រាជធានីភ្នំពេញ៖តារាចម្រៀងមនោសញ្ចេតនាម៉េង កែវពេជ្ជតា មានមោទនភាពចំពោះនាង និងក្រុមគ្រួសារដែលបានជោគជ័យចំពោះការសម្តែងក្នុងមហោស្រព Dieppe នៅប្រទេសបារាំង ។
មហោស្រព Dieppeបានប្រារព្ធធ្វើឡើងកាលពីថ្ងៃទី៨ ខែកញ្ញា ឆ្នាំ២០១៨ មានការសម្តែងសិល្បៈ ចម្រៀង របាំ និងតន្ត្រី ពីអ្នកនាងម៉េង កែវពេជ្ជតា និង កូនៗ ព្រមទាំងក្រុមសិល្បៈក្នុងសមាគមសិល្បៈវប្បធម៌ខ្មែរ ។
អ្នកនាង ម៉េង កែវពេជ្ជ បានបង្ហាញជោគជ័យនៃការសម្តែងរួមគ្នាជាមួយកូនរបស់នាងនៅលើឆាកមហោស្រពអន្តរជាតិមួយនេះ ជាមួយនឹងសំឡេងទះដៃអបអរសាទរយ៉ាងកងរំពងពីភ្ញៀវកិត្តិយសដែលអញ្ជើញចូលរួមទស្សនា ។
អ្នកនាងម៉េង កែវពេជ្ជតា បានបញ្ជាក់តាមរយៈសារលើហ្វេសប៊ុកពីប្រទេសបារាំងកាលពេល ថ្មីៗកន្លងមកថា «ទីបំផុតជោគជ័យទាំងព្រមបានមកដល់ដៃពួកយើងហើយ ។ ការអត់ធ្មត់ដើរកាត់ព្យុះភ្លៀងមួយរយៈធំនេះពិតជាមានន័យណាស់ ។ ពេលនេះខ្ញុំញញឹម ខ្ញុំសើច ខ្ញុំសប្បាយប្រកបដោយក្តីសុខយ៉ាងពិតប្រាកដដែលខ្ញុំ និងគ្រួសារ«ម៉េង»បានទទួលនូវជ័យជម្នះយ៉ាងសមបំណង ។ ខ្ញុំដឹងបានតាមរយៈភ្ញៀវដែលអញ្ជើញចូលទស្សនា ដោយសារស្នូរទះដៃ និងដោយសារពាក្យសម្តីកោតសរសើរដែលពុំមែនជាការបញ្ជោ ។
ពេលនោះខ្ញុំនិយាយស្ទើរមិនចេញ និងបានភ្លេចនូវពាក្យខ្លះដែលខ្ញុំចង់និយាយព្រោះតែការរំភើបពេក ។ ទឹកភ្នែកខ្ញុំក៏ចង់បង្ហាញខ្លួន ម្តងៗទាំងពេលខ្ញុំច្រៀង និងនិយាយដោយសារមើលឃើញទឹកមុខញញឹមគាំទ្រពីទស្សនិកជនជាច្រើនមានទាំងបងប្អូនខ្មែរ និងបរទេសក្នុងលក្ខណៈគោរពឲ្យតម្លៃដោយស្មោះចំពោះការសម្តែងរបស់ពួកយើង ។
ពេលនេះ ខ្ញុំចង់សូមអរគុណដល់មនុស្សសំខាន់ដែលនាំពួកយើងមកកាន់កម្មវិធីនេះ គឺប្អូនស្រី Vuth Chanmoly និងស្វាមី ។ អរគុណនូវប្រសាសន៍ណែនាំរបស់លោកជំទាវសុទ្ធ សុម៉ាលី លោកជំទាវ និងប្អូនស្រីជាអ្នកទីមួយដែលផ្តល់តម្លៃដល់ពួកយើង ។ ក៏មិនភ្លេចសូមអរគុណលោកប្រធាន អនុប្រធាន សមាជិក សមាជិកានៃសមាគមសិល្បៈវប្បធម៌ខ្មែរ ACK ប្រចាំប្រទេសបារាំង ដែលមិនរើសអើងតាមការអូសទាញ ។ លោកអ្នកសក្តិសមជាអ្នកស្នេហាសិល្បៈវប្បធម៌ខ្មែរប្រាកដមែន ។
យើងខ្ញុំក៏សូមគោរពអរគុណឯកឧត្តម លោកជំទាវឯកអគ្គរាជទូតខ្មែរប្រចាំប្រទសបារាំងដែលផ្តល់ភាពកក់ក្តៅដល់យើងខ្ញុំ ។ សូមអរគុណទៅដល់ទស្សនិកជនទាំងភ្ញៀវជាតិ និងអន្តរជាតិ ។
សូមអរគុណហ្វ៊ែនរបស់ពេជ្ជតាពីគ្រប់ទិសទីដែលបានចូលរួមការពារមតិ និងជួយបញ្ចៀសពេជ្ជតាពីការប្រមាថ ព្រមទាំងបានផ្ញើពាក្យជូនពរលើកទឹកចិត្តដល់ពេជ្ជតា និង កូនៗធ្វើឲ្យយើងខ្ញុំមានកម្លាំងធ្វើកិច្ចការទាំងនេះរហូតបានទទួលជោគជ័យ ។ សូមផ្ញើជូនវិញនូវមោទនភាពនេះដល់លោកអ្នកទាំងអស់គ្នា ។
នាងខ្ញុំជំនួសមុខឲ្យក្រុមគ្រួសារ«ម៉េង» សូមសន្យាថាទោះជាស្ថិតក្នុងស្ថានភាពជូរចត់យ៉ាងណាក៏ដោយ ក៏យើងនឹងនៅតែរក្សាការងារការពារលើកស្ទួយវប្បធម៌នេះរហូតមិនបញ្ឈប់ឡើយ ។ វប្បធម៌ខ្មែរត្រូវតែមានភាពត្រចះត្រចង់ជានិរន្តរ៍មិនអាចលង់លិចទៅតាមពេលវេលា ឬតាមការប្រមាថជាន់កម្ទេចពីមនុស្សអគតិណាបានជាដាច់ខាត ! សូមខ្មែរទាំងអស់រួមដៃគ្នាឡើង»៕
ចែករំលែកព័តមាននេះ