ខេត្តស្ទឹងត្រែង ៖ សេចក្តីរាយការណ៍ឱ្យដឹងថា ក្មេងស្រីម្នាក់ត្រូវបានបញ្ជូនទៅកាន់មន្ទីរពេទ្យ ក្រោយនាងក្អួតចង្អោរអស់ច្រើនម៉ោង កើតឡើងកាលពីរសៀលថ្ងៃទី១៨ កញ្ញា ស្ថិតនៅភូមិថាឡា ឃុំថាឡា ស្រុកថាឡាបរិវ៉ាត់ ។
បើតាមតាមប្រភពជីតាក្មេងថា នាងមានឈ្មោះសុ វណ្ណី អាយុ៥ឆ្នាំ ។ គាត់បន្តថា កាលពីវេលាម៉ោង១២ថ្ងៃ
ត្រង់ ចៅស្រីគាត់បានសុំលុយ៥០០រៀល ទៅទិញនំ២កញ្ចប់មកញាំ ។ ក្រោយមក ស្រាប់ក្អួតចង្អោរតាំងពីម៉ោង១២ រហូតដល់ម៉ោង៤រសៀល មិនទាន់បាត់ក្អួត ។ ទោះខំប្រឹងច្របាច់ក្រូចឆ្មាដាក់ស្ក.សបញ្ច្រកយ៉ាងណា នៅអត់បាត់ទៀត ទើបបញ្ជូនទៅមន្ទីរពេទ្យដើម្បីសង្គ្រោះ។
លោកគ្រូពេទ្យ នួន ហ្វឿ មានទីតាំងភូមិផុក សង្កាត់ស្ទឹងត្រែង ក្រុងស្ទឹងត្រែង បានបញ្ជាក់ដែរថា ក្មេងស្រីនោះត្រូវអាណាព្យាបាលបញ្ជូនមកស្ថិតក្នុងអាការពុល។ លោកបានពិនិត្យនិងដាក់សេរ៉ូមជំនួយកម្លាំងបំពេញជាតិទឹក ព្រោះក្មេងស្រីនោះបាត់បង់ជាតិទឹក ស្ទើរខ្សោះខ្លួនទៅហើយ។ លោកបន្តថា ក្រោយដាក់សេរ៉ូម និងតាមដានសភាពជំងឺ ក្មេងស្រីនោះបានធូរស្បើយ និងបាត់ក្អួតចង្អោរ ទើបឱ្យត្រឡប់ទៅផ្ទះ
វិញ និងឱ្យថ្នាំលាយទឹកទៅបន្ថែម តែស្ថិតក្នុងការតាមដានដដែល ។
លោកគ្រូពេទ្យ នួន ហ្វឿ បានផ្តល់នូវវិធីសាស្ត្រ សម្រាប់សង្គ្រោះបឋមថា ប្រសិនមានក្មេងមានអាការដោយពុលចំណីអាហារ បណ្តាលឱ្យក្អួតចង្អោរមិនឈប់ ត្រូវយកទឹកឱ្យផឹកឱ្យបានច្រើន ដើម្បីជំនួយជាតិទឹកទៅដល់រាងកាយ និងជួយទប់ទល់ជាតិពុលបានមួយកំរិត មុនមកដល់មន្ទីរពេទ្យ។
លោក គឹម ប្រុស ប្រធានសាខាកាំកុងត្រូលខេត្តស្ទឹងត្រែងបានបញ្ជាក់ថា លោកបានធ្វើការក្នុងរឿងនេះហើយតែមិនអាចសន្និដ្ឋានថា ក្មេងស្រីអាយុ៥ឆ្នាំនេះ ពុលដោយញាំនំនោះទេ ព្រោះនំនោះ ជាផលិតផលដែលផលិតក្នុងប្រទេសខ្មែរ ហើយមិនទាន់ផុតកំណត់នោះដែរ។
លោកថា ក្មេងអាចញាំអាហារច្រើនដូច្នេះមុនញ៉ាំនំក្មេងស្រីនោះបានញាំអាហារផ្សេង លុះក្រោយមកទើបញាំនំជាក្រោយ ដល់ពេលពុលទម្លាក់ថា មកពីញុាំនំ។ ហើយម្យ៉ាងទៀត ក្មេងតែងលេងដីហើយ ទៅកាន់ចំណីអាចកើតមេរោគទៅជាក្អួតចង្អោរ ហើយជួនកាលទៀតក្មេងមានសុខភាពមិនល្អ ញ៉ាំប៉ះចំណីដែលធ្វើឱ្យប៉ះដល់សុខភាព ក៏អាចទៅជាក្អួតចង្អោរបានដែរ ។
ចែករំលែកព័តមាននេះ