រាជធានីភ្នំពេញ ៖ អ្នកវិភាគនយោបាយមួយរូបដែលប្រកាន់និន្នាការកណ្តាល និងកំពុងរស់នៅសហរដ្ឋអាមេរិក ហើយដែលគេបានស្គាល់តាមរយៈយូធូប បានប្រកាសសស្វាគមន៍ចំពោះសម្តេចតេជោ ហ៊ុន សែន ដែលក្លាហានក្នុងសកម្មភាពនយោបាយការបរទេស មិនខ្លាចញញើតប្រាប់ទៅបណ្តាប្រទេសនានាជាសាធារណៈ…
រាជធានីភ្នំពេញ ៖ អ្នកវិភាគនយោបាយមួយរូបដែលប្រកាន់និន្នាការកណ្តាល និងកំពុងរស់នៅសហរដ្ឋអាមេរិក ហើយដែលគេបានស្គាល់តាមរយៈយូធូប បានប្រកាសសស្វាគមន៍ចំពោះសម្តេចតេជោ ហ៊ុន សែន ដែលក្លាហានក្នុងសកម្មភាពនយោបាយការបរទេស មិនខ្លាចញញើតប្រាប់ទៅបណ្តាប្រទេសនានាជាសាធារណៈ ។
លោក សុខ សុគន្ធ ហៅ ជេម សុខ រស់នៅសហរដ្ឋអាមេរិក បានសម្តែងមតិលើបណ្តាញសង្គមនៅថ្ងៃទី១៣ ខែកញ្ញាថា សម្តេចតេជោ ហ៊ុន សែន ក្នុងវេទិកាសេដ្ឋកិច្ចពិភពលោក(World Economic Forum) នៅទីក្រុងហាណូយពីថ្ងៃទី១១ដល់ទី១៣ ខែកញ្ញា ឆ្នាំ២០១៨បានថ្លែងថា «ប្រទេសនានាគប្បីកុំ លូកដៃក្នុងកិច្ចការប្រទេសឥណ្ឌូចិន» ។ លោកបញ្ជាក់ថា «ការកត់សម្គាល់របស់ខ្ញុំ ឃើញថា សម្តេចតេជោ ហ៊ុន សែន មានសេចក្ដីក្លាហានសម្បើមណាស់ក្នុងសកម្មភាពនយោបាយការបរទេស ។ សម្តេចតេជោ ហ៊ុន សែន ហ៊ានបញ្ចេញមតិច្បាស់លាស់ មាំទាំលើឆាកអន្ដរជាតិ។ ចំណុចនេះបង្ហាញថា លោកមានជំនឿ ថា លោកបានចាក់គ្រឹះរឹងមាំខាងទំនាក់ទំនងការបរទេស» ។
ការលើកឡើងរបស់អ្នកវិភាគរូបនេះ ក៏ស្របពេលដែលសម្តេចតេជោ ហ៊ុន សែន ជួបពិភាក្សាការងារជាមួយរដ្ឋមន្ត្រីការបរទេសជប៉ុន លោក តារ៉ូ កូណូ នៅប្រទេសវៀតណាម កាលពីសៀលថ្ងៃទី១២ ខែកញ្ញាកន្លងមកនេះដែរ ។ ក្នុងជំនួបពិភាក្សា សម្តេចតេជោ ហ៊ុន សែន បានមានប្រសាសន៍អំពីការរៀបចំក្បាលម៉ាស៊ីនដឹកនាំរដ្ឋសភា និងរាជរដ្ឋាភិបាលថ្មី ដែលមកទល់ពេលនេះគឺស្ថានភាពក្នុងប្រទេសកម្ពុជាមានភាពល្អប្រសើរជាងពេលណាៗទាំងអស់ ពោលគឺ កម្ពុជាមានស្ថិរភាពនយោបាយ និងស្ថិរភាពម៉ា
