ខេត្តកំពង់ធំ ៖ បុរសម្នាក់បានចងកសម្លាប់ខ្លួន បង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីព្រឹកថ្ងៃទី១១ ខែកញ្ញា ឆ្នាំ២០១៨ ស្ថិតនៅលើផ្ទះជនរងគ្រោះ ក្នុងភូមិឥន្ទកុមារ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ។
លោកវរសេនីយ៍ឯក ខេន ឈុនគ័រ អធិការនគរបាលស្រុក កំពង់ស្វាយ បានឲ្យដឹងថា ជនរងគ្រោះដែលស្លាប់ឈ្មោះ សុង ឃ្លី ហៅអាខ្លី ភេទប្រុស អាយុ២៣ឆ្នាំ រស់នៅភូមិឃុំកើតហេតុខាងលើ ។
បើយោងតាមការបំភ្លឺពីសាច់ញាតិបាននិយាយថា តាំងពីកំណើតមក ជនរងគ្រោះមានកាយសម្បទាមិនដូចគេដូចឯងនោះទេ គឺជើងខាងស្តាំរបស់ជនរងគ្រោះមានសភាពខើចខ្លីម្ខាង ដែលជាហេតុនាំឲ្យរូបគេតូចចិត្តនឹងវាសនារបស់ខ្លួនជាខ្លាំង ។
សាច់ញាតិបានបន្តឱ្យដឹងទៀតថា មួយរយៈពេលកន្លងមកថ្មីៗនេះ ជនរងគ្រោះបាស្រលាញ់កូនស្រីគេម្នាក់នៅឯភូមិស្នោរ ឃុំត្រពាំងឬស្សី ស្រុកកំពង់ស្វាយ ហើយក៏បានប្រាប់ឲ្យចាស់ទុំទៅចូលស្តីដណ្តឹងកូនគេ តែត្រូវឪពុកម្តាយប្រាប់ថា «រង់ចាំចេញវស្សារួចសិនទៅ ចាំពួកគាត់ទៅសួរនាំឱ្យ» ។
លុះនៅព្រឹកមុនពេលកើតហេតុខាងលើ សាច់ញាតិហើយនិងជនរងគ្រោះកំពុងតែអង្គុយជជែកគ្នាលេងនោះ ស្រាប់តែជនរងគ្រោះងើបដើរឡើងទៅលើផ្ទះបាត់ ពួកគាត់ក៏មិនបានចាប់អារម្មណ៍នោះទេ ស្រាប់តែមួយសន្ទុះក៏ឃើញទ្វារផ្ទះបិទទ្វារដាក់គន្លឹះជាប់ មិនឮសូរសំឡេងឆ្លើយតប ក៏នាំគ្នាគាស់ទ្វារផ្ទះចូលមើល ក៏ឃើញជនរងគ្រោះចងកស្លាប់បាត់ទៅហើយ រួចក៏ស្រាយសពដាក់ចុះមកក្រោម និងបានរាយការណ៍ទៅអាជ្ញាធរ ។
ក្រោយទទួលបានព័ត៌មានខាងលើភ្លាម សមត្ថកិច្ចប៉ុស្តិ៍ និងអាជ្ញាធរមូលដ្ឋានបានសហការគ្នាចុះពិនិត្យសព រកឃើញថា មូលហេតុគឺជនរងគ្រោះតូចចិត្តនឹងវាសនារបស់ខ្លួនដែលកើតមកមានកាយសម្បទាមិនដូចគេ ហើយប្រហែលជាតូចចិត្តនឹងចាស់ទុំយូរទៅដណ្តឹងប្រពន្ធឲ្យផងក៏មិនដឹង បានជាសម្រេចចិត្តចងកសម្លាប់ខ្លួនតែម្តង។ បន្ទាប់ពីសមត្ថកិច្ចពិនិត្យរួច សពត្រូវបានប្រគល់ជូនសាច់ញាតិចាត់ចែងធ្វើបុណ្យតាមប្រពៃណី៕
ចែករំលែកព័តមាននេះ