ខេត្តព្រះសីហនុ ៖ សេចក្តីរាយការណ៍ឱ្យដឹងថា កម្លាំងចម្រុះបានចុះទីតាំងផ្ទះសំណាក់និងម៉ាស្សាជនជាតិចិនយីហោលេខ(8) ដែលម្ចាស់ផ្ទះសំណាក់ឈ្មោះ HUYONG DONG ស្ថិតនៅទល់មុខអតីតភោជនីយដ្ឋានដាយមិនសុី ស្ថិតក្នុងភូមិ០១ សង្កាត់លេខ០៣ ខេត្តព្រះសីហនុ ដែលកន្លងមកតែងតែធ្វើសកម្មភាពផ្សេងៗ បង្កការរំខានដល់ការសម្រាករបស់ប្រជាពលរដ្ឋ ដែលមានលំនៅក្បែរៗជារៀងរាល់ថ្ងៃ ។
សេចក្តីរាយការណ៍បន្តថា ការចុះទៅរបស់កម្លាំងនេះ គឺត្រូវធ្វើឡើងទៅតាមពាក្យបណ្តឹងតាមទូរស័ព្ទ របស់ប្រជាពលរដ្ឋ ដែលមានលំនៅជុំវិញទីតាំងផ្ទះសំណាក់និងហាងម៉ាស្សាខាងលើ ។ ការរំខាន គឺតែងតែប្រើប្រាស់ម៉ាសុីនភ្លើង និងចាក់ភ្លេងប្រគំតន្ត្រីបំពងសម្លេងលាន់ខ្លាំងៗ មិនមានម៉ោងកំណត់ ដែលរំខានដល់ដំណេករបស់ប្រជាពលរដ្ឋក្បែរទីតាំងខាងលើ ។
កម្លាំងបានធ្វើការអប់រំណែនាំដល់ជនជាតិចិនម្ចាស់ទីតាំងខាងលើ ឱ្យចាក់ភ្លេងប្រគំតន្ត្រីយ៉ាងយូរត្រឹមម៉ោង១១យប់ ។ ដោយឡែក ម៉ាសុីនភ្លើងត្រូវរកទីតាំងទុកដាក់នៅក្នុងដីឡូត៍របស់ខ្លួន និងរៀបចំពីលក្ខណ:បច្ចេកទេសកាត់បន្ថយសម្លេងម៉ាសុីនភ្លើង មកនៅត្រឹមសម្លេងតិចៗ ចៀសវាងការរំខាន និងរំលោភសិទ្ធិរស់នៅរបស់ប្រជាពលរដ្ឋ ដែលរស់នៅជិតខាង ។
ក្នុងឱកាសនោះដែរ បន្ទាប់ពីក្រុមការងារខាងលើបានធ្វើការសាកសួរ ដល់ជនជាតិចិនជាម្ចាស់អាជីវកម្មផ្ទះសំណាក់និងហាងម៉ាស្សា ទៅតាមនិតិវិធីច្បាប់ស្តីពីការបើកអាជីវកម្ម ក៏បានបែកធ្លាយអំពីការបើកធ្វើអាជីវកម្មទីតាំងខាងលើ គឺនៅមិនទាន់មានច្បាប់អនុញ្ញាតិនៅឡើយ ។
ជាងនេះ ទៅទៀតទាក់ទងទៅនិងកិច្ចការជំនាញនគរបាលការិយល័យអន្តោប្រវេសន៍ និងមន្ទីរការងារបណ្តុះបណ្តាលវិជ្ជាជីវ: សម្រាប់ម្ចាស់ទីតាំងជនជាតិចិន រួមទាំងបុគ្គលិកជាជនជាតិចិន ដែលមកស្នាក់នៅប្រកបរបររកសុី ក្នុងទីតាំងខាងលើនេះតើបានបំពេញបែបបទបានត្រឹមត្រូវតាមផ្លូវច្បាប់ដែរឬទេ..? គួរតែនគរបាលការិយាល័យនិងមន្ទីរជំនាញបន្តចុះត្រួតពិនិត្យបន្ថែមទៀត ដើម្បីបង្កើនចំណូលដល់ថវិការជាតិ ។
នៅក្នុងវេលាខាងលើ ក្រុមការងាររដ្ឋបាលសង្កាត់បានដាក់ឱសានវាទ ក្នុងរយ:ពេល១សប្តាហ៍ ដោយចាប់
គិតពីថ្ងៃម្ចាស់ទីតាំងបានព្រមព្រៀង នៅក្នុងកំណត់ហេតុនាថ្ងៃទី១០ ដល់ថ្ងៃទី១៦ កញ្ញា ឆ្នាំ២០១៨ និងបានតម្រូវឱ្យម្ចាស់អាជីវកម្មលើកស្លាកយីហោហាងរបស់ខ្លួន បានត្រឹមត្រូវទៅតាមច្បាប់នៅក្នុងព្រះរាជាណាចក្រកម្ពុជា ដែលតម្រូវឱ្យសរសេរជាអក្សរខ្មែរនៅខាងលើធំៗអក្សរបរទេសនៅខាងក្រោម
បើម្ចាស់ទីតាំងខាងលើ មិនគោរពតាមការព្រមព្រៀង ដែលមាននៅក្នុងកំណត់ហេតុ រដ្ឋបាលសាលាក្រុងព្រះសីហនុ មានចំណាត់ការទៅតាមច្បាប់ ។
ចែករំលែកព័តមាននេះ