ខេត្តក្រចេះ៖ ទំនិញខូចគុណភាព និងផុតកំណត់ថ្ងៃប្រើប្រាស់មានដូចជា ភេសជ្ជៈ នំ ចំណីម្ហូប អារហារជាច្រើនមុខ ត្រូវបានក្រុមមន្ត្រីជំនាញបានរក ឃើញដាក់លក់នៅតាម បណ្តាតូប និងស្តង់មួយចំនួនក្នុងផ្សារសាមគ្គី ខេត្តក្រចេះ។ ហើយមុខទំនិញទាំងអស់នោះក៏និងត្រូវ បានដកហូតផងដែរ នេះបើតាមការបញ្ជាក់ពីមន្ត្រីសាខាកាំកុងត្រូលខេត្តក្រចេះ។
អនុប្រធានសាខាកាំកុងត្រូលខេត្តក្រចេះ លោក យាង បាក់ បានឲ្យដឹងថា មន្ត្រីសាខា កាំកុងត្រូល បានសហការជាមួយមន្ត្រីនៃមន្ទីរពាណិជ្ជកម្មខេត្ត បានចុះត្រួតពិនិត្យមុខទំនិញ នៅតាមបណ្តាស្តង់លក់ដូរ តូច ធំគ្រប់ប្រភេទនៅក្នុងទីប្រជុះជន និងផ្សារក្រចេះ ។ សកម្មភាព របស់ក្រុមមន្ត្រីដែលបានធ្វើឡើងនៅព្រឹកថ្ងៃទី២០ សីហា នេះ ក៏ត្រូវបានលោកអនុប្រធានមន្ទីរ បញ្ជាក់ថា ធ្វើឡើងក្នុងគោលបំណងដើម្បីលើកកំពស់ សុខសុវត្ថិភាពចំណីអារហារមុនឱកាស ថ្ងៃបុណ្យភ្ជុំបិណ្ឌមិនឲ្យប៉ះពាល់សុខភាពដល់អ្នកប្រើប្រាស់។
ក្រុមមន្ត្រីបានឲ្យដឹងថា មុខទំនិញមានដូចជាភេសជ្ជៈ និងគ្រឿងឧបភោគបរិភោគ មានជាច្រើនប្រភេទ ដែលក្រុមមន្ត្រីរកឃើញថា ហួសសុពលភាពកាលបរិច្ឆេទប្រើប្រាស់ និងមាន ខ្លះគឺខូចគុណភាពនោះ បានរឹបអូសយកទំនិញទាំងអស់នោះមករក្សាទុក។ ជាមួយគ្នានេះ ក្រុមការងារជំនាញក៏បានអប់រំណែនាំដល់ពលរដ្ឋដែលជាម្ចាស់ស្តង់ ត្រូវមានការប្រុងប្រយត្ន័ និងពិនិត្យនៅរាល់មុខទំនិញមុនការនាំចូលមកដាក់លក់ឲ្យអតិថិជន។
លោកអនុប្រធានសាខាកាំកុងត្រូលបានលើកឡើងដោយកត់សម្គាល់ថា សព្វថ្ងៃនេះចំនួនមុខទំនិញខូចគុណភាព គឺនៅមានសេសសល់តិចតួចដែលកំពុងដាក់លក់នៅលើទីផ្សារ។ ការធ្លាក់ចុះនូវតួលេខមុខទំនិញខូចគុណភាពក៏ដូចជាហួសកាលបរិច្ឆេទ ក៏ត្រូវបាន លោកអនុប្រធានសាខាកាំកុងត្រូលបញ្ជាក់ថា មកពីម្ចាស់ស្តង់ទំនិញទាំងអស់ ពួកគាត់មានការ យល់ដឹងពីការពិនិត្យមុខទំនិញមុននិងនាំចូលមកលក់បន្ត ក៏ដូចជាការចូលរួមប្រុងប្រយ័ត្ន របស់ពួកគាត់លើគុណភាពមុខទំនិញមុននិងពួកគាត់បាននាំចូល។
បើតាមលោក យាង បាក់ បានអះអាងទៀតថា ក្រុមមន្ត្រីនិងបន្តសកម្មភាពចុះពិនិត្យ គុណភាពមុខទំនិញដែលកំពុងតែដាក់លក់នៅគ្រប់បណ្តាតូប និងស្តង់តូចធំនានានៅក្នុងខេត្ត ដើម្បីលើកកំពស់សុខសុវត្ថិភាពចំនីអារហារ និងសុខុមាលភាពអ្នកទទួលទានមុនរដូវបុណ្យភ្ជុំបិណ្ឌនាពេលខាងមុខនេះ៕
ចែករំលែកព័តមាននេះ