រាជធានីភ្នំពេញ ៖ កម្លាំងនាយកដ្ឋានប្រឆាំងការជួញដូរមនុស្ស និងការពារអនីតិជន បានចុះបង្ក្រាបហាងម៉ាស្សា-កោសជប់ ធ្វើសរសៃមានលួចលាក់បង្កប់សេវាផ្លូវភេទមួយកន្លែង និងឃាត់ខ្លួនមនុស្សចំនួន៧នាក់ ព្រមទាំងវត្ថុតាងមួយចំនួន កាលពីវេលាម៉ោង១០និង២០នាទីយប់ថ្ងៃទី១៩ ខែកញ្ញា នៅផ្ទះលេខ៣៦០Eo តាមផ្លូវលេខ២០១១ ភូមិដីថ្មី សង្កាត់គោកឃ្លាង ខណ្ឌសែនសុខ ។
ការបង្ក្រាបហាងម៉ាស្សាកោសជប់លួចបង្កប់សេវាផ្លូវភេទខាងលើនេះ ដឹកនាំផ្ទាល់ដោយលោកឧត្ដមសេនីយ៍ទោ សំបូរ មាណ្ណារិទ្ធ និងលោកឧត្ដមសេនីយ៍ទោ ឯម សុជឿន អនុប្រធាននាយកដ្ឋាន និងលោក កុល
បុន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ។
ជាលទ្ធផល បានឃាត់ខ្លួនមនុស្ស៧នាក់ ក្នុងនោះមាន ប្តីប្រពន្ធជាថៅកែហាងម៉ាស្សាខាងលើ ដែលបុរសជាប្តីឈ្មោះ ម៉ុន ចំរើន អាយុ៤១ឆ្នាំ ប្រពន្ធឈ្នោះ ហ៊ុំ ស្រីអន អាយុ២១ឆ្នាំ និងនារីម៉ាស្សាចំនួន៥នាក់ ។ ជាមួយនេះ ក៏បានដកហូតវត្ថុតាងរួមមាន ឧបករណ៍ប្រើប្រាស់គ្រឿងញៀនចំនួន៤ ស្រោមប្រើប្រាស់ហើយនិងមិនទាន់ប្រើមួយចំនួន ព្រមទាំងសម្ភារមួយចំនួនទៀត ។
ថៅកែហាងម៉ាស្សាទាំង២នាក់ប្តីប្រពន្ធ និងស្ត្រីម៉ាស្សាទាំង៥នាក់រួមទាំងវត្ថុតាង ត្រូវសមត្ថកិច្ចនាំយកទៅសាកសួរនៅនាយកដ្ឋានប្រឆាំងការជួញដូរមនុស្ស និងការពារអនីតិជន ដើម្បីរចាត់ការទៅតាមនីតិវិធី ៕
ចែករំលែកព័តមាននេះ