រាជធានីភ្នំពេញ ៖ អ្នកភូមិក្រាំងដូនទៃ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ បានសម្ដែងការភ្ញាក់ផ្អើលយ៉ាងខ្លាំង កាលពីវេលាម៉ោង៤រសៀលថ្ងៃទី៨ កញ្ញា បន្ទាប់ពីបានឮសូរសំឡេងទារកយំយ៉ាងរន្ថើននៅក្នុងដីចម្ការមួយកន្លែង…
រាជធានីភ្នំពេញ ៖ អ្នកភូមិក្រាំងដូនទៃ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ បានសម្ដែងការភ្ញាក់ផ្អើលយ៉ាងខ្លាំង កាលពីវេលាម៉ោង៤រសៀលថ្ងៃទី៨ កញ្ញា បន្ទាប់ពីបានឮសូរសំឡេងទារកយំយ៉ាងរន្ថើននៅក្នុងដីចម្ការមួយកន្លែង ស្ថិតនៅក្នុងភូមិរបស់ពួកគាត់ ។
ខណៈនោះក៏បានប្រើយុវជនម្នាក់ឲ្យទៅមើល ស្រាប់តែឃើញមានទារកម្នាក់ទើបនឹងសម្រាលមកថ្មីៗ ដោយមិនទាន់កាត់ផ្ចិតចេញផង និងមានស្រមោចរោមខាំថែមទៀត ។ ពេលនោះ ពួកគាត់បាននាំយកទារកខាងលើទៅលាង និងជូតសម្អាតរួចរាល់ ទើបបញ្ជូនទៅកាន់មន្ទីរពេទ្យបង្អែកពោធិ៍ចិនតុង ដើម្បីពិនិត្យសុខភាព និងសង្គ្រោះ ។
អ្នកភូមិខាងលើបានឲ្យដឹងថា តាមការពិនិត្យមើលជាក់ស្ដែង ទារកនោះទើបនិងកើតមកថ្មីៗប៉ុណ្ណោះ ព្រោះផ្ចិតនៅមិនទាន់កាត់ ឬចងតាមបច្ចេកទេសរបស់គ្រូពេទ្យ ឬឆ្មបនៅឡើយ ចំណែកឯកាយសម្បទាល្អជាធម្មតា ។ មិនតែប៉ុណ្ណោះ ក៏មិនមាននរណាម្នាក់បានដឹង និងស្គាល់ថា ឪពុកម្ដាយរបស់ទារកកម្សត់ខាងលើ គឺជានរណានៅឡើយទេ ។
ប្រភពដដែលបានបន្តទៀតថា ពួកគាត់សង្ស័យថា ទារកនេះគឺជាកូនរបស់កម្មការិនីម្នាក់ ដែលជួលផ្ទះស្នាក់នៅជិតៗនោះ ដែលបានបង្កាត់ភ្លើងស្នេហ៍ជាមួយបុរសម្នាក់ ព្រោះតែភ្លើតភ្លើនប្រព្រឹត្តខុសគន្លងប្រពៃណីប្រគល់ខ្លួនប្រាណជូនសង្សាររហូតជ្រុលខ្លួនមានផ្ទៃពោះ ។ បន្ទាប់មក ត្រូវបានគូសង្សារក្បត់ចិត្តដោះដៃចោលអត់ទទួលខុសត្រូវ ដែលជាហេតុធ្វើឲ្យនាងពពោះម្នាក់ឯង ហើយដោយខ្លាចឪពុកម្ដាយបងប្អូនសាច់ញាតិដឹង និងខ្មាសអ្នកស្រុកទើបពេលដែលកូនកើតមក ក៏សម្រេចចិត្តយកទៅបោះចោលបែបនេះ ម្យ៉ាងទៀត ប្រសិនបើគ្មានអ្នកប្រទះឃើញទារកនោះនឹងត្រូវស្លាប់មិនខានឡើយ ។
ប្រភពសង្ស័យខាងលើ បានបន្តទៀតថា ពួកគាត់មិនបានដឹងថា តើទារកនេះត្រូវបានម្ដាយយកទៅប្លុងចោលតាំងពីពេលណានោះទេ ប៉ុន្តែនៅខណៈនោះមេឃងងឹតជិតភ្លៀងផង ស្រាប់តែឮសំឡេងទារកយំយ៉ាងខ្លាំងនៅក្រោយផ្ទះ ។ ពួកគាត់ មានការងឿងឆ្ងល់ខ្លាំងណាស់ ព្រោះនៅក្នុងភូមិមិនមានស្ត្រីណាទើបសម្រាលកូនឡើយ ហេតុអ្វីទើបមានទារកយំបែបនេះ ?
លុះពេលយុវជន សេង ស៊ីថា ដើរទៅមើល ស្រាប់តែប្រទះឃើញទារកនោះ ដេកយំនៅលើដីដោយមានទាំងសត្វស្រមោចរោមខាំថែមទៀតផង ។ អ្នកបង្កើតទារកនេះ ពិតជាមនុស្សចិត្តដាច់ខ្លាំងណាស់ គ្មានធម៌មេត្តាឡើយ ដែលសុខចិត្តយកកូនទៅបំបរបង់ចោល ដោយមិនគិតថា កូនកើតចេញពីផ្ទៃពោះខ្លួនឯងសោះ ៕
ចែករំលែកព័តមាននេះ