ក្រូសេដ្ឋកិច្ច ។ សម្តេចតេជោប្រមុខដឹកនាំ បានបង្កើតវេទិកាពិភាក្សាដែលមានការចូលរួមពីគណបក្សនយោបាយក្នុងការបោះឆ្នោតសកលឆ្នាំ២០១៨កន្លងមក ហើយជាបន្តបន្ទាប់បានឈានទៅបង្កើតឧត្តមក្រុមប្រឹក្សាពិគ្រោះនិងផ្តល់យោបល់ លើបញ្ហាសំខាន់ៗមួយចំនួន ដើម្បីជួយផ្តល់នូវមតិយោបល់ដល់រាជរដ្ឋាភិបាល ក្នុងការដឹកនាំប្រទេសជាតិឲ្យកាន់តែរីកចម្រើន ។
នៅក្នុងជំនួបពិភាក្សានោះ សម្តេចតេជោ និងលោករដ្ឋមន្ត្រីការបរទេសជប៉ុន ក៏បានពិភាក្សាគ្នាយ៉ាងយកចិត្តទុកដាក់អំពីរបៀបវារៈនៃកិច្ចប្រជុំកំពូលមេគង្គ-ជប៉ុន ដែលគ្រោងធ្វើនៅខែតុលាខាងមុខ នៅទីក្រុងតូក្យូ ប្រទេសជប៉ុន ។ តាមរយៈលោករដ្ឋមន្ត្រីការបរទេសជប៉ុន សម្តេចតេជោ បានថ្លែងនូវអំណរគុណយ៉ាង
ជ្រាលជ្រៅជូនចំពោះលោកនាយករដ្ឋមន្ត្រី ស៊ីន ហ្សូ អាបេ ដែលបានអញ្ជើញសម្តេចទៅបំពេញទស្សនកិច្ច និងចូលរួមកិច្ចប្រជុំកំពូលមេគង្គ-ជប៉ុន នៅពេលខាងមុខ ។ ពិសេសអញ្ជើញទៅបំពេញទស្សនកិច្ចនៅទីក្រុងយូ៉កូហាម៉ា ដែលជាមូលដ្ឋាននៃការបោះឆ្នោតរបស់លោករដ្ឋមន្ត្រីការបរទេសជប៉ុនផ្ទាល់ ។
លោក តារ៉ូ កូណូ បានអបអរសាទរចំ ពោះលទ្ធផលនៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលបានប្រព្រឹត្តទៅដោយសេរី ត្រឹមត្រូវ យុត្តិធម៌ កាលពីថ្ងៃទី២៩ ខែកក្កដា ឆ្នាំ២០១៨កន្លងទៅថ្មីៗនេះ ក្នុងនោះគណបក្សប្រជាជនកម្ពុជាទទួលបានលទ្ធផលឈ្នះភ្លូកទឹកភ្លូកដី ហើយដែលសម្តេចតេជោត្រូវបានតែងតាំងជានាយករដ្ឋមន្ត្រីនីតិកាលទី៦ នៃរដ្ឋសភា កាលពីថ្ងៃទី៦ ខែកញ្ញាកន្លងទៅថ្មីៗនេះផងដែរ ។
មុននេះ អ្នកវិភាគដដែលនេះបានអះអាងថាមូលហេតុដែលអន្តរជាតិមិនដាក់គំនាបមកលើរាជរដ្ឋាភិបាលកម្ពុជា ដោយសារតែលោក សម រង្ស៊ី បានបំផ្លាញរចនាសម្ព័ន្ធគណបក្សតាមរយៈការបង្កើតចលនាសង្គ្រោះជាតិខ្យល់ ។ ការលើកឡើងនេះ ស្របពេលដែលលោកសម រង្ស៊ី បង្កើតចលនាសង្គ្រោះជាតិនៅក្រៅប្រទេសកាលពីពេលកន្លងមក ក្រោយពីគណបក្សសង្គ្រោះជាតិត្រូវតុលាការរំលាយ និងពេលលោក កឹម សុខា អតីតប្រធានគណបក្សសង្គ្រោះជាតិត្រូវបានចាប់ខ្លួនដាក់ពន្ធនាគារ ។
លោក ជេម សុខ លើកឡើងថា នឹងគ្មានការបោះឆ្នោតឡើងវិញ និងគ្មានអន្តរជាតិណាលូកដៃចូលកិច្ចការផ្ទៃក្នុងរបស់ប្រទេសកម្ពុជាបានទេ ដោយសាររចនាសម្ព័ន្ធបក្សប្រឆាំងធ្វើឲ្យអន្តរជាតិមិនអាចទុកចិត្តបាន ។ ការអះអាងបែបនេះ បន្ទាប់ពីឃើញបញ្ហាផ្ទៃក្នុងរបស់អតីតគណបក្សប្រឆាំងបាននិងកំពុងកើតមានជាបន្តបន្ទាប់ និងការស្វះស្វែងឲ្យអន្តរជាតិជួយដើម្បីឲ្យមានការបោះឆ្នោតឡើងវិញ ដោយមានវត្តមានគណបក្សប្រឆាំង ។ លោក ជេម សុខ បានលើកឡើងថា គ្មានការបោះឆ្នោត និងគ្មានអន្តរជាតិណាមួយមកជួយកម្ពុជាទេ ព្រោះជាកិច្ចការផ្ទៃក្នុងកម្ពុជា ។ លោកនិយាយថា «គ្មានការបោះឆ្នោតឡើងវិញទេ ហើយបើមានគឺមានកម្រិតតិចណាស់ ។ អ្វីដែលសម្តេចតេជោ ហ៊ុន សែន ចង់ធ្វើ គឺបន្តអាណត្តិទី៦ទៅមុខ ហើយរហូតមកដល់ពេលនេះ សម្តេច ហ៊ុន សែន មិនទាន់ទទួលសម្ពាធធ្ងន់ធ្ងរដើរថយក្រោយដល់សូន្យនោះទេ » ។ លោកបានបង្ហាញមូលហេតុដែលអន្តរជាតិងាកមកគាំទ្ររាជរដ្ឋាភិបាលកម្ពុជា ដោយសារលោក សម រង្ស៊ី បានបំផ្លាញរចនាសម្ព័ន្ធរបស់គណបក្សសង្គ្រោះជាតិគ្មានសេសសល់ ពិសេសនោះនៅបរទេសតែម្តង ។ ជាក់ស្តែងនោះ ការបង្កើតចលនាសង្គ្រោះជាតិថ្ងៃ២៨ ខែមករា ឆ្នាំ២០១៨ ។
លោកបញ្ជាក់ថា «រង្ស៊ី បានធ្វើកំហុសមួយយ៉ាងធ្ងន់ គឺបំផ្លាញរចនាសម្ព័ន្ធដែលនៅសេសសល់នៅបរទេស ដោយបង្កើតចលនាខ្យល់មួយ គឺចលនាសង្គ្រោះជាតិ ដោយមកជ្រកក្រោមស្លាកសង្គ្រោះជាតិ» ។លោកលើកឡើងថា «គ្មានសម្ពាធពីបរទេសឯណានោះទេ បើ សម រង្ស៊ី និងអ្នកមួយចំនួនបានបំផ្លាញរចនាសម្ព័ន្ធបាត់ទៅហើយនោះ ។ អុីចឹង សម្ពាធលើសម្តេចតេជោ ហ៊ុន សែន អត់មានទេ ដោយសាររចនាសម្ព័ន្ធខ្សោយដូចជាមាន់អត់ក្បាល តើបានសម្ពាធពីណា?» ។ លោកបន្ថែមថា សម រង្ស៊ី មិនដែលទទួលខុសត្រូវចំពោះអ្វីដែលលោកបានធ្វើនោះទេ ដូចជាការដឹកនាំធ្វើបាតុកម្មម្តងៗ លោក សម រង្ស៊ី បានរត់រួចតែខ្លួនបាត់នៅក្រៅប្រទេស ទុកឲ្យ សកម្មជនជាប់គុក ៕
ចែករំលែកព័តមាននេះ