អ្នកជំនាញ​ថា​ តំបន់​ផ្លូវ​៦០​ម៉ែត្រ​នឹង​ក្លាយជា​តំបន់​ពាណិជ្ជកម្ម​


រាជធានី​ភ្នំពេញ ៖ អ្នកជំនាញ​អចលនទ្រព្យ​អន្តរជាតិ​បាន​ព្យាករណ៍​ថា តំបន់​ស្ថិត​នៅ​ស្រប​តាម​បណ្តោយ​មហាវិថី​សម្តេច​តេ​ជោ​ហ៊ុន សែន ឬ​ទីក្រុង​រណប ING CITY នឹង​ក្លាយជា​តំបន់​ពាណិជ្ជ​កម្មនា​រយៈពេល​១០​ឆ្នាំ​ខាង​មុខ​នេះ​។

នាយិកា​ប្រចាំ​ប្រទេស​នៃ​ក្រុមហ៊ុន​CBRE Cambodia អ្នក​នាង អាន សុធី​តា បាន​មាន ប្រសាសន៍ ឲ្យ​ដឹង​តាម​ទូរស័ព្ទ​នៅ​ថ្ងៃ​ទី​៧ កញ្ញា​នេះ​ថា តំបន់​នេះ​ជាទី​ក្រុង​ថ្មី និង​មានការ​រៀបចំ​ហេ​ដ្ឋា​រចនា​សម្ព័​ន្ឋ​ថ្មី ដែល​វា​មាន​ភាព​ងាយស្រួល​ក្នុង​ការ​រៀបចំ​ការ​អភិវឌ្ឍ​ជាង​ទីក្រុង​ចាស់ ពិសេស​មាន​ចម្ងាយ​ជិត​ជាងគេ​ចេញពី​កណ្តាល​ក្រុង បើ​ធៀប​នឹង​ទីក្រុង​រណប​ដទៃ​ទៀត​។

​អ្នក​នាង​បន្ត​ថា តម្លៃ​ដី​នៅ​តំបន់​នេះ​បាន​កើនឡើង​យ៉ាង​ខ្លាំង ដោយ​គិត​ពី​តំបន់​ក្បាល​ថ្នល់ ដី​នៅ​ស្រប​តាម​បណ្តោយ​ផ្លូវ​៦០​ម៉ែត្រ ទៅ​មុខ​ចម្ងាយ​បី​គីឡូម៉ែត្រ​មាន តម្លៃ​ចន្លោះ​១០០០​ទៅ​១៣០០​ដុល្លារ គិត​ពី​គីឡូម៉ែត្រ​ទី​៣ ទៅ​គីឡូម៉ែត្រ​ទី​៦ ដី​មាន តម្លៃ​ប្រមាណ​៨០០​ដុល្លារ និង​គិត​ពី​គីឡូម៉ែត្រ​ទី​៦​ដល់​គីឡូម៉ែត្រ​ទី​៩ តម្លៃ​ដី​នៅ​តាម បណ្តោយ ផ្លូវ​នេះ​មាន​តម្លៃ​ចន្លោះ​៣៥០​ទៅ​៥០០​ដុល្លារ​ក្នុង​មួយ​ម៉ែត្រការ៉េ​។

អ្នក​នាង​បន្ត​ថា “​តំបន់​នេះ​កំពុង​មានការ​រីក​ចម្រើន ដោយ​រយៈពេល​៥​ឆ្នាំ​ខាង​មុខ​វា​នឹង​ជា​តំបន់​លំនៅ​ដ្ឋា​ន ហើយ​រយៈពេល​១០​ឆ្នាំ​ទៀត ខ្ញុំ​គិត​ថា​តំបន់​នេះ​នឹង​ប្រែ​ក្លាយជា​តំបន់​ពាណិជ្ជកម្ម​”​។

បច្ចុប្បន្ន​តំបន់​នេះ​កំពុង​មានការ​រីក​ចម្រើន​យ៉ាង​លឿន ដោយ​មាន​បុរី​ជា​ច្រើន​កំពុង​សាង សង់ នៅ​តំបន់​នេះ ដូច​ជា​បុរី​ប៉េង ហួត បុរី​WOODLAND, គំរោង​ផ្សារ​ទំនើប AEON MALL3 និង​គំរោង​បង្កើត​ផ្សារ​ទំនើប​របស់​បុរី​ជីព ម៉ុង​ជាដើម​។

ជាមួយ​គ្នា​នេះ​លោក​វ៉ា វី​រៈ អ្នកជំនាញ​អចលនទ្រព្យ​អន្តរជាតិ និង​ជា​អគ្គនាយក​ក្រុមហ៊ុន​Century21 Fortuna Investment បាន​មាន​ប្រសាសន៍​ឲ្យ​ដឹងផង​ដែរ​ថា មាន​គំរោង​វិនិយោគ​ជា​ច្រើន បាន​ចាប់ផ្តើម​នៅ​តំបន់​នេះ​រួច​ហើយ ដោយសារ​តំបន់​នេះ​កំពុង​មាន​សក្តានុពល និង​មាន​ប្លង់​មេ​អភិវឌ្ឍន៍​ត្រឹមត្រូវ មាន​ហេ​ដ្ឋា​រចនា​សម្ព័​ន្ឋ​ល្អ​ប្រសើរ​និង​ធំ​ជាងគេ​នៅ​ក្រុងភ្នំពេញ​។ លោក​បន្ត​ថា ការ​មាន​ប្លង់​មេ​អភិវឌ្ឍន៍ ពិតជា​មាន​សារៈសំខាន់​ណាស់ ដើម្បី​ធ្វើ​ឲ្យ​តំបន់​នោះ មានការ​អភិវឌ្ឍន៍​ប្រកបដោយ​ភាព​រៀបរយ និង​ទាក់ទាញ​អ្នក​វិនិយោគ​អន្តរជាតិ​នានា ។

