ខេត្តបន្ទាយមានជ័យ ៖ ស្ត្រីម្នាក់ធ្លាប់ជាប់ពន្ធនាគា១លើករួចមកហើយក្នុងករណីឆបោកលុយ២ពាន់ដុល្លារមិនរៀងចាល បន្ទាប់មកបានឆបោកលុយ២លានរៀលទៀតត្រូវចាប់ខ្លួនត្រូវបានបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី២៥ ខែកញ្ញា ឆ្នាំ២០១៨។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យបានប្រាប់ថា៖ជនសង្ស័យដែលត្រូវចាប់ខ្លួនក្នុងករណីឆបោកខាងលើឈ្មោះ ហ៊ាង ស្រីនាង ភេទស្រី អាយុ៣២ឆ្នាំ មុខរបរលក់ដូរ រស់នៅភូមិត្រសេកជ្រុំ ឃុំម៉ាឡៃ ស្រុកម៉ាឡៃ។
លោកបានបញ្ជាក់ថា នៅពេលឃាត់ខ្លួន ស្ត្រីជាជនសង្ស័យក្នុងករណីឆបោកនោះគឺកម្លាំងកងរាជអាវុធហត្ថខេត្តបន្ទាយមានជ័យបានសហការជាមួយកម្លាំងកងរាជអាវុហត្ថខេត្តសៀមរាបធ្វើការស្រាវជ្រាវ និងកំណត់មុខសញ្ញា ក្រោយពេលជនសង្ស័យរូបនេះបានប្រើល្បិចឆបោកតាមរយៈបណ្តាញសង្គមហ្វេសបុកដែលទាក់ទងតាមទូរស័ព្ទអោយវេរលុយតាមវីង ដែលជនសង្ស័យទទួលនៅចំណុចវីង ស្ថិតភូមិកណ្តាល ឃុំសំរោង ស្រុកអូរជ្រៅ។
លោកវរៈសេនីយ៍ឯក ម៉ែន ភិរម្យ បានបញ្ជាក់ថា ក្រោយពេលដែលជនសង្ស័យកំពុងទទួលលុយតាមរយៈ
វីង កម្លាំងសមត្ថកិច្ចបានធ្វើការស្រាវជ្រាវ និងកំណត់មុខសញ្ញាឃាត់ស្ត្រីជនសង្ស័យម្នាក់រួមទាំងវត្ថុតាងលុយចំនួន២លានរៀល និងទូរស័ព្ទ១គ្រឿងនៅថ្ងៃទី២៤ ខែកញ្ញា ឆ្នាំ២០១៨នៅចំណុចភូមិត្រសេកជ្រុំ ឃុំម៉ាឡៃ ស្រុកម៉ាឡៃ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបានបញ្ជាក់ថា ស្ត្រីជាជនសង្ស័យខាងលើដែលត្រូវឃាត់ខ្លួនក្នុងករណីឆបោកនេះគឺកម្លាំងកងរាជអាវុធហត្ថខេត្តបន្ទាយមានជ័យបានសហការជាមួយកម្លាំងកងរាជអាវុធហត្ថខេត្តសៀមរាបបញ្ជូនមកធ្វើការសាកសួរ ។
តាមចម្លើយសារភាព គឺស្ត្រីជាជនសង្ស័យធ្លាប់ជាប់ពន្ធនាគារ១លើករួចមកហើយ ក្នុងករណីឆបោកលុយពីបុរសម្នាក់ដែលស្គាល់គ្នាតាមបណ្តាញសង្គមហ្វេសប៊ុក ហើយលួងលោមអោយវេរលុយតាមវីងចំនួន២ពាន់ដុលា្លរ ហើយត្រូវសមត្ថកិច្ចចាប់ខ្លួនម្តងរួចមកហើយ នៅតែមិនរៀងចាល និងបានប្រើល្បិចឆបោកលុយអ្នកខេត្តសៀមរាបចំនួន២លានរៀលវេរតាមវីង រួចត្រូវសមត្ថកិច្ចចាប់ខ្លួនម្តងទៀតនៅខេត្តបន្ទាយមានជ័យដើម្បីកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់៕
ចែករំលែកព័តមាននេះ