ខេត្តកំពង់ឆ្នាំង ៖ អ្នកប្រកបមុខរបរលក់ប្រេងឥន្ធនៈ ជាងជួសជុលម៉ាស៊ីន និងជួសជុលអាគុយ ព្រមជាមួយកាកសំណល់ផ្ទះបាយ និងការបន្ទរបង់របស់អ្នករស់នៅលើផ្ទះបណ្តែតទឹកសុទ្ធតែត្រូវបានទម្លាក់ចូលទឹកទន្លេទាំងអស់ដែលធ្វើឱ្យប៉ះពាល់បរិស្ថាន និងសុខភាពដល់អ្នកប្រើប្រាស់ទឹកយ៉ាងធ្ងន់ធ្ងរ ។
លោក ឈួរ ច័ន្ទឌឿន អភិបាលខេត្តកំពង់ឆ្នាំងមានប្រសាសន៍បែបនេះនៅក្នុងពិធីក្រុងពាលីដើម្បីរៀបចំបន្លាស់ទីផ្ទះបណ្ដែតទឹកដែលនឹងត្រូវអនុវត្តចាប់ពីថ្ងៃទី១ ខែតុលា ឆ្នាំ២០១៨ ខាងមុខនេះ ។ ពិធីនេះបានធ្វើឡើងនៅកំពង់ផែដើមពោធិ៍ ឃុំផ្សារឆ្នាំង ក្រុងកំពង់ឆ្នាំង នាព្រឹកថ្ងៃទី ២៧ ខែកញ្ញា ឆ្នាំ២០១៨ ដោយមានការអញ្ជើញចូលរួមពីមន្ត្រីរាជការកងកម្លាំងប្រដាប់អាវុធនិងសមាគមវៀតណាមជាច្រើនរូបទៀត ។
លោកអភិបាលខេត្តកំពង់ឆ្នាំងបានបន្តថា ជាការពិតណាស់អ្នកដែលរស់នៅលើផ្ទះបណ្ដែតទឹកសុទ្ធតែត្រូវបានចាក់កាកសំណល់ទាំងអស់ក្នុងនោះការបន្ទោបង់ចូលទៅក្នុងទន្លេបង្កឱ្យប៉ះពាល់ដល់បរិស្ថាន និងពិសេសដល់អ្នកប្រើប្រាស់ទឹកក្នុងក្រុងកំពង់ឆ្នាំងគឺសុទ្ធតែប្រើទឹកបូមពីទន្លេទាំងអស់ដែលធ្វើអោយប៉ះពាល់សុខភាពដល់ប្រើប្រាស់ទឹកដោយផ្ទាល់ ។
ក្នុងផែនការអភិវឌ្ឍន៍ខេត្តដែលនឹងត្រូវអូសផ្ទះបណ្ដែតទឹកទាំងនោះអោយទៅនៅទីតាំងមួយកន្លែងដែលអាជ្ញាខេត្តកំពុងតែរៀបចំស្រាប់ហើយជាមួយគ្នានោះអាជ្ញាធរខេត្តក៏នឹងសុំកាត់ដីនៅទីនោះចេញពីអនុប្រយោគរបស់តំបន់ដីព្រៃលិចទឹកពីរាជរដ្ឋាភិបាលផងដែរ ។ ការទៅតាំងទីលំនៅថ្មីនោះទេនោះនឹងបង្កើតជាភូមិ ជាសហគមន៍ និងរៀបចំប្រព័ន្ធផ្លូវ ទឹកភ្លើង និងមានសាលារៀនផងដែរ ។ អ្នកទៅរស់នៅទីនោះមានវៀតណាម មានខ្មែរ និងខ្មែរឥស្លាម ផងដែរ ។
សូមបញ្ជាក់ផងដែរ ប្រជាពលរដ្ឋដែលនឹងបន្លាស់ទីទៅតាំងទីលំនៅថ្មីនៅឃុំស្វាយជ្រុំ ស្រុករលាប្អៀរ មានចំនួនជាង៣ពាន់គ្រួសារ ក្នុងនោះមានជនអន្តោប្រវេសន៍វៀតណាមរស់នៅលើផ្ទះបណ្តែតទឹកចំនួន២០៣៤គ្រួសារ ក្រៅពីនោះមានខ្មែរ និងខ្មែរឥស្លាម ដែលកំពុងរស់នៅលើផ្ទះបណ្តែតទឹកក្នុងក្រុងកំពង់ឆ្នាំង, ក្នុងស្រុកបរិបូរណ៍ ស្រុកកំពង់ត្រឡាច និងស្រុកជលគីរី ៕
ចែករំលែកព័តមាននេះ