លោក​បន្ត​ថា “​ខ្ញុំ​គិត​ថា​តំបន់​នេះ​ស័ក្តិ​សមជា​តំបន់​ពាណិជ្ជកម្ម នា​ពេល​អនាគត ព្រោះ​ទីតាំង​នេះ​ល្អ​ប្រសើរ និង​ស័ក្តិសម​ជាទី​ក្រុង​ថ្មី​មួយ​ដែល​មាន​វិសាលភាព​ធំ និង​មាន​ហេ​ដ្ឋា​រចនា​សម្ព័​ន្ឋ​ត​ភ្ជាប់​យ៉ាង​ល្អ​ប្រសើរ​”​។​លោក​បន្ត​ថា “​វា​ស្ថិត​នៅ​កៀក​ក្រុង​តា​ខ្មៅ ហើយ​ប្រសិនជា​ព្រ​លាន​យន្តហោះ​ថ្មី សាងសង់​នៅ​ស្រុក​កណ្តាលស្ទឹង នឹង​ធ្វើ​ឲ្យ​មាន​ចរាចរ​ឆ្លងកាត់​តំបន់​នេះ​កាន់តែ​ច្រើន ពេល​នោះ​សកម្មភាព​ពាណិជ្ជកម្ម​នឹង​រស់​រវើក​”​។

លោក​វ៉ា វី​រៈ​បាន​បន្ត​ថា ចំណែក​រោងចក្រ សហគ្រាស ជា​បណ្តើរ​ៗ​នឹង​រើ​ចេញពី​តំបន់​នេះ ព្រោះ​នៅ​ពេល​សកម្មភាព​ពាណិជ្ជកម្ម​កើត​នៅ​តំបន់​ណា រោងចក្រ សហគ្រាស​នៅ​តំបន់​នោះ​នឹង​ចាកចេញ ដោយសារ​វិស័យ​ពាណិជ្ជកម្ម​ទាញ​យក និង​បង្កើត​តម្លៃបន្ថែម​បាន​កាន់តែ​ច្រើន​។ លោក​បន្ត​ថា ឧ​ទា​ហរ៍​រោងចក្រ សហគ្រាស​អាច​ជួល​បាន​ត្រឹម​៣​ទៅ​៤​ដុល្លារ​ក្នុង​មួយ​ម៉ែត្រការ៉េ និង​សាងសង់​អាគារ​ពាណិជ្ជកម្ម និង​លំនៅ​ដ្ឋា​ន​អាច​ទាញ​តម្លៃ​បាន​កាន់តែ​ខ្ពស់ ពេល​នោះ​រោងចក្រ សហគ្រាស​នឹង​រើ​ចាកចេញ​ដោយ​ស្វ័យប្រវត្តិ​។

យោង​តាម​ផែនការមេ​របស់​ក្រុមហ៊ុន​ING Holding​បាន​ឲ្យ​ដឹង​ថា ទីក្រុង​រណប​ ING CITY​គ្របដណ្តប់​លើ​ផ្ទៃដី​ជាង​២០០០​ហិ​កតា ដែល​មាន​វិសាលភាព​ដ៏​ធំ​មួយ និង​ជាទី​ក្រុង​រណប​ធំ​ជាងគេ​នៅ​រាជធានី​ភ្នំពេញ​។ តាម​គំរោង​ក្រុមហ៊ុន​គ្រោង​អភិវឌ្ឍន៍​តំបន់​នេះ​ជា​តំបន់​មានការ​អភិវឌ្ឍ​បែប​បៃតង និង​គោរព​តាម​គោលការណ៍​បរិស្ថាន​។

តាម​ឯកសារ​ដដែល​បាន​ឲ្យ​ដឹង​ថា ក្រុមហ៊ុន​គ្រោង​អភិវឌ្ឍន៍​តំបន់​នេះ​ជា​មជ្ឈមណ្ឌល​លំនៅ​ដ្ឋា​ន មជ្ឈមណ្ឌល​ពាណិជ្ជកម្ម កន្លែង​ចំណត​យានយន្ត ជា​សហគមន៍​សម្រាប់​និវត្តន៍​ជនជាតិ​ចិន មជ្ឈមណ្ឌល​កីឡា​ជាដើម​។

អតីត​វីរ​ស្ថាបត្យករ​កម្ពុជា លោក​បណ្ឌិត វណ្ណ ម៉ូ​លី​វណ្ណ ធ្លាប់​បាន​ផ្តល់​អនុសាសន៍​ឲ្យ​អភិ​វឌ្ឍន៍​រាជធានី​ភ្នំពេញ​ឆ្ពោះទៅ​កាន់​ភាគ​ខាងត្បូង ដោយសារ​តំបន់​ភាគ​ខាងត្បូង​មាន​ដី​ទំនេរ​ច្រើន មាន​សណ្ឋាន​ដី​ខ្ពស់​មិន​ប្រឈម​នឹង​ការ​លិច​ទឹក និង​ងាយស្រួល​រៀបចំ​ហេដ្ឋា​​រចនា​ស​ម័​ន្ឋ​នានា ដោយសារ​ជា​តំបន់​មានការ​អភិវឌ្ឍ​ថ្មី ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