ADផ្ទាំងផ្សព្វផ្សាយពាណិជ្ជកម្ម

ប្រតិបត្តិការបង្ក្រាបបទល្មើសនេសាទ ទ្រង់ទ្រាយធំនៅក្នុងស្រុកចំនួន៤

5 ឆ្នាំ មុន

កណ្តាល
២០ ខែ កញ្ញា ឆ្នាំ ២០១៨ ម៉ោង ២០:០៦

ខេត្តកណ្ដាល ៖ ក្រោមបទបញ្ជាផ្ទាល់របស់ឯកឧត្តមបណ្ឌិត ម៉ៅ ភិរុណ អភិបាលនៃគណៈអភិបាលខេត្ត កណ្តាល នាថ្ងៃទី២០ ខែកញ្ញា ឆ្នាំ២០១៨នេះ…

ខេត្តកណ្ដាល ៖ ក្រោមបទបញ្ជាផ្ទាល់របស់ឯកឧត្តមបណ្ឌិត ម៉ៅ ភិរុណ អភិបាលនៃគណៈអភិបាលខេត្ត កណ្តាល នាថ្ងៃទី២០ ខែកញ្ញា ឆ្នាំ២០១៨នេះ ពេញមួយថ្ងៃកម្លាំងខណ្ឌរដ្ឋបាលជលផលខេត្តកណ្តាល សហការជាមួយកម្លាំងជំនាញជលផលនាយរងផ្នែក,កម្លាំងជលផលតាមបណ្តាសង្កាត់.អាជ្ញាធរស្រុក.ឃុំ.កម្លាំងប្រដាប់អាវុធមានប៉ូលិស.ប៉េអឹម.កម្លាំងសហគមន៍ និងកម្លាំងប្រជាការពារភូមិ ៤ស្រុក គឺស្រុកកៀនស្វាយ,ស្រុកលើកដែក,ស្រុកកោះធំ និងស្រុកស្អាង ដឹកនាំដោយលោក ប៉ុម សីហា នាយរងខណ្ឌ រដ្ឋបាលជលផលកណ្តាលតំណាងឲ្យលោក វ៉ិត ធារិទ្ធ នាយខណ្ឌបានបើកប្រតិបត្តិការ ចុះបង្ក្រាបបទល្មើសនេសាទខុសច្បាប់ទ្រង់ទ្រាយធំនៅតាមផ្ទៃបឹងបួរក្នុងស្រុកទាំង៤ខាងលើ។

លោក ប៉ុម សីហា នាយរងខណ្ឌរដ្ឋបាលជលផលខេត្តកណ្តាល បានឲ្យដឹងថា ដោយអនុវត្តន៍តាមបទបញ្ជាផ្ទាល់ របស់ឯកឧត្តមបណ្ឌិត ម៉ៅ ភិរុណ អភិបាលខេត្ត និងមានការណែនាំចង្អុលបង្ហាញពីលោក វ៉ិត ធារិទ្ធ នាយខណ្ឌរដ្ឋបាលជលផលកណ្តាលកម្លាំងជំនាញជលផលខណ្ឌ,ផ្នែក,សង្កាត់សហការជាមួយអាជ្ញាធរស្រុក,ឃុំ,កម្លាំងសហគមន៍,កម្លាំងប្រដាប់អាវុធមានប៉ូលិស,ប៉េអឹម និងកម្លាំងប្រជាការពារភូមិ រួមកម្លាំងគ្នានៃស្រុកទាំង៤ សរុបចំនួន៣៧នាក់ ប្រើប្រាស់ទូកយីខេចំនួន៨គ្រឿង។ លោកនាយរង ខណ្ឌបន្តថា ប្រតិបត្តិការនេះនឹងអនុវត្តជាបន្តបន្ទាប់ទៀតឲ្យដូចភ្លៀងរលឹម ក្រោមបទបញ្ជាផ្ទាល់របស់ ឯកឧត្តមអភិបាលខេត្ត។ ហើយប្រតិបត្តិការនេះក៏មិនមែនទើបតែលើកទីមួយដែរ គឺចាប់តាំងពី ក្បាលទឹក ដំឡើង កម្លាំងយើងបានចុះបង្ក្រាបជាញឹកញាប់រួចមកហើយដែរ។

ប៉ុន្តែលោកបានប្រៀបធៀបថា ការបង្ក្រាបបទល្មើសនេសាទហាក់បីដូចជាវែកចកអ៊ីចឹង ពេលកម្លាំងយើងចុះបង្ក្រាបទៅផុតជួនកាល ពួកគាត់ (ក្រុមអ្នកប្រព្រឹត្តបទល្មើស) ទៅលួចដាក់តាមក្រោយវិញនៅពេលល្ងាច ឬយប់ដែលកម្លាំង ឡើងផុតក៏មានដែរ។ នេះហើយដែលធ្វើឲ្យកម្លាំងយើងជួបការលំបាកក្នុងការបង្ក្រាបខ្លះដែរ។ ហើយបើចុះបង្ក្រាបម្តងៗវាទាល់តែមានកម្លាំង និងទូកច្រើនគ្រឿងទើបធ្វើបែក។ ទោះជាយ៉ាងណាលោក ប៉ុម សីហា នាយរងខណ្ឌក៏សូមអំពាវនាវដល់បងប្អូនអ្នកប្រព្រឹត្តបទល្មើសនេសាទខុសច្បាប់ទាំងអស់ សូមនាំគ្នាងាកមករករបរនេសាទស្របច្បាប់ទាំងអស់គ្នាវិញ ព្រោះការប្រព្រឹត្តអំពើខុសច្បាប់វានាំឲ្យមាន ទោសទណ្ឌ ពេលសមត្ថកិច្ចចាប់បានជាប់គុកជាប់ច្រវាក់ បែកបាក់ចោលប្រពន្ធកូនជាពុំខាន។

ជាពិសេសដើម្បីចូលរួមថែរក្សាពូជមច្ឆជាតិធនធានធម្មជាតិឲ្យបានគង់វង្សដើម្បីជាគំរូឲ្យកូនចៅយើងជំនាន់ក្រោយជួយថែរក្សាបន្តគ្នា។ លោក ប៉ុម សីហា បានបញ្ជាក់បន្ថែមទៀតថា សម្រាប់លទ្ធផលនៃ ប្រតិបត្តិការចុះបង្ក្រាបបទល្មើសនេសាទខុសច្បាប់ពេញមួយថ្ងៃទី២០ ខែកញ្ញា នៅតាមផ្ទៃបឹងបួរក្នុងស្រុកទាំង៤នេះ គណៈកម្មាការចម្រុះរឹបអូសបានវត្ថុតាងសរុបរួមមាន៖ ព្រួលស្បៃមុង, មាត់លូស្បៃមុង, មាត់លូ,បង្គោលឫស្សី ហើយត្រូវកម្លាំងធ្វើពិធីដុតកម្ទេចចោល នៅតាមកន្លែងដីទីទួលផងដែរ៕