រាជធានីភ្នំពេញ ៖ ជនសង្ស័យ២នាក់ ត្រូវបានកម្លាំងនគរបាលប៉ុស្តិ៍ចាក់អង្រែលើឃាត់ខ្លួន ក្រោយពីឆែក
ឆេររកឃើញមានថ្នាំញៀនក្នុងខ្លួនរបស់ពួកគេ កាលពីវេលាម៉ោង៦យប់ថ្ងៃទី២០ ខែកញ្ញា ឆ្នាំ២០១៨ នៅចំណុចវាលខ្សាច់សំណង់អនាធិបតេយ្យ ស្ថិតតាមបណ្តោយផ្លូវ៦០ម៉ែត្រ ក្នុងក្រុមទី៨ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
ជនសង្ស័យទាំង២នាក់ខាងលើ ម្នាក់ឈ្មោះ មឿន មិនា ហៅ ចិត្រ ភេទប្រុស អាយុ២២ឆ្នាំ មុខរបរមិនពិតប្រាកដ ទីលំនៅផ្ទះជួលចំណុចឃាត់ខ្លួន ម្នាក់ទៀតមានឈ្មោះ ទេព កុសល ហៅញ៉ាញ់ ភេទប្រុស អាយុ៣០ឆ្នាំ មុខរបរនិងទីលំនៅ មិនពិតប្រាកដ ។
មន្ត្រីនគរបាលអោយដឹងថា មុនឈានដល់ការឃាត់ខ្លួនជនសង្ស័យទាំង២នាក់ខាងលើ កម្លាំងនគរបាលបានចេញកម្លាំងល្បាតពួនស្ទាក់ដើម្បីការពារសន្តិសុខសុវត្ថិភាពជូនពលរដ្ឋ លុះល្បាតដល់ចំណុចខាងលើ ក៏ប្រទះឃើញជនសង្ស័យទាំង២នាក់ មើលទៅគួរអោយសង្ស័យ សមត្ថកិច្ចក៏បានហៅឱ្យឈប់ដើម្បីសួរនាំ និងឆែកឆេរលើខ្លួន ស្រាប់តែឃើញមានថ្នាំញៀនលើខ្លួនពួកគេទាំង២នាក់ សមត្ថកិច្ចក៏សម្រេចឃាត់ខ្លួនបញ្ជូនទៅកាន់ប៉ុស្តិ៍រដ្ឋបាលនគរបាលមូលដ្ឋានដើម្បីសួរនាំ ។
ក្នុងការឃាត់ខ្លួនជនសង្ស័យទាំង២នាក់ សមត្ថកិច្ចដកហូតបានថ្នាំញៀនក្រាមសថ្លា ហៅម៉ាទឹកកកចំនួន១១ កញ្ចប់ថង់តូច និងទូរស័ព្ទដៃចំនួន២គ្រឿងផងដែរ ។
បច្ចុប្បន្នជនសង្ស័យ ត្រូវបានឃុំខ្លួនបណ្តោះអាសន្ននៅប៉ុស្តិ៍រដ្ឋបាលនគរបាលមូលដ្ឋាន រង់ចាំកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