ខេត្តមណ្ឌលគិរី ៖ អធិការនគរបាលស្រុកកែវសីមា ដែលទើបឡើងកាន់ដំណែងថ្មីៗ ទទួលបានការសាទរយ៉ាងខ្លាំង ពីប្រជាពលរដ្ឋ ក្រោយលោកអធិការបានដឹកនាំកម្លាំងចុះបង្ក្រាប ការលួចលេងល្បែងគ្រប់ប្រភេទក្នុងមូលដ្ឋាន ។
ការចុះប្រតិបត្តិការខាងលើ បានចាប់ផ្តើមតាំងពីសប្តាហ៍ទី១ រហូតមកដល់ដើមសប្តាហ៍ទី៤ ខែកញ្ញានេះ ដោយឃាត់ បានអ្នកញៀនល្បែងបៀនឹងមេឆ្នោតកន្ទុយលេខវៀតណាមចំនួន៨នាក់ នៅតាមខ្នងផ្ទះ ក្រោយពេលដែលល្បែង ឆ្នោតវៀតណាម និងល្បែងបៀកំពុងពង្វក់ស្មារតីប្រជាពលរដ្ឋ អ្នកញៀនល្បែងជាយូរមកហើយនោះ ។
លោកវ៉ាន់ ដានីន អធិការនគរបាលស្រុកកែវសីមាឲ្យដឹងថា នេះជាលើកទី១ សម្រាប់លោកដែលបានបើកយុទ្ធនា ការបង្ក្រាបអ្នកលេងល្បែងស៊ីសង ខណៈដែលលោកទើបឡើងកាន់ដំណែងជាអធិការស្រុកបានមួយរយៈពេលមកនេះ ។ លោកអធិការថា ចំពោះរបាយការណ៍នគរបាលដែលសម្រេចបានក្នុងខែកញ្ញានេះ លើមុខសញ្ញាល្បែងស៊ីសង សមត្ថកិច្ចឃាត់ខ្លួនមេឆ្នោត និងអ្នកលេងបៀជាច្រើននាក់ ។
ដោយក្នុងនោះមានទី១- ឈ្មោះ អ៊ឹង សុឃីម ភេទស្រី ទី២- ឈ្មោះ ឆៃ ម៉ូរ៉ា ភេទប្រុស ទី៣- ឈ្មោះ ផន នា ភេទស្រី ទី៤- ឈ្មោះ ហេង ចាន់ថុល ហៅរិទ្ធ ភេទស្រី ទី៥- ឈ្មោះ លី ប៊ុនហេង ភេទប្រុស អ្នកទាំងអស់នេះត្រូវបានសមត្ថកិច្ចព្រមាន និងធ្វើកិច្ចសន្យាបញ្ឈប់ការកត់លេខឆ្នោត (កន្ទុយលេខវៀតណាម) ។
លោកវ៉ាន់ ដានីន បន្តថា ដោយឡែកឈ្មោះ ឈាង តែស្រ៊ីន ភេទស្រី ឈ្មោះចាន់ ឌី ភេទប្រុស និងឈ្មោះ ហាង តាម ភេទស្រី បានរងនូវការព្រមាន និងធ្វើកិច្ចសន្យាបញ្ឈប់ការផ្តល់ទីតាំងលេងល្បែងបៀ ។ លោកអធិការបន្តថា មនុស្សទាំងអស់ខាងលើ និងត្រូវប្រឈមមុខចំពោះមុខច្បាប់ បើនៅតែប្រព្រឹត្តសកម្មភាពលេងល្បែងស៊ីសង ។
គេបានសង្កេតឃើញថា ទោះបីជាមានវិធានការក្តៅលើអ្នកលេងល្បែងនោះក្តី ប៉ុន្តែសម្រាប់ក្រុមអ្នកញៀនល្បែងនៅតែបន្តលួចលេងនៅកន្លែងស្ងាត់ៗឬទាក់ទងតាមទូរស័ព្ទចាក់កន្ទុយលេខ ដោយស៊ីសង តាមក្រោយគេច សមត្ថកិច្ច ដដែល ប៉ុន្តែក៏ថមថយបន្តិចបន្តួចដែរ ។ ព្រោះការញៀនល្បែងវា បានក្លាយទៅជា ជំងឺមហារីក ព្យាបាលយ៉ាងណា ក៏មិនជាឡើយ ៕
ចែករំលែកព័តមាននេះ