ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា កម្មកររោងម៉ាស៊ីនកិនស្រូវម្នាក់ត្រូវអង្កាមធ្លាក់បាក់សង្កត់ពីលើស្លាប់យ៉ាងអាណោចអាធ័មទាំងវ័យក្មេង ហេតុការណ៍ដ៏រន្ធត់នេះ បានកើតឡើងកាលពីម៉ោង១០និង៥នាទីព្រឹកថ្ងៃទី០៧ ខែកញ្ញា ឆ្នាំ២០១៨ នៅចំណុចរោងម៉ាស៊ីនកិនស្រូវក្រុមហ៊ុន ស្ថិតក្នុងភូមិត្រាច ឃុំកំពង់ចិនជើង ស្រុកស្ទោង ។
លោកវរសេនីយ៍ឯក យ៉ង សំ អធិការនគរបាលស្រុកស្ទោង បានឲ្យដឹងថា ជនរងគ្រោះខាងលើឈ្មោះ ចន សុភ័ក្រ ភេទប្រុស អាយុ១៦ឆ្នាំ រស់នៅភូមិត្រាច ឃុំកំពង់ចិនជើង ស្រុកស្ទោង។
តាមការបំភ្លឺពីឈ្មោះ ង៉ែត ងួន ភេទប្រុស អាយុ៤៥ ឆ្នាំ ធ្វើជាកម្មកររោងម៉ាស៊ីនជាមួយគ្នាបានឱ្យដឹងថា មុនកើតហេតុ ជនរងគ្រោះចុះទៅយកដែកដែលធ្លាក់ចូលក្នុងតៅបង្ហូរអង្កាមមានជម្រៅ២៥០ស.ម ខណៈពេលជនរងគ្រោះចុះទៅដល់បាតតៅ ស្រាប់តែអង្កាមដែលនៅលើពំនូកខ្ពស់នោះរអិលបាក់ចូលសង្កត់ពីលើជនរងគ្រោះបាត់។
កម្មករខាងលើបន្តថា ភ្លាមៗនោះគាត់ក៏ហៅកម្មករនៅក្បែរៗនោះជាច្រើននាក់មកជួយកាយអង្កាមយកជនរងគ្រោះចេញអស់រយៈពេលប្រហែលជាង២០នាទី ទើបយកជនរងគ្រោះបាន តែជនរងគ្រោះសន្លប់បាត់ស្មារតីទៅហើយ រួចក៏នាំយកជនរងគ្រោះទៅមន្ទីរពេទ្យស្រុកស្ទោង នៅពេលទៅដល់មន្ទីរពេទ្យ គ្រូពេទ្យប្រាប់ថា ជនរងគ្រោះដាច់ខ្យល់ស្លាប់បាត់ទៅហើយ។
ក្រោយពេលកើតហេតុ យោងតាមការពិនិត្យកន្លែងកើតហេតុ និងសពជនរងគ្រោះ សមត្ថកិច្ចបានសន្និដ្ឋានថា ជនរងគ្រោះពិតជាស្លាប់ដោយការថប់ដង្ហើមប្រាកដម៉ែន រួចក៏ប្រគល់សពជូនគ្រួសារជនរងគ្រោះដើម្បីយកធ្វើបុណ្យតាមប្រពៃណី។
ចែករំលែកព័តមាននេះ