ខេត្តព្រៃវែង ៖ អំពើឃាតកម្មមួយបានធ្វើឱ្យមានការភ្ញាក់ផ្អើលដល់ប្រជាពលរដ្ឋពេញ១ភូមិ ដោយសារតែស្ត្រីវ័យចំណាស់ម្នាក់ត្រូវឃាតករវាយសម្លាប់យ៉ាងសាហាវឃោឃៅ កាលពីយប់ថ្ងៃទី១១ ខែកញ្ញា ឆ្នាំ២០១៨ ដោយមិនដឹងមកពីមូលហេតុអ្វីសោះ។
ស្ត្រីរងគ្រោះខាងលើឈ្មោះ តិត នឿន ហៅណូក អាយុ៥៥ឆ្នាំ ត្រូវអ្នកជិតខាងប្រទះឃើញ ដេកស្លាប់នៅលើគ្រែក្រោមផ្ទះរបស់ស្ត្រីរងគ្រោះ ស្ថិតក្នុងភូមិព្រះអណ្តូង ឃុំស្វាយជ្រំ ស្រុកមេសាង ខេត្តព្រៃវែង កាលពីម៉ោង៦ព្រឹក ថ្ងៃទី១២ កញ្ញា ។ ក្រោយពីប្រទះឃើញសាកសពស្ត្រីរងគ្រោះភ្លាម អ្នកស្រុកក៏រាយការណ៍ទៅសមត្ថកិច្ចចុះទៅត្រួតពិនិត្យកន្លែងកើតហេតុភ្លាមៗផងដែរ។
ប្រភពព័ត៌ពីសមត្ថកិច្ចឱ្យដឹងថា តាមការពិនិត្យជាក់ស្តែងនៅលើដងខ្លួនសពមានស្នាមរបួស៣កន្លែង គឺនៅលើគុម្ពត្រចៀកខាងឆ្វេង១កន្លែង និងក្បាលខាងក្រោយ២កន្លែង ហើយនៅក្បែរសពរកឃើញញញួរ១ ពូថៅដៃ១ និងអង្រែបុកគ្រឿង១ ទើបសមត្ថកិច្ចសន្និដ្ឋានថា ឃាតករប្រើវត្ថុតាងទាំងនេះវាយសម្លាប់ជនរងគ្រោះតែម្តង។
សមត្ថកិច្ចបញ្ជាក់ទៀតថា នៅយប់មុនកើតហេតុ ស្ត្រីរងគ្រោះផឹកស៊ីជាមួយមនុស្សប្រុស៤នាក់ដែលនៅក្នុងភូមិជាមួយគ្នា ទើបសមត្ថកិច្ចដាក់ការសង្ស័យទៅលើមនុស្សទាំង៤នាក់នោះ ហើយថ្ងៃដដែលនោះសមត្ថកិច្ចឃាត់ខ្លួនជនសង្ស័យ២នាក់ ដោយឡែក២នាក់ទៀតរត់គេចខ្លួនបាត់។
បច្ចុប្បន្នសមត្ថកិច្ចជំនាញស្រុកនិងខេត្ត កំពុងសាកសួរជនសង្ស័យទាំង២នាក់ ដើម្បីកសាងសំណុំរឿងចាត់ការទៅតាមនីតិវិធី ចំណែកសពស្ត្រីរងគ្រោះបានប្រគល់ឱ្យសាច់ញាតិរៀបចំធ្វើបុណ្យតាមប្រពៃណីហើយ៕
ចែករំលែកព័តមាននេះ