រាជធានីភ្នំពេញ ៖ តារាចម្រៀងលោកជី ដេវីដ បានប្រកាសដើរចេញពីផលិតកម្មហង្សមាស បន្ទាប់ពីសាងកេរ្តិ៍ឈ្មោះនៅក្នុងផលិតកម្មនេះបានមួយរយៈកន្លងមក ។ ដំណឹងនៃការចាកចេញរបស់ដេវីត បានធ្វើឲ្យអ្នកគាំទ្រភ្ញាក់ផ្អើលយ៉ាងខ្លាំង ។
ដំណឹងនៃការចាកចេញពីផលិតកម្មហង្សមាសរបស់ម្ចាស់បទ «រាំញឺកែងជើង» លោកជី ដេវីត បានក្លាយជាការណ៍ពិត បន្ទាប់ពីកន្លងមកគេមានការសង្ស័យថា លោកអាចនឹងចាកចេញជាមួយកញ្ញាទេព បូព្រឹក្ស ។ នៅទីបំផុតលោក ជី ដេវីដ ក៏បានអះអាងជាផ្លូវការថា លោកពិតជាដើរចេញពីផលិតកម្មហង្សមាសប្រាកដមែន ខណៈពេលដែលការចាកចេញនេះក៏មិនបានធ្វើឲ្យលោកទៅណាឆ្ងាយពីអាជីពចម្រៀងទេ ។
តារាចម្រៀងរូបនេះបានបង្ហោះសារតាមហ្វេសប៊ុករបស់លោកថា «ខ្ញុំបានចាកចេញដោយជំហរជាអ្នកចម្រៀងឯករាជ្យដើម្បីផ្លាស់ប្តូរបទពិសោធន៍ការងារឆ្ពោះទៅកាន់បទពិសោធន៍ថ្មី ដើម្បីចែករំលែកទៅកាន់អ្នកគាំទ្រជាទីស្រលាញ់ទាំងអស់គ្នា »។ តាមរយៈសារមួយនេះមានប្រិយមិត្តគាំទ្ររបស់លោកជាច្រើនបានលើកទឹកចិត្ត និងសម្តែងការអបអរសាទរ និងគាំទ្រចំពោះរូបលោកដែលបានទៅធ្វើជាអ្នកចម្រៀងឯករាជ្យមួយរូប ដូចតារាចម្រៀងមួយចំនួនទៀតដែរ ។
ការចាកចេញរបស់លោកជី ដេវីដ នាពេលនេះក៏ត្រូវបានគេសង្ស័យថា គូស្នេហ៍របស់លោក និងជាតារាចម្រៀងរួមទ្រនំគឺកញ្ញា ទេព បូព្រឹក្ស អាចនឹងចាកចេញពីហង្សមាសដែរ ។ ទេព បូព្រឹក្ស បានស៊ែរសារដែលលោកជី ដេវីដ បានបង្ហោះនោះជាមួយនឹងពាក្យពេចន៍ភ្ជាប់ជាមួយថា «ពួកយើងក៏នឹងមានអ្វីថ្មីប្លែកឆាប់ៗនេះ »។
មុនចាប់ផ្តើមជាអ្នកចម្រៀងអាជីព ជីដេវីត ធ្លាប់បង្កើតក្រុមរាំមួយនៅខេត្តបាត់ដំបង ដោយដើររាំមិនយកកម្រៃអស់រយៈពេលប្រមាណជា៣ឆ្នាំ ។ មករស់នៅភ្នំពេញ អាជីពដំបូងរបស់ដេវីត គឺជាអ្នកបញ្ចូលបទភ្លេង និងជួសជុលទូរស័ព្ទ នៅផ្សារឃ្លាំងរំសេវ ។
មុននឹងទទួលបានភាពជោគជ័យក្នុងវិថីសិល្បៈដូចសព្វថ្ងៃ ដេវីត បានធ្វើបទចម្រៀងជា រឿយៗនៅលើបណ្ដាញសង្គមយូធូប ប្រមាណជា៣ឆ្នាំ ហើយបទចម្រៀងដែលធ្វើឲ្យអ្នកគាំទ្រចាប់ផ្ដើមស្គាល់នោះគឺ «Live Fast Die Young» ដែលចេញជាផ្លូវការនៅអំឡុងឆ្នាំ២០១៤ ។
ជីវិតជាតារាចម្រៀងរបស់ដេវីត ប្រែប្រួលស្ទើរតែទាំងស្រុងនៅពេលបានជួប ពេជ្រ សោភា ជាពិសេសពេលបទចម្រៀង «No Money No Honey» បានចេញជាផ្លូវការ។ ដេវីត បានក្លាយជាតារាចម្រៀងស្ថិតនៅក្នុងចិត្តយុវវ័យជាច្រើន ហើយបទចម្រៀងល្បីចុងក្រោយរបស់គេគឺបទ «No Smoke»។ បទចម្រៀងទោលនៅក្នុងផលិតកម្ម ហង្សមាស របស់ដេវីតដែលល្បីបំផុតគឺ «រាំញីកែងជើង» ចេញកាលពីខែមេសា ឆ្នាំ២០១៥ ៕
ចែករំលែកព័តមាននេះ