបាលរងខេត្តមានប្រសាសន៍ថា ការអនុវត្ត នឹងចាប់ផ្តើមជាជំហានៗ ដោយចាប់ពីក្រុងកំពង់ឆ្នាំងមុនគេ និងបន្ទាប់មក ឃុំកោះថ្កូវ ឃុំពាមឆ្កោក ដែលអាចអូសតាមបណ្តោយទឹកទន្លេ ហើយជំហានបន្ទាប់ ឃុំឆ្នុកទ្រូជាដើម ។
តាមផែនការរបស់សាលាខេត្ត បំលាស់ទីផ្ទះបណ្តែតទឹកនេះ គឺធ្វើក្នុងឆ្នាំ២០១៩នោះទេ ប៉ុន្តែដោយសារស្ថានភាពអំណោយផល ទឹកទន្លេឆ្នាំនេះឡើងខ្ពស់ យើងអាចអូសផ្ទះបណ្តែតទឹកទាំងនោះមកនៅទីតាំងដែលបានរៀបចំទុក ហើយនៅពេលទឹកស្រក ពួកគាត់រស់នៅទីនោះតែម្តង ។
សូមបញ្ជាក់ថា សម្រាប់ប្រជាពលរដ្ឋរស់នៅលើផ្ទះបណ្តែតទឹកទូទាំងខេត្តកំពង់ឆ្នាំង មានជាង៣ពាន់គ្រួសារ ក្នុងនោះនៅក្រុងកំពង់ឆ្នាំងមានជាង១ពាន់គ្រួសារ និងនៅស្រុកបរិបូណ៌ស្រុកកំពង់ត្រឡាច ស្រុកជលគិរី និងកំពង់លែង សរុបមានជាង២ពាន់គ្រួសារ ។ ប្រជាពលរដ្ឋទាំងនោះ នឹងត្រូវឱ្យមករស់នៅក្នុងឃុំស្វាយជ្រំ ស្រុករលាប្អៀរ ដែលអាជ្ញាធរខេត្តនឹងស្នើសុំកាត់ដីអនុប្រយោគ ដីព្រៃលិចទឹកពីរាជរដ្ឋាភិបាល មានទំហំជាង៤០ហិកតា ។
គណៈកម្មការរៀបចំអូសផ្ទះបណ្តែតទឹកក្នុងផែនការនេះមានចំនួន៦ក្រុម ក្នុង១ក្រុមដឹកនាំដោយ លោក ស៊ុន សុវណ្ណរិទ្ធ អភិបាលរងខេត្ត និងគណៈកម្មការ៥ក្រុមទៀត ដឹកនាំដោយលោកស្នងការនគបារលខេត្ត ជាប្រធាន និងអភិបាលស្រុកពាក់ព័ន្ធជាអនុប្រធាន នៅក្នុងបំលាស់ទីផ្ទះបណ្តែតទឹកទាំងអស់នេះ ។
ចែករំលែកព័តមាននេះ