ខេត្តកំពង់ស្ពឺ ៖ រថយន្ត១គ្រឿងកំពុងបើកបរតាមបណ្តោយថ្នល់ជាតិបានជ្រុលចង្កូតបុកម៉ូតូ១គ្រឿងកំពុងបើកឆ្លងថ្នល់ចំពីចំហៀងបណ្តាលឲ្យជនរងគ្រោះស្លាប់ភ្លាមៗនៅកន្លែងកើតហេតុ ហើយជនបង្កបានទុករថយន្តចោលរត់គេចខ្លួន ។ គ្រោះថ្នាក់ចរាចរណ៍រវាងរថយន្តនឹងម៉ូតូនេះបានកើតឡើងនៅម៉ោង៤និង០៥នាទីរសៀល ថ្ងៃទី២៣ ខែកញ្ញា ឆ្នាំ២០១៨ តាមបណ្តោយផ្លូវជាតិលេខ៤ ក្នុងភូមិព្រៃគុយ ឃុំត្រពាំងគង ស្រុកសំរោងទង ។
ជនរងគ្រោះឈ្មោះ សេង រីម ភេទប្រុស អាយុ៣៧ឆ្នាំ រស់នៅភូមិកំណប់ សង្កាត់ស្វាយក្រវាន់ ក្រុងច្បារមន ខេត្តកំពង់ស្ពឺ បើកម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៧ ពណ៌ខ្មៅ ពាក់ផ្លាកលេខ ភ្នំពេញ ១GF-៨៣៣៩ ដោយឡែករថយន្តបង្កម៉ាកហាយឡែនឌ័រ ពណ៌ទឹកប្រាក់ ពាក់ផ្លាកលេខ ព្រះសីហនុ ២A-៦៩៣១ អ្នកបើកបរមិនស្គាល់ឈ្មោះដោយសារក្រោយបង្កហេតុបានរត់គេចខ្លួន ។
ប្រភពព័ត៌មានពីសមត្ថកិច្ចស្រុកសំរោងទងបានឲ្យដឹងថា នៅមុនពេលកើតហេតុគេឃើញជនរងគ្រោះបើកម៉ូតូ១គ្រឿងតែម្នាក់ឯងតាមបណ្តោយផ្លូវជាតិលេខ៤ទិសដៅពីលិចទៅកើត លុះមកដល់ចន្លោះគីឡូម៉ែត្រលេខ៣២-៣៣ក៏បត់ឆ្លងថ្នល់ពីត្បូងទៅជើងហើយឆ្លងមិនទាន់ផុតផងក៏មានរថយន្ត១គ្រឿងដូចភិនភាគខាងលើបើកតាមបណ្តោយផ្លូវជាតិលេខ៤ដែរទិសដៅពីកើតទៅលិចដោយល្បឿនលឿនជាន់ហ្វ្រាំងមិនទាន់បានជ្រុលបុកម៉ូតូចំពាក់កណ្ដាលតួខ្ទាតជនរងគ្រោះចេញពីម៉ូតូជាច្រើនម៉ែត្របោកនឹងថ្នល់ស្លាប់ភ្លាមៗ ។
ក្រោយកើតហេតុសមត្ថកិច្ចស្រុកសំរោទងបានចុះស្រាវជ្រាវ និងទាក់ទងសាច់ញាតិ និងក្រុមគ្រួសារឲ្យមកទទួលសពយកទៅគេហដ្ឋានធ្វើបុណ្យតាមប្រពៃណី ។ ចំណែករថយន្តបង្ក និងម៉ូតូរងគ្រោះសមត្ថកិច្ចធ្វើការវាស់តាមបច្ចេកទេសរួចយកមករក្សាទុកនៅអធិការដ្ឋាននគរបាលស្រុកសំរោងទងស្រាវជ្រាវជនបង្កឲ្យចូលខ្លួនដោះស្រាយតាមផ្លូវច្បាប់នៅពេលក្រោយ ៕
ចែករំលែកព័តមាននេះ