ខេត្តព្រះសីហនុ ៖ នៅព្រឹកថ្ងៃទី១៦ កញ្ញា ២០១៨ ឯកឧត្តមទេសរដ្ឋមន្ត្រី ប៉ុល សារឿន ប្រធានក្រុមការងារថ្នាក់កណ្តាលចុះជួយខេត្តព្រះសីហនុបានផ្តល់កិត្តិយសជូនមាតាបិតា និងសិស្សដែលប្រឡងជាប់និទ្ទេស(A) ទាំងបីរូបប្រចាំខេត្តព្រះសីហនុ ចូលជួបសំណេះសំណាល នៅគេហដ្ឋានរបស់ឯកឧត្ដមផ្ទាល់នាខេត្តព្រះសីហនុ។
នៅក្នុងឱកាសនោះ ឯកឧត្តម បានសម្ដែងនូវការកោតសរសើរដល់សិស្សទាំងបីរូបដែលប្រឡងបាននិទ្ទេសល្អគឺនិទ្ទេស(A) ហើយក្នុងនោះ ឯកឧត្ដម ក៏បានចូលរួមត្រេកអរផងដែរ ជាមួយមាតាបិតាសិស្សទាំង៣រូប ដែលមានកូនៗ ប្រកបដោយចំណេះដឹងខ្ពស់។ ជាមួយគ្នានោះឯកឧត្ដ បានផ្តល់ជូននូវថវិកាដល់សិស្សទាំង៣នាក់ ក្នុងម្នាក់ៗទទួលបានចំនួន១.០០០ដុល្លារ ដើម្បីបន្តការសិក្សានៅឧត្តមសិក្សាបន្ត ក្រោមឆ័ត្រសន្តិភាព និងការអភិវឌ្ឍន៍លើគ្រប់វិស័យក្រោមនាវាកម្ពុជា ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ជាមួយគ្នានោះផងដែរក្នុងនាមសិស្ស និងមាតាបីតាសិស្ស ទាំងបីនាក់បានថ្លែងអំណរគុណយ៉ាងជ្រាលជ្រៅបំផុតដល់ឯកឧត្ដមទេសរដ្ឋមន្ត្រី ដែលបានផ្តល់កិត្តិយស និងពេលវេលាដ៏មានតម្លៃ រួមទាំងថវិកាផ្តល់ឲ្យដល់សិស្ស ហើយទន្ទឹមនឹងនេះ សិស្សទាំង៣រូប សន្យាបន្តគោលជំហ និងប្រឹងបន្តការសិក្សារទៅមុខដើម្បីក្លាយជាទំពាំងស្នឫស្សីក្នុងសង្គមជាតិ ស្របតាមទិសដៅប្រមុខរដ្ឋាភិបាលបច្ចុប្បន្ន ដែលកំពុងបណ្តុះធនធានមនុស្ស ឆ្ពោះទៅរកចំណេះដឹងលើគ្រប់ជំនាញ និងគ្រប់វិស័យ៕
ចែករំលែកព័តមាននេះ