ខេត្តរតនគិរី ៖ អយ្យការអមសាលាដំបូងខេត្ត បានបញ្ជាឱ្យសមត្ថកិច្ចឃាត់ខ្លួនស្ត្រី២នាក់ កាលពីរសៀល ថ្ងៃទី៥ ខែកញ្ញា ពីបទរំលោភលើទំនុកចិត្ត ពាក់ព័ន្ធនឹងប្រាក់ជំពាក់តុងទីន កាលពីអំឡុងឆ្នាំ២០១៤…
ខេត្តរតនគិរី ៖ អយ្យការអមសាលាដំបូងខេត្ត បានបញ្ជាឱ្យសមត្ថកិច្ចឃាត់ខ្លួនស្ត្រី២នាក់ កាលពីរសៀល
ថ្ងៃទី៥ ខែកញ្ញា ពីបទរំលោភលើទំនុកចិត្ត ពាក់ព័ន្ធនឹងប្រាក់ជំពាក់តុងទីន កាលពីអំឡុងឆ្នាំ២០១៤ និងឆ្នាំ២០១៥ យោងតាមពាក្យបណ្ដឹងរបស់ឈ្មោះ អ៊ាក សុណា ជាមេតុងទីន ដែលបានដាក់ពាក្យប្ដឹង កាលពីឆ្នាំ២០១៧កន្លងទៅ ។
ស្ត្រី២នាក់ដែលតុលាការនាំយកទៅឃុំខ្លួននេះ ម្នាក់ឈ្មោះ ការីម ធីតា អាយុ៣៤ឆ្នាំ មានទីលំនៅភូមិជ័យជំនះ សង្កាត់ឡាបានសៀក ក្រុងបានលុង មុខរបរលក់គ្រឿងទេស នៅផ្សារបានលុង និងម្នាក់ទៀតឈ្មោះ ការីម ស៊ុនលី អាយុ២៩ឆ្នាំ ជាស្ត្រីមេម៉ាយកូន២ មានទីលំនៅក្នុងភូមិសង្កាត់ជាមួយគ្នា ។
ការឃាត់ខ្លួនស្ត្រីទាំង២នាក់យកទៅឃុំនៅពន្ធនាគារនេះ គឺបន្ទាប់ពីពួកគេបានចូលខ្លួនទៅសាលាដំបូងខេត្ត តាមដីកាបង្គាប់ឱ្យចូលខ្លួនជាលើកទី៣ ថ្ងៃទី៥ ខែកញ្ញា ដែលចុះហត្ថលេខាដោយលោក ឃិន វិសិដ្ឋ ចៅក្រមស៊ើបសួរសាលាដំបូងខេត្ត កាលពីថ្ងៃទី២១ ខែសីហា ឆ្នាំ២០១៨ ។
តាមការរៀបរាប់ទាំងទឹកភ្នែករកយុត្តិធម៌ពីបុរសជាប្ដីឈ្មោះ ទូច ចំណាប់ បានឱ្យដឹងថា ប្រពន្ធគាត់ពិតជាជំពាក់លុយមេតុងទីនចំនួន១៥លាន និង៩០ម៉ឺនរៀលមែន ហើយតុលាការបានកោះហៅឱ្យចូលខ្លួនចំនួន២លើកមកហើយ ។ ប្រពន្ធគាត់សុំសងគេតាមលទ្ធភាពប្រចាំខែ ក៏ប៉ុន្តែម្ចាស់បំណុលគេមិនព្រម រហូតដល់ដីកា
កោះលើកទី៣នេះ ប្រពន្ធគាត់ចូលខ្លួន ក៏ត្រូវតុលាការបញ្ជាឱ្យឃុំខ្លួនតែម្ដង ។
បុរសជាប្តីរៀបរាប់ទៀតថា ចំពោះការជំពាក់ប្រាក់ក្នុងការលេងតុងទីននេះ ពួកគាត់មិនបានបដិសេធថា មិនសង ឬរត់គេចវេះទេ គឺពួកគាត់ខំប្រឹងរកសងតាមលទ្ធភាពបណ្ដើរៗ ហេតុអ្វីបានជាចាប់ប្រពន្ធគាត់ដាក់គុក ។
ពាក់ព័ន្ធនឹងករណីនេះ លោក កែវ ពិសិដ្ឋ អ្នកនាំពាក្យអយ្យការអមសាលាដំបូងខេត្ត បានឱ្យដឹងថា ស្ត្រីទាំង២នាក់នេះ ត្រូវបានតំណាងអយ្យការសម្រេចឃុំខ្លួន ដោយចោទពីបទរំលោភលើទំនុកចិត្ត ។
សំណុំរឿងពាក្យបណ្ដឹងនេះ ដើមបណ្ដឹងបានដាក់មកព្រះរាជអាជ្ញា តាំងពីចុងឆ្នាំ២០១៧ម្លេ៉ះ ហើយព្រះរាជអាជ្ញា ទើបតែបញ្ជូនមកអយ្យការក្នុងខែសីហា ខែកញ្ញា ឆ្នាំ២០១៨ ។ ម្យ៉ាងវិញទៀត ប្រហែលជាមិនបានគោរពកាតព្វកិច្ចណាមួយ ពាក់ព័ន្ធនឹងការសងប្រាក់ហើយ បានជាព្រះរាជអាជ្ញាធ្វើការចោទប្រកាន់ពីបទរំលោភលើទំនុកចិត្ត ។
គួរបញ្ជាក់ថា ការឃុំខ្លួនស្ត្រីទាំង២នាក់ខាងលើនេះ គឺស្ត្រីម្នាក់ឈ្មោះ ការីម ស៊ុនលី ជាស្ត្រីមេម៉ាយមានកូនតូចៗ២នាក់ បានទៅដេកក្នុងពន្ធនាគារជាមួយម្ដាយដែរ ព្រោះពុំមានអ្នកមើលថែ ។ ចំណែកលោក អ៊ាក សុណា ជាដើមបណ្ដឹង អ្នកសារព័ត៌មានយើងមិនអាចសុំការបំភ្លឺបានទេ នារសៀលថ្ងៃទី៧ ខែកញ្ញា ។ ដោយឡែក មន្ត្រីពន្ធនាគារខេត្តបានឱ្យអ្នកយកព័ត៌មានដឹងថា ស្ត្រីឈ្មោះ ការីម ស៊ុនលី ដែលជាស្ត្រីមេម៉ាយកូន២ពិត ជាបានយកកូនតូចៗទាំង២នាក់ទៅដេក នៅក្នុងពន្ធនាគារជាមួយប្រាកដមែន ៕
ចែករំលែកព័តមាននេះ